Aytən Mustafayeva: “İllər öncə Nardaranda uşaqlar təhsildən yayınırdı, artıq bu problemin həll olunmasına böyük diqqət göstərilir” Dilarə Cəbrayılova: “Təhsil müəssisələrinin, yolların yenidən təmir olunaraq istifadəyə verilməsi, yeni iaşə obyektlərinin, polis bölməsinin tikilməsi, muğam və mədəniyyət mərkəzinin yaradılması tək Nardaranın simasını deyil, eyni zamanda qəsəbə sakinlərinin təfəkkürünü dəyişdi”
Son illərdə ölkədə təhsilin inkişafı istiqamətində mühüm addımlar atılır, müxtəlif şəhər və rayonlarda təhsil müəssisələrinin tikintisi, əsaslı təmiri və bərpası istiqamətində uğurlu işlər görülür. Azərbaycanın bütün bölgələri inkişaf etdiyi kimi, Nardaran qəsəbəsi də inkişaf edir. 12 min əhalinin yaşadığı qəsəbədə bu gün çoxsaylı dəyişiklik baş verib.
Azərbaycanın mövhumatçı qəsəbəsi sayılan Nardaran bu gün müasir ərazilərdən biridir. Artıq Nardaran qəsəbəsində təhsilə yüksək önəm verilir, məktəblər müasir standartlara cavab verəcək formada təmir olunaraq müəllim və şagird heyətinin ixtiyarına verilir. Sevindirici haldır ki, adıçəkilən qəsəbədə qız uşaqları dərsə gedirlər. Məlumdur ki, bir zamanlar Nardaranda qızların təhsilə davamiyyəti ən aşağı səviyyədə idi.
Bu günlərdə Prezident İlham Əliyev Nardaran qəsəbəsindəki 295 nömrəli tam orta məktəbdə əsaslı təmirdən sonra yaradılan şəraitlə tanış olub.
Məlumat üçün bildirək ki, məktəbin binası 2003-cü ildə inşa olunub. Sərəncama uyğun olaraq, məktəbin binasında əsaslı təmir işləri aparılıb. Üçmərtəbəli məktəb binasının ümumi sahəsi 5600 kvadratmetrdən çoxdur. Məktəbdə 38 sinif otağı, informatika kabineti, 2 idman zalı var. Əsaslı təmir işləri zamanı təhsil müəssisəsinin kitabxanası, emalatxanaları, yeməkxanası, tibb otağı, akt zalı da müasir səviyyədə yenidən qurulub. Məktəbdə, eyni zamanda, şagirdlərin nəzəri biliklərini zənginləşdirmək üçün biologiya, kimya və fizika laboratoriyaları yaradılıb. Ümumilikdə, 1296 şagird yeri olan məktəbin bütün sinif otaqları zəruri avadanlıqla təchiz edilib. Hazırda birnövbəli sistemlə məktəbdə 886 şagird təhsil alır. Şagirdlərin təlim-tərbiyəsi ilə 56 müəllim məşğul olur. Burada tədris Azərbaycan dilində aparılır.
Qeyd etdiyimiz kimi, bir zamanlar mövhumatın məskəni sayılan Nardaranda artıq müasir tələblərə cavab verən yeni orta məktəb fəaliyyət göstərir. Prezident göstərişinə əsasən, həmin məktəb əsaslı şəkildə təmir olunub.
295 saylı məktəbin direktoru, millət vəkili Dilarə Cəbrayılova “Bakı-Xəbər”ə açıqlamasında qeyd etdi ki, məktəbin yaşı az olmasına baxmayaraq, təmirə ehtiyacı var idi. Məktəb 2003-cü ildə istifadəyə verilən zaman bir çox texniki ləvazimatlarla təmin olunmamışdı: “Məktəbdə fizika, kimya, biologiya laboratoriyaları yox idi. Prezident İlham Əliyevin sərəncamından sonra məktəb təmirə dayandı və müasir standartlara cavab verən laboratoriyalar yarandı. Texnologiya ilə təmin olunmuş informatika otağı yarandı. Məktəbdə yaradılan hər bir şərait gələcəkdə şagirdlərin tədris keyfiyyətinə müsbət təsir edəcək”.
Millət vəkilinin sözlərinə görə, Bakı kəndləri arasında Nardaran mövhumatçılığa görə seçilib: “Uzun zamanlar cahil fikirli insanlar nardaranlıları paytaxt əhlindən uzaq tutmağa çalışıb. Qız uşaqlarının təhsil almasını istəməyiblər, qadınların çalışmasına qarşı çıxıblar. Ancaq son zamanlar Nardaranda vəziyyət müsbətə doğru dəyişir. Təhsil müəssisələrinin, yolların yenidən təmir olunaraq istifadəyə verilməsi, yeni iaşə obyektlərinin, polis bölməsinin tikilməsi, muğam və mədəniyyət mərkəzinin yaradılması tək Nardaranın simasını deyil, eyni zamanda qəsəbə sakinlərinin təfəkkürünü dəyişdi. Görülən işlər sayəsində nardaranlıların dünyagörüşü, həyata baxışı dəyişdi. Ən sevindiricisi isə qəsəbə sakinlərinin dövlətə və dövlətçiliyə inamının daha da artmasıdır”.
Millət vəkili Aytən Mustafayeva “Bakı-Xəbər”ə açıqlamasında qeyd etdi ki, Nardaran və Azərbaycanın digər bölgələrində infrastruktur yenilənir. Ölkə başçısı tərəfindən məktəblərin təmiri, yenidən bərpası işlərinə böyük önəm verilir: “İllər öncə Nardaranda uşaqlar təhsildən yayınırdı. Artıq bu problemin həll olunmasına böyük diqqət göstərilir. Son illər görülən işlər sayəsində Nardaranda şagirdlərin davamiyyəti müsbətə doğru dəyişib. Nardaranda məktəb və əhali arasında müsbət münasibət qurulub. Əhali arasında təhsillə bağlı işlər aparılıb”. Xanım millət vəkili hesab edir ki, savadsızlıq böyük bir bəladır. Azərbaycan 100 ildir bu problemdən azad olub: “Yenidən geriyə qayıtmaq, dini məsələləri ortaya atmaq yalnız təxribat xarakterli addımdır. Azərbaycan dövlətinin bir marağı var, ölkə əhalisi savadlı olmalıdır və XXI əsrə uyğun yaşamağı bacarmaq lazımdır. Bunun üçün də dövlətimiz tərəfindən lazımi şərait yaradılır”.
Günel CƏLİLOVA
