Eyyub Hüseynov: “Yeni yaradılan işçi qrupu sayəsində Azərbaycanda süd məhsullarına və kərə yağına nəzarət tətbiq olunacaq”
Azərbaycanda marqarin yağının kərə yağı adı ilə satılmasının qarşısı alınacaq. Bunun üçün Azərbaycan Süd Məhsulları İstehsalçıları və İxracatçıları Assosiasiyası Qida Təhlükəsizliyi Agentliyi (QTA) ilə birgə işçi qrupu yaradır. İşçi qrupunun yaradılmasında məqsəd süd məhsulları bazarındakı problemlərin aradan qaldırılmasıdır.
Assosiasiyanın idarə heyətinin sədri Samir Eyyubov media nümayəndələrinə açıqlamasında bildirib ki, agentliyin əməkdaşları ilə birlikdə süd məhsullarının üzərinə vurulan məlumatları araşdıracaqlar: “Həmin məlumatların məhsula tam uyğun olması ilə bağlı birgə fəaliyyət göstəriləcək”.
Maraqlıdır, görəsən sözügedən təşkilatların bu addımı marqarin yağının kərə yağı adı ilə satılmasını tamamilə önləyə biləcəkmi ?
Azad İstehlakçılar Birliyinin (AİB) sədri Eyyub Hüseynov “Bakı-Xəbər”ə açıqlamasında qeyd etdi ki, yeni yaradılan işçi qrupu sayəsində Azərbaycanda süd məhsullarına və kərə yağına nəzarət tətbiq olunacaq. Yeni yaradılan işçi qrupuna alıcının, istehlakçının hüququnu qoruyan təşkilat daxil olmalı idi: “Nəzərə almaq lazımdır ki, Süd Məhsulları İstehsalçıları və İxracatçıları Assosiasiyasına çoxlu sayda süd istehsalı ilə məşğul olan şirkətlər daxildir. Bu şirkətlərin istehsal etdiyi hər hansı bir məhsul saxta olarsa, o zaman assosiasiya heç bir reaksiya verməyəcək. Bu səbəbdən də hesab edirəm ki, işçi qrupuna əhalinin hüquqlarını müdafiə edən təşkilat daxil olmalıdır”.
Həmsöhbətimiz onu da vurğuladı ki, Qida Təhlükəsizliyi Agentliyi bu məsələnin üzərinə düşsə, problemi aradan qaldıra bilər: "Nəzərə almaq lazımdır ki, qeyd olunan məsələ sırf istehsalçılarla bağlı olan bir sahədir. Bəllidir ki, Azərbaycanda belə məhsulları istehsal edənlər kiçik sexlərdir. İri firmalara nəzarət etmək asandır, lakin kiçik sexlərə yox. Amma QTA bu problemlə ciddi olaraq məşğul olarsa, sonda müsbət nəticə əldə edə bilərik. Bunun üçün ilk növbədə Azərbaycanda laboratoriya yaradılmalıdır. Hesab edirəm ki, agentlik bu məsələni həll edəcək”.
E.Hüseyovun sözlərinə görə, marqarin yağını kərə yağı adı altında satan firmalar cəzalandırılmalıdır: “Xarici ölkələrdə bunu edənlərin ilkin cəzası müəyyən miqdarda pul cəriməsi olur. Onlar təkrar olaraq yenə qanunsuz istehsalla məşğul olarlarsa, cərimənin miqdarı artırılır. Buna da məhəl qoyulmadıqda, həmin firmaları bağlayırlar. Məncə, ölkəmizdə də belə bir proses tətbiq olunmalıdır”.
Günel CƏLİLOVA
