Məhərrəm Zülfüqarlı: “Bu mövzuların ilk dərs günündə tədris edilməsi şagirdlərin vətənpərvərlik ruhunun yüksəlməsində mühüm əhəmiyyətə malikdir” Kamran Əsədov: “Təklif edərdim ki, hər bir fənnin özünün azərbaycançılıqda, dövlətçiliyimizin inkişafında, elmin tərəqqisində rolu haqqında şagirdlərə dərslər keçilsin”
Yeni tədris ilinin başlanmasına az vaxt qalıb. Təhsil Nazirliyinin qərarı ilə ilk dərs günündə şagirdlərə keçiləcək mövzuların adları da artıq müəyyənləşib.
Bakı Şəhəri üzrə Təhsil İdarəsindən yerli mətbuata verilən məlumata görə, yeni tədris ilində Bakı məktəblərində ilk dərslər ibtidai siniflərdə “Vətənim Azərbaycan”, V-IX siniflərdə “Dövlət rəmzləri-müstəqilliyimizin simvolu”, X-XI siniflərdə “Azərbaycan Xalq Cümhuriyyəti-dövlətçiliyimizin bayraqdarı” mövzularına həsr olunacaq.
Bakı Şəhəri üzrə Təhsil İdarəsindən bildirilənə görə, ümumi təhsil sahəsində “2018-2019-cu dərs ilinin prioritet fəaliyyət istiqamətləri barədə” əmrə əsasən, təhsil müəssisələrinə tapşırılıb ki, ümumtəhsil məktəblərində müvafiq mövzular üzrə ilk dərs məşğələsinin səmərəli və yaddaqalan olması üçün zəruri təşkilati işlər görülsün, həmin dərslərdə aidiyyəti təşkilatların nümayəndələrinin, müharibə və əmək veteranlarının, məktəbin sabiq məzunlarının iştirakı nəzərdə tutulub.
Tədrisdə baş verəcək bu yeniliklər həqiqətən də diqqətçəkəndir. Bu bütün mənalarda şagirdlərin həyatında, tədrisə münasibətində müsbət rol oynayacaq.
Bu gün Azərbaycandakı orta ümumtəhsil müəssisələrində təhsil alan şagirdlərin daha da vətənpərvər, tariximizə, milli düşüncəmizə bağlı olması üçün ilk dərs günündə təqdim ediləcək mövzuların əhəmiyyəti misilsizdir.
Tarix üzrə fəlsəfə doktoru, təhsil üzrə tanınmış mütəxəssis Məhərrəm Zülfüqarlı bizimlə söhbətində Bakı məktəblərində ilk dərslərin ibtidai siniflərdə “Vətənim Azərbaycan”, V-IX siniflərdə “Dövlət rəmzləri-müstəqilliyimizin simvolu”, X-XI siniflərdə “Azərbaycan Xalq Cümhuriyyəti-dövlətçiliyimizin bayraqdarı” mövzularına həsr olunmasını birmənalı olaraq müsbət qarşıladığını bildirdi. M.Zülfüqarlı hesab edir ki, bu, şagirdlərdə vətənpərvərlik tərbiyəsinin formalaşmasında əsas rollardan birini oynayacaq: “İlk dərs günündə şagirdlərə keçiləcək mövzular vətənini, dövlətini istəyən hər bir insan, alim, ziyalı tərəfindən müsbət qarşılanmalıdır. Çünki hər üç mövzu Azərbaycan dövlətçiliyinə xidmət edən, vətənpərvərliyi təbliğ edən mövzulardır. Bu işi ancaq alqışlamaq olar. Bu mövzuların ilk dərs günündə tədris edilməsi şagirdlərin vətənpərvərlik ruhunun yüksəlməsində mühüm əhəmiyyətə malikdir. Özü də il boyu bu prosesi davam etdirmək lazımdır. İlk dərs günündə şagirdlərə bu mövzular haqqında məlumat verildikdən sonra il boyu onlara yenidən qayıtmaq lazımdır. Bunlar çox mühüm məsələlərdir”.
Tarix üzrə fəlsəfə doktoru, tanınmış təhsil eksperti Kamran Əsədov da hesab edir ki, ilk tədris gününün sözügedən mövzulara həsr edilməsi kifayət qədər əhəmiyyətlidir. O bildirdi ki, bu çox müsbət haldır: “Müəyyən olunub ki, hər il ilk dərs günü bu kimi mövzularla başlansın. Artıq əvvəlki illərdə bu təcrübədən istifadə edilib. Bu çox maraqlı tendensiyadır və hesab edirəm ki, əlbəttə, şagirdlərimizin milli vətənpərvərlik ruhunda tərbiyə olunması üçün bu, mühüm addımlardan biridir. Bu, şagirdlərdə azərbaycançılıq ruhunun tərbiyə olunması sahəsində əhəmiyyətli işdir. Burada söhbət bu mövzuları şagirdlərə kimlərin tədris etməsindən və bu mövzularda onu tədris edəcək insanların planlarının olub-olmamasından gedir. Məsələ burasındadır ki, bu dərsləri təkcə humanitar sahələr üzrə müəllimlər aparmamalı, qeyri-humanitar fənn müəllimləri də bu işə cəlb edilməlidir. Düzdür, bu, humanitar sahələr üzrə ixtisaslaşan müəllimlərin sahəsinə aiddir. Mövzular kifayət qədər maraqlıdır, azərbaycançılığın təbliği, vətənimizin öyrənilməsi, Cümhuriyyət ənənələrimizin şagirdlərə təlqin olunması baxımdan faydalıdır. Təklif edərdim ki, ilk dərs günündə şagirdlər məktəblərin akt zalına aparılsın və bu mövzularda onlara müəllimlər deyil, ölkənin tanınmış ictimai-siyasi simaları, elm xadimləri dərs keçsin. Bu çox maraqlı olardı”.
K.Əsədov onu da vurğuladı ki, bu mövzuların tədrisinə riyaziyyat, kimya, biologiya, fizika müəllimləri də qoşulmalıdır. Mütəxəssis təklif edir ki, bu mövzular hər bir fənnin əsasları götürülməklə keçilməlidir. “Yəni kimya, bilogiya, fizika, riyaziyyat fənlərinin azərbaycançılıqda rolundan, Azərbaycanın bu sahələr üzrə əldə etdiyi uğurlardan da danışılmalıdır. Hesab edirəm ki, belə olsa, daha yaxşı olar. İlk tədris günündə şagirdlərə keçiləcək mövzular humanitar sahəni əhatə edir, onun texniki sahələri əhatə etməsi də yaxşı olardı. Təklif edərdim ki, hər bir fənnin özünün azərbaycançılıqda, dövlətçiliyimizin inkişafında, elmin tərəqqisində rolu haqqında şagirdlərə dərslər keçilsin” - deyə K.Əsədov bildirdi.
İradə SARIYEVA
