Çingiz İsmayılov: “Azərbaycanda turizm sektorunda yeni şəraitin yaradılması və bu sahənin cəlbediciliyinin artması beynəlxalq turizm bazarında Rusiya üçün yeni imkanlar açıb”
Azərbaycan dünyanın inkişaf etmiş turizm ölkələrindən birinə çevrilib. Dünyanın müxtəlif ölkələrindən ölkəmizə hər il yüzlərlə turist gəlir. Son dövrlər Azərbaycana gələn turistlər arasında Rusiya vətəndaşları xüsusilə çoxluq təşkil edir.
Azərbaycanla Rusiya arasında bir sıra sahələrdə olduğu kimi, turizm əlaqələri də inkişaf edir. Onu da vurğulayaq ki, bir neçə gün əvvəl Rusiya və Azərbaycan prezidentlərinin Soçidə baş tutan görüşündə bir sıra sahələrə dair sənədlər imzalanıb. Bu sənədlərdən biri də Azərbaycan və Rusiya prezidentlərinin turizm sahəsində əməkdaşlıq haqqında imzaladıqları sazişdir.
Bu sənədin imzalanması turizm sahəsinin inkişafinda hansı müsbət nəticələrə səbəb olacaq?
Turizm üzrə tanınmış ekspert Çingiz İsmayılov bizimlə söhbətində Azərbaycan və Rusiya prezidentlərinin turizm sahəsində əməkdaşlıqla bağlı imzaladığı sazişin əhəmiyyətinin hər iki ölkə üçün böyük olduğunu vurğuladı. Azərbaycanda turizmin inkişafı üçün sağlam mühitin olduğunu deyən Ç.İsmayılov hesab edir ki, Rusiya və Azərbaycan arasında turizm sahəsində əməkdaşlıq sazişinin imzalanması çox müsbət addımdır. “Sözsüz ki, bu sazişin imzalanması Azərbaycan və Rusiya arasındakı münasibətlərdə, əlaqələrin daha da möhkəmlənməsində önəmli rol oynayır. Ümumiyyətlə, iki dövlət arasında əlaqələrin möhkəmlənməsində iqtisadi sahənin, eləcə də turizm blokunun çox böyük əhəmiyyəti var. Rusiyada 140 milyondan çox əhali yaşayır və onların üçdə biri daim yay mövsümündə istirahət üçün müxtəlif ölkələrə üz tutur. Siz Misirdə, Türkiyədə və digər ölkələrdəki vəziyyətdən xəbərdarsınız. Sosial mediadan da bilirsiniz ki, o ölkələrdəki vəziyyət, görünür, onları qane etmir. Buna görə də Azərbaycanda turizm sektorunda yeni şəraitin yaradılması və bu sahənin cəlbediciliyinin artması beynəlxalq turizm bazarında Rusiya üçün yeni imkanlar açıb. Azərbaycanla Rusiya arasında məsafə uzaq deyil, yəni Rusiya vətəndaşları çox az vaxt sərf etməklə Azərbaycana gələ bilərlər. Digər tərəfdən, bizdə qiymətlər münasibdir, dil problemi yoxdur, mentalitet yaxınlığımız var. Həmçinin, burada söhbət iki dövlət arasında münasibətlərin daha da yaxınlaşması, dərinləşməsi məsələsindən gedir. Bizim yaxın tarixi keçmişimizin olması kimi məsələlər də imkan yaradır ki, Azərbaycan və Rusiya arasında turizm əlaqələri də güclü şəkildə inkişaf etsin. Əgər ilin sonuna qədər ölkəmizə təxminən 3 milyona yaxın turist gələcəksə, gələn il bu rəqəm rusiyalı turistlərin hesabına bir qədər də artacaq” - deyə bildirən Ç.İsmayılov hesab edir ki, bu kimi səbəblərə görə bu sənədin imzalanmasının əhəmiyyəti çox vacibdir. O qeyd etdi ki, Rusiya əhalisi Azərbaycanda əminamanlığın olmasını xüsusilə bilir və odur ki, buradakı təhlükəsizlik şəraiti, eləcə də sabitlik onları ölkəmizə cəlb edir.
İradə SARIYEVA
