Qeyrətdə doğma yurdunun ən qüvvətli qolu idi Namaz. O, Vətənin adına layiq böyümüşdü, elə buna görə də saf arzulara, müqəddəs duyğulara tapınmaqla Vətən naminə yaşamağı, sevməyi bacarırdı.
Günəş kimi insanlığa xeyir vermək onun mənəviyyat fəlsəfəsinə uşaqlıqdan yazılmışdı. Az yaşda - ömrünün çiçək vaxtı sinəsini cənnətməkan yurduna sipər etməklə bütün istəklərinə çatdı. Həyat yolunu halal torpağını qürurla dünyaya göstərməklə tamamladı. İndi dağlar diyarı Lerik rayonu, Günəşli kəndinin məhəbbəti də, şan-şöhrəti də, xeyirxah qəlblərdə hamının sevinc payı da Namazdır...
Namaz Fərman oğlu Muradov 2002-ci ildə Milli Ordu Sıralarına yola düşəndə doğma Günəşli kənd camaatı ağlına, qeyrətinə heyran kəsildiyi övladının hünər göstərib ad qazanacağına inanırdı. Bu el sevdasını əsl oğul kimi ucadan-uca tutan Namazın ilk döyüş yeri Ağdamın Mahrızlı kəndinin yaxınlığı olur. Öndə getməklə erməni dığalarına qarşı cəsarətlə, qorxmadan döyüşür. Onun hünəri hər an əsgərləri hücuma səsləyir, Vətən torpağına sonsuz məhəbbəti qəzəbə, nifrətə dönüb düşmənin belini qırır. Hər dəfə də döyüşə girəndə erməniləri son nəfərədək məhv edəcəyinə ürəkdən inanır. Elinin adını, şərəfini unutmur, onu yağıya qənim olmaqla ucaltmağa can atır və məqsədə də çatır.
2003-cü il, avqust ayının son günləri. Quduz düşmən Ağdamın Təzəkəndinə hücum edir. Namaz öz dəstəsi ilə döyüşə atılır. Düşmənin xeyli sayda canlı qüvvəsi qırılır. Onlar Namaz tək igid oğlanların zərbələrinə tab gətirməyib geri çəkilirlər. Bu döyüşdə də Namaz Vətən qarşısında müqəddəs borcunu şərəflə yerinə yetirir. Lakin torpağı qorusa da, qəfil açılan güllədən özünü qoruya bilmir. Ağır yaralanır, tez onu Sarıcalıdakı hospitala aparırlar. Həkimlər əlindən gələni etsələr də, Namazın ömrünə vaxtsız gələn ölümün qarşısını ala bilmirlər. Vətəni sevən bir ürək əbədi susur.
İndi 15 ildir ki, Azərbaycan xalqının ürəyində həmişəlik məskən salmaqla əbədiyyət ulduzuna dönən Namaz Muradov etibardan, düz ilqardan Vətənin hər bir yeni nəslinə həyat dərsi keçir. O, vətən naminə, xalq naminə göstərdiyi hünərlə ölməzdir. Qədirbilən insanlar da onu bir an belə unutmurlar. Oxuduğu məktəb Namazın adını daşıyır. Namazın hünərini özündə yaşadan yüzlərlə məqalə, şeir, povest yazılıb. Yazımı bacısı Mirvari Fərman qızının Namaza həsr etdiyi “ Şəhid zirvəsinə ucaldı qardaş” şeirinin iki bəndi ilə tamamlasam lap yerinə düşər:
Doğma yurd eşqilə ürəyi yandı, Tanrı verdi, yağı düşmənsə aldı. Bir kabusdur hələ bitməyən savaş, Şəhid zirvəsinə ucaldı qardaş...
Qəbrin üstə için-için ağlaram, Göz yaşımla məzarını sularam. Sənin qisasını alacaq yurddaş - Şəhid zirvəsinə ucaldı qardaş...
Zəfər ORUCOĞLU Lerik rayonu
