“Xalçaçılıq fabriklərinin açılışı bu qədim sənət növünün bərpa edilməsi ilə yanaşı, yeni iş yerlərinin yaradılması, bölgə iqtisadiyyatının inkişafına töhvə verilməsi deməkdir”
Məlum olduğu kimi, Prezident İlham Əliyev bu günlərdə “Azərxalça” ASC-nin İsmayıllı filialının açılışında iştirak edib. Prezident çıxışı zamanı qeyd edib ki, ölkədə 30 xalçaçılıq fabrikinin yaradılması nəzərdə tutulur: “Ölkəmizdə 30 xalçaçılıq fabriki yaradılacaq və minlərlə insan, xüsusilə qadınlar işlə təmin olunacaqlar. Bu fabriklərdə çalışanlar da qadınlardır. Biz qadınlar üçün də iş yerləri yaradırıq. Burada istehsal olunan, toxunan xalçalar həm ölkə daxilində, həm də xaricdə satılacaq və beləliklə, Azərbaycan öz ixrac məhsullarını dünyaya daha da geniş formada təqdim edəcəkdir. Xalçaçılıq sənətinin gələcəkdə yaşaması üçün sizin əməyiniz, zəhmətiniz, istedadınız əsas rol oynayır. Mənə verilən məlumata görə, bu fabrikdə 150-yə yaxın insan işlə təmin olunub. Gələcəkdə işlər yaxşı gedərsə, bu fabriki böyütmək də olar ki, bu işə daha çox qadın cəlb olunsun”.
İlin sonuna qədər 30 xalçaçılıq fabriki yaradılarsa, bu tək xalçaçılıq sahəsinə deyil, eyni zamanda, ölkə iqisadiyyatına da müsbət təsir göstərər. Həm iş yerlərinin sayı artar, həm də Azərbaycan istehsalı olan xalçalar xaricə ixrac olunar.
İqtisadçı ekspert Fikrət Yusifov “Bakı-Xəbər”ə açıqlamasında qeyd etdi ki, Azərbaycanda son illər xalçaçılığın inkişafına böyük önəm verilir: “ Elə bunun nəticəsidir ki, cari ilin fevral ayında Azərbaycan Respublikasında xalçaçılıq sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı qəbul edildi. Proqram ölkəmizdə qədim ənənələri olan bu sənətin bərpa edilməsi və onun müasir tələblər səviyyəsində yenidən təşkil edilməsini nəzərdə tutur. Yerlərdə yeni xalçaçılıq fabriklərinin açılışı bu qədim sənət növünün bərpa edilməsi ilə yanaşı, yeni iş yerlərinin yaradılması, bölgə iqtisadiyyatının inkişafına töhfə verilməsi deməkdir”.
Günel CƏLİLOVA
