Sevda Yaqubova: “Şellak, eləcə də digər dırnaq boyalarının qadınların səhhətində mənfi izlər buraxdığını mütəxəssislər dəfələrlə qeyd ediblər” Roza Yəhyayeva: “Qaynaq olunmuş dırnaqlar kimyəvi vasitədən hazırlandığından, əlin dərisi, barmaqlar və öz dırnaqlarınız üçün də çox təhlükəlidir”
Qadınlar gözəllik uğrunda həmişə mübarizə aparıblar. İllərin gətirdiyi yeni yaşlara psixoloji baxımdan çətinliklə adaptasiya olunan qadınlar gözəl qalmaq, illərə “qalib” gəlmək üçün bütün vasitələrdən istifadə etməkdə israrlıdırlar. Qadın gözəlliyini tamamlayan əsas elementlərdən biri gözəl əllər, baxımlı dırnaqlardır desək yəqin ki, bizə irad bildirən olmaz.
Əvvəllər qadınlar dırnaqlarını qaydasında saxlamaq üçün daha çox manikürdən istifadə edirdilərsə, indi başqa vasitələrdən yararlanırlar. Son illər dünyada dəb sisteminin kökündən dəyişməsi, yeni texnologiyaların, maddələrin meydana gəlməsi dırnağını daha gözəl və baxımlı görmək istəyən xanımların qarşısında yeni yollar açıb.
Bu gün ölkəmizdə fəaliyyət göstərən qadın gözəllik salonlarında, studiyalarda müxtəlif üsullarla qadınların əl və ayaq dırnaqlarına qulluq göstərilir. Hazırda dırnaq qaynağından, eləcə də onun digər növlərindən istifadə edən qadınların sayı durmadan artır. Belə demək mümkündürsə, 15 yaşdan 70-80 yaşa qədər qadınlar dırnaq qaynaqlarından, dırnaqlarını uzatmaq üçün şellakdan, biogeldən və s. istifadə edirlər.
Həkimlər, xüsusən də dermotoloji sahə üzrə mütəxəssislər qadınlara məsləhət görürlər ki, bu vasitələrdən istifadə etməsinlər. Dırnağı süni olaraq gözəlləşdirən vasitələr sonradan qadınların səhhətində müxtəlif mənfi hallar yaradırlar. Ekspertlər qeyd edirlər ki, bu, qadınların öz dırnaqlarının tamamilə məhv olmasına gətirib çıxarır. Yəni qadın salonda dırnağını biogel, yaxud şellak edirsə, sonradan öz dırnağını əvvəlki vəziyyətində görə bilmir. Bu gellər vurulursa, qadın dırnağı uzananda mütəxəssis müdaxiləsi olmadan o dırnaqları kəsə bilmir, bu da dırnaqlarda ağrılar yaradır, xüsusən də bir yerə toxunanda əziyyət çəkirlər.
Həkim Sevda Yaqubova bizimlə söhbətində bildirdi ki, bu gün əksər qadınlar kimi o da gel-lak tipli dırnaq boyalarından istifadə edir. O qeyd edir ki, dəblə ayaqlaşmaq üçün hər bir qadın çalışır ki, il ərzində bir neçə dəfə də olsa, bu məhsullardan istifadə etsin. Əslində, tibb işçilərinin, pasientlərlə çalışan insanların bu vasitələrdən istifadə etməsinin düzgün olmadığını vurğulayan həkimin sözlərinə görə, bununla belə, hər kəs bundan yararlanmaq istəyir. Onun sözlərinə görə, bu tip boyalar 3-4 həftə boyunca dırnağa yapışıb qalır, vaxt tamam olanda isə gel boya yenisi ilə əvəzlənir. Onun bildirdiyinə görə, boyadan imtina edəndə dırnaqlar sürətlə zəifləyib qırılmağa, parlaqlığını itirməyə başlayır: “Qadınlar baxımlı əllərə, gözəl dırnaqlara sahib olmaq üçün bu vasitələrdən istifadə edirlər. Dırnaqlarımıza gel boyaları çəkdiririk ki, əllərimiz daha şarmlı görsənsin. Amma bununla belə, deyim ki, gel boyaların mənfi tərəfləri çoxdur. Ümumiyyətlə, qadın gözəlliyinə xidmət edən hər bir texnoloji vasitə, maddələr onun səhhətinə zərər də yetirir. Dırnaqlarımızı mənfi təsirdən qorumağın yolları var. Hesab edirəm ki, bu istiqamətdə mütəxəssislər qadınlardan öz tövsiyələrini əsirgəməməlidirlər. Onu da deyim ki, gel öz-özünə quruya bilən boya deyil, onu mütləq ultrabənövşəyi şüaların altında qurutmaq lazımdır. Qurutma prosesi zamanı boya ilə sədəfin üst qatı bir-birinə qarışır və dırnaq tərkibini itirir. Bu da sözsüz ki, qadınlara ziyan vurur. Bəzən görürsən ki, ətrafımızda kimsə dırnağını geldən təmizlədir və onun dırnağının üzü soyulmuş vəziyyətdə olur, sanki cansız bir plastmas hissəciyinə çevrilir. Bundan ya ümumiyyətlə istifadə etmək lazım deyil, ya da zərərdən qorunmağın yollarını tapmaq tələb olunur. Şellak, eləcə də digər dırnaq boyalarının qadınların səhhətində mənfi izlər buraxdığını mütəxəssislər dəfələrlə qeyd ediblər”.
Dermotoloqların fikrincə, gel-boya və bu tip manikür növləri çox zərərlidir. İki dəfə ardıcıl gel, şellak və s. manikür prosesindən sonra dırnaqlar ən az 3 ay müddətində dincəlməlidir.
Onlar hesab edirlər ki, gel boyaların zərəri tək sədəfin tərkibinin itməsi ilə bitmir. Ekspertlər deyirlər ki, onu qurudan ultrabənövşəyi şüalar da dəriyə olduqca zərərlidir. Bu proses zamanı dərini qorumaq üçün xüsusi əlcəklərdən istifadə edilməlidir. Dermotoloqlar birmənalı olaraq bildirirlər ki, əllərində xal olanlar üçün ultrabənövşəyi şüalar böyük təhlükədir. Onlar qeyd edirlər ki, bu zaman şüalar yanmadan tutmuş, dəri xərçənginədək qorxunc xəstəliklərə səbəb ola bilər.
Həkim-dermatoloq Roza Yəhyayevanın sözlərinə görə, son zamanlar qadınlar müxtəlif nayihələrində baş verən qaşınma halları ilə bağlı müraciət edirlər. Mütəxəssis qeyd edir ki, çox zaman ultrabənövşəyi şüalar dəridə qıcıqlanmalar yaradır. O bildirdi ki, bu boyalar bir neçə qatdan ibarət olur. “Odur ki, dırnaq nəfəs almağa dəlik tapmır və get-gedə öz təravətini və gücünü tam itirir.
Bu boyaları dırnaqdan çıxarmaq üçün xüsusi alət və ya çox güclü tərkibli təmizləyici vasitədən istifadə olunur. Alət dırnaqları zədələyir. Folqa ilə dırnaqlara bərkidilən təmizləyici məhlul isə gel- boya və ya şellakı əridib qoparmaqla qalmır, öz zəhərini dırnağa buraxır. Bundan başqa, ultrabənövşəyi şüalar dəriyə zərər vurur. Əlində xalı olan qadınlar üçün isə bu daha çox təhlükəlidir. Dırnaq qaynağı etmək əksər müasir xanımlar üçün bu gün adi bir hala çevrilib. Gözəl, uzun, baxımlı dırnaqcıqlara sahib olmaq tələbatı nə qədər güclü olsa da, bu sahədə təhlükə də qaçılmazdır. Sağlamlığımızı süni gözəlliyə qurban verməyək” - deyə mütəxəssis bildirdi.
O qeyd etdi ki, bəzən qadınlar “dırnaq qaynağının ziyanı varmı” sualı ilə salonlarda bu işlə məşğul olanlara müraciət etdikdə onlar “yox” cavabı verirlər. “Halbuki, qaynaq olunmuş dırnaqlar kimyəvi vasitədən hazırlandığından, əlin dərisi, barmaqlar və öz dırnaqlarınız üçün də çox təhlükəlidir. Xüsusilə kimyəvi maddədən hazırlanmış, sərt qabıq şəklinə salınmış bu maddənin sizin dırnaqlarınızda qaynaq olunduqdan sonra neçə qün qalması önəmlidir. Adətən xanımlar belə manikürləri etdirən zaman hətta daha çox dayanıqlı olmasını tələb edirlər, bu prosesin sonradan hansı fəsadlar yarada biləcəyini düşünmürlər. Mütəxəssislər bu qaynaqların əleyhinədir. Ümumiyyətlə, uzun dirnaqların özü belə bir sıra hallarda zərərlidir. Dırnaqlarda C (sink), D (dəmir) azalması tez-tez sınma əmələ gəlir. Ən pis halda, dırnaqlarda infeksion göbələk xəstəliyinə səbəb olur” - deyə mütəxəssis bildirdi.
İradə SARIYEVA
