“Plan yerlərinin boş qalmasının səbəblərindən biri də ixtisas seçimi zamanı elektron kodlaşdırmanın səhv aparılması ilə bağlıdır”
Əhatə dairəsinə görə Azərbaycanda ən böyük imtahan prosesi olan bakalavr səviyyəsinə qəbul imtahanları artıq başa çatıb və nəticələrdə bəllidir.
Ali məktəblərə bakalavriat səviyyəsi üzrə yerləşdirmənin birinci mərhələsində plan yerləri üzrə müəyyən qədər yer boş qalıb. Dövlət İmtahan Mərkəzinin (DİM) Direktorlar Şurasının sədri Məleykə Abbaszadə media nümayəndələrinə açıqlamasında qeyd edib ki, ali məktəblərə bakalavriat səviyyəsi üzrə yerləşdirmənin birinci mərhələsində plan yerləri üzrə 5074-i, yəni 11 faiz yer boş qalıb.
M.Abbaszadənin sözlərinə görə, vakant yerlərə qəbul elanı artıq yayımlanıb. Vakant yerlər üçün sənəd qəbulu avqustun 20-dək aparılacaq.
Direktorlar Şurasının sədri qeyd edib ki, vakant yerlərin 3255-i dövlət ali məktəblərində, xüsusilə regionlardakı ali məktəblərdə, 1819-u özəl ali məktəblərdədir. Bütün aparıcı ali məktəblərdə qəbul olma faizi 90 faizdən çoxdur. 1-ci qrupda 1693, 2-ci qrupda 2611, 3-cü qrupda 248, 4-cü qrupda 122, 5-ci qrupda isə 400 yer boş qalıb.
M.Abbaszadə bildirib ki, 1-ci qrupda 540-dan çox bal toplayan heç bir abituriyent kənarda qalmayıb. 2-ci qrupda 490-dan yuxarı bal toplayanların, 3-cü qrupda 550-dən çox, 4-cü qrupda isə 610-dan yuxarı bal toplayanların hamısı ali məktəbə qəbul olub.
Universitetlərdə qəbulda plan yerlərinin nə səbəbdən 10 faiz qalmasının səbəbini öyrənmək məqsədilə təhsil eksperti Kamran Əsədova müraciət etdik. O, “Bakı-Xəbər”ə açıqlamasında qeyd etdi ki, bu il ali təhsil müəssisələrinə qəbulda 11 faizə yaxın yer boş qalıb: “Əsasən, 1 və 2-ci ixtisas qrupunda boş plan yeri üstünlük təşkil edir. Bakı Dövlət Universiteti, Memarlıq və İnşaat Universiteti və İqtisad Universitetində çoxlu sayda plan yeri boş qalıb.
İkinci ixtisas qrupunda plan yerlərinin boş qalmasının səbəbi müsabiqə şərtlərini ödəyən abituriyetlərin sayının az olması ilə bağlıdır. Müsabiqə şərtlərini ödəyən abituriyentlərin sayı plan yerlərinin sayından 4000-ə yaxın az idi. Məlumat üçün bildirim ki, 2-ci ixtisas qrupunda ən çox 3000-ə yaxın boş yer qalacaq”.
Həmsöhbətimiz onu da vurğuladı ki, plan yerlərinin boş qalmasının səbəblərindən biri də ixtisas seçimi zamanı elektron kodlaşdırmanı səhv aparılması ilə bağlıdır: “3-cü ixtisas qrupunda isə plan yeri az qalıb. Bu ixtisas qrupunda plan yerlərinin boş qalmasının səbəbi xarici dil tələbi ilə bağlıdır.
Eynilə, 4-cü ixtisas qrupunda da plan yeri az qalıb. Dördüncü ixtisas qrupunda cəmi 40 plan yeri boş qalıb. Əsasən, Naxçıvan və Lənkəran Dövlət və Qərb Universitetində boş plan yerləri qalıb”.
Günel CƏLİLOVA
