Fatimə Hacıbəyli: ” Əhalinin ictimai nəqliyyat vasitələrində gediş haqqının cüzi artırılmasına münasibətinin mənfi olmaması onu göstərir ki...”
Rufiz Qonaqov: ”Bu o deməkdir ki, Azərbaycan vətəndaşları dövlətin hər bir addımını təhlil edir, onun hansı zərurətdən atıldığını başa düşür və onu təqdir edirlər”
Məlum olduğu kimi, Tarif (qiymət) Şurasının qərarı ilə metro nəqliyyatında sərnişindaşıma xidmətinin tarifi 1 gediş üçün 30 qəpik, Bakı şəhərində, eləcə də digər şəhər və rayonlarda sərnişindaşıma xidməti tarifinin yuxarı həddi müntəzəm şəhərdaxili avtobus marşrutları üzrə 1 gediş üçün 30 qəpik, şəhərətrafı və qəsəbələrarası avtobus marşrutları üzrə məsafədən asılı olaraq 1 gediş üçün 30-90 qəpik, müntəzəm şəhərlərarası avtobus marşrutları üzrə 1 kilometr üçün 2,4 qəpik təsdiq edilib.
Avqustun 1-dən icra edilən qərara sərnişinlərin münasibəti necədir?
Şəhərdaxili, şəhərətrafı və qəsəbələrarası marşurut avtobuslarının qiymətinin artırlmasına sərnişinlərin rəyini öyrənmək məqsədilə bir neçə avtobusda sorğu keçirdik.
6,5, 88, 53, 205 saylı avtobuslarda apardığımız sorğu zamanı sərnişinlər bildirdilər ki, qiymət artımından narazı deyillər. Sərnişinlərin sözlərinə görə, bu gün “BakuBus”larda sərnişinlərin rahatlığı tam təmin olunub. Qiymət artımının cüzi olduğunu deyən sərnişinlərin bildirdiyinə görə, bu nəqliyyat vasitələrinin keyfiyyətli xidmət göstərməsinə səbəb olacaq. 88, 53 və 205 saylı avtobusların sərnişinləri arzu edir ki, bu nəqliyyat vasitələri də “BakuBus”la təmin edilsin. Onların sözlərinə görə, hazırda bu avtobuslarda sərinlik və digər komfort şərait yoxdur.
“Vəfa” Sosial İctimai Birliyinin sədri Fatimə Hacıbəyli bizimlə söhbətində qeyd etdi ki, ictimai nəqliyyat vasitələrində qiymət artımının baş verməsi sərnişinlərin büdcəsinə cüzi də olsa təsir etmir. Onun sözlərinə görə, sərnişinlərin qiymət artımını normal qarşılaması tam təbiidir. O bildirdi ki, sərnişinlər başqa ölkələrdə də olurlar və onlar həmin ölkələrdə gediş haqqının daha baha olduğunu müşahidə edirlər, bu səbəbdən də qiymət artımına mənfi yanaşmırlar:”Mən özüm də sərnişinlərlə söhbət edirəm. Hələ narazı olan insana rast gəlməmişəm. Hamı deyir ki, onsuz da marşurut avtobuslarında gediş haqqı cüzi qalxıb. Bu isə onların büdcəsinə qətiyyən mənfi təsir etmir. Əvvəl onlar 20 qəpik ödəyirdilər, avqustun 1-dən isə 30 qəpik ödəməyə başlayıblar. Əhalinin ictimai nəqliyyat vasitələrində gediş haqqının cüzi artırılmasına münasibətinin mənfi olmaması onu göstərir ki, vətəndaşlaımız dövlətimizin verdiyi qərarlara müsbət yanaşır. Sevindirici haldır ki, Azərbaycanda dövlət - vətəndaş həmrəyliyi mövcuddur. Onu da deyim ki, bundan sonra ictimai nəqliyyat vasitələri əhaliyə daha keyfiyyətli xidmət göstərəcək”.
Politoloq Rufiz Qonaqov da sərnişinlərin ictimai nəqliyyat vasitələrində cüzi qiymət artımına müsbət yanaşmasına münasibət bildirərək qeyd etdi ki, bu, sərnişinlərin dövlətin qərarına sayğı ilə yanaşmasından irəli gəlir. “Sizin apardığınız sorğu zamanı vətəndaşların dövlətin qərarına rəğbətlə yanaşması çox normal haldır. Bu o deməkdir ki, Azərbaycan vətəndaşları dövlətin hər bir addımını təhlil edir, onun hansı zərurətdən atıldığını başa düşür və onu təqdir edirlər. Bildiyimiz kimi, Tarif Şurası ictimai nəqliyyat vasitələrində qiymət artımını əsaslandırıb və qeyd ediblər ki, bu qərara qədər bizdə bu sahədə qiymət artımı olmayıb. Mənə belə gəlir ki, cüzi qiymət artımı vətəndaşlara elə də mənfi təsir göstərməyəcək. Dünyanın başqa ölkələrinə nəzər salsaq görərik ki, ictimai nəqliyyatın gediş qiymətləri daha bahadır”-deyə bildirən R.Qonaqov qeyd edir ki, qiymət artımından sonra ictimai nəqliyyat vasitələri əhaliyə daha keyfiyyətli xidmət göstərməlidir.
Politoloq hesab edir ki, bu sahədə keyfiyyət artımı olmalıdır:”Sözsüz ki, vaxtaşırı cənab Prezident də büdcə təşkilatından əməkhaqqı alanların maaşlarını qaldırır. Cüzi qiymət artımı keyfiyyətə təsir göstərməlidir ki, sərnişinlərin rahatlığı tam olaraq təmin edilsin”.
İradə SARIYEVA
