Niyaməddin Musayev: “Sözsüz ki, qiymət artımı səbəbsiz deyil, onun iqtisadi səbəbləri var” Naibə Allahverdiyeva: “Dövlətimizin qərarına hörmətlə yanaşıram və hesab edirəm ki, qiymət artımı zərurətdən baş verib” Simarə İmanova: “İctimai nəqliyyatda qiymətlərin qalxmasına normal yanaşıram”
Paytaxtda sərnişindaşımanın keyfiyyətinin artırılması, nəqliyyat sisteminin insanların tələbatını ödəməsi əsas məsələdir. Hər bir sərnişin arzu edir ki, onun rahatlığı təmin edilsin və mənzil başına maneəsiz çata bilsin. Şəhərimizin nəqliyyat sisteminin müasir standartlara uyğunlaşdırılması sahəsində işlər həyata keçirilir.
Sözsüz ki, son illər ölkəmizə gətirilən yeni tip sərnişindaşıma nəqliyyat vasitələri insanların rahatlığını təmin edir. Həm gündəlik istifadə etdiyimiz avtobuslarda, həm də metroda rahat gediş-gəliş təmin olunur. Çoxdandır əlaqədar qurumlarda şəhərdaxili sərnişindaşıma vasitələrinin gediş qiymətlərinin artırılması məsələsi müzakirə edilirdi. Artıq bildiyimiz kimi, Tarif (qiymət) Şurasının qərarı ilə metro nəqliyyatında sərnişindaşıma xidmətinin tarifi 1 gediş üçün 30 qəpik, Bakı şəhərində, eləcə də digər şəhər və rayonlarda sərnişindaşıma xidməti tarifinin yuxarı həddi müntəzəm şəhərdaxili avtobus marşrutları üzrə 1 gediş üçün 30 qəpik, şəhərətrafı və qəsəbələrarası avtobus marşrutları üzrə məsafədən asılı olaraq 1 gediş üçün 30-90 qəpik, müntəzəm şəhərlərarası avtobus marşrutları üzrə 1 kilometr üçün 2,4 qəpik təsdiq edilib.
Şəhərdaxili, şəhərətrafı və qəsəbədaxili avtobus marşrutlarının, eləcə də metro nəqliyyatında gediş haqlarının qaldırılmasını əlaqə saxladığımız sənət adamları normal qarşılayırlar. Sənət adamlarının sözlərinə görə, qonşu ölkələrlə müqayisədə Azərbaycanda metroda və avtobuslarda gediş haqqı ucuzdur. Onlar qeyd edirlər ki, qastrol səfərlərində olduqları bir sıra ölkələrdə avtobusların və metronun qiymətinin daha baha olduğunu müşahidə ediblər. Sənət adamları hesab edirlər ki, sərnişindaşımanın qiymətinin qalxması zərurətdir və buna hər bir vətəndaş normal yanaşmalıdır. Sənət adamlarının bildirdiyinə görə, ictimai nəqliyyatda gediş haqqının cüzi miqdarda artırılması normal haldır və bu həm sərnişindaşıma sahəsində çalşan insanların rifah halının yaxşılaşmasına səbəb olacaq, həm də yeni keyfiyyət standartlarının yaranmasına gətirib çıxaracaq.
Xalq artisti, tanınmış sənətkar Niyaməddin Musayev bizimlə söhbətində qeyd etdi ki, hər bir vətəndaş dövlətin qəbul etdiyi qərarlara hörmətlə yanaşmalıdır. N.Musayevin bildirdiyinə görə, nəqliyyatda gediş qiymətlərinin qaldırılmasının mütləq mənada iqtisadi səbəbləri var: “Bir sənətkar kimi dövlətin verdiyi qərarlara hər zaman hörmətlə yanaşıram. Nəqliyyat vasitələrində gediş qiymətlərinin artırılması əsassız deyil. Bu işlə məşğul olan dövlət qurumları ölçüb-biçib, xərcləri hesablayıb bu qənaətə gəliblər. Nəqliyyat vasitələrində gediş qiymətinin artırılması halını normal qarışılayıram. Görünür, buna zərurət yaranıb ki, qiymət artımı baş verib. Sözsüz ki, qiymət artımı səbəbsiz deyil, onun iqtisadi səbəbləri var. Sərnişindaşımanın keyfiyyətinin yüksəlməsi, eləcə də bu sahədə çalışan insanların normal əməkhaqqı ilə təmin olunmasında qiymət artımının müsbət rolu olacaq. Dövlətimizin hər bir qərarına hörmətlə yanaşmalıyıq”.
Azərbaycan Dövlət Gənc Tamaşaçılar Teatrının aktrisası, Xalq artisti Naibə Allahverdiyeva da nəqliyyatda gediş qiymətlərinin artmasına günün tələbi kimi yanaşdığını bildirdi. O hesab edir ki, buna zərurət olmasaydı, qiymətlər artırılmazdı: “Dövlətimizin qərarına hörmətlə yanaşıram və hesab edirəm ki, qiymət artımı zərurətdən baş verib. Yəqin qiymət artımına ehtiyac olub ki, qiymətlər qalxıb. Düşünürəm ki, hər kəs bunu normal qəbul etməlidir. Çünki başqa ölkələrdə sərnişindaşımada qiymətlər daha bahadır”.
Xalq artisti Simarə İmanovanın fikrincə də qiymətlərin artımına mənfi bir hal kimi yanaşmaq olmaz. “Bilirsiniz ki, hər kəs nəqliyyat vasitələrindən rahatlıqla, komfortlu şəraitdə istifadə etmək istəyir. Bu baxımdan, qiymət artımı normal qarşılanmalıdır. Qiymətlər artırsa, bu, zərurətdən irəli gəlir. Dünyada həmişə bahalaşma gedir. Azərbaycan da dünyanın bir parçasıdır və qiymətlər bazarın tələbinə uyğun olmalıdır. Odur ki, ictimai nəqliyyatda qiymətlərin qalxmasına normal yanaşıram.
Azərbaycan inkişaf edən, sabitliyin hökm sürdüyü, əminamanlığın mövcud olduğu bir ölkədir. Mən başqa ölkələrdə də oluram, heç yerdə belə şərait yoxdur” - deyə Xalq artisti bildirdi.
İradə SARIYEVA
