Samir Talıbov: “Öəmsöhbətimizlkəmizdə yay turizmi ilə yanaşı, qış turizm bazasının yaradılması Azərbaycana səfər edən turistlərin sayının artmasına səbəb olub”
Ölkəmizdə dincələn, respublikamızdan xoş təəssüratla ayrılan turistlərin sayı artmaqda davam edir. Azərbaycanda dincəlmək üçün yaradılan şərait ölkəmizə qonaq gələn turistləri valeh edir. Qəbuledilən proqramlar əsasında turizm sahəsində beynəlxalq standartlara cavab verən üç və beşulduzlu mehmanxanalar tikilir. Yeni turizm zonaları yaradılır. Bununla yanaşı, bir çox turizm mərkəzinin yaradılması və bərpası da nəzərdə tutulub.
Bəllidir ki, bu gün ölkəmizdə həm yay turizmi, həm qış turizmi ilə yanaşı, kənd turizmi, eləcə də sağlamlıq, mədəni turizm inkişaf dövrünü yaşayır. Görülən işlər sayəsində artıq Azərbaycan turizmi inkişaf dövrünü yaşayır.
2018-ci ilin yanvar-may ayları ərzində Azərbaycana dünyanın 184 ölkəsindən 1055,6 min və ya ötən ilin müvafiq dövrü ilə müqayisədə 10,1 faiz çox əcnəbi və vətəndaşlığı olmayan şəxslər gəlib. Açıqlanan statistik rəqəmlərə əsasən, 2018-ci ilin yanvar-iyun ayları ərzində Azərbaycana dünyanın 189 ölkəsindən 1325,0 min və ya ötən ilin müvafiq dövrü ilə müqayisədə 10,2 faiz çox əcnəbi və vətəndaşlığı olmayan şəxs gəlib.
Dövlət Statistika Komitəsinin yaydığı məlumatda qeyd olunur ki, ölkəmizə gələnlərin 29,3 faizi Rusiya, 22 faizi Gürcüstan, 12,1 faizi İran, 11,3 faizi Türkiyə, 4,0 faizi Birləşmiş Ərəb Əmirlikləri, 2 faizi Ukrayna, 1,8 faizi İraq, 17,4 faizi digər ölkələrin vətəndaşları, 0,1 faizi isə vətəndaşlığı olmayan şəxslər olub.
Gələnlərin 67,8 faizini kişilər, 32,2 faizini isə qadınlar təşkil edib. Əcnəbi və vətəndaşlığı olmayan şəxslərin 17,6 faizi yanvar, 15,8 faizi fevral, 26,2 faizi mart, 20,7 faizi aprel, 19,7 faizi isə may ayında ölkəyə gəlib.
Son bir il ərzində ölkəmizə gələn turistlərin 10 faiz artmasının gözlənilən olduğunu ekspertlər də təsdiqləyirlər.
Turizm sahəsi üzrə ekspert Samir Talıbov bizimlə söhbətində qeyd etdi ki, son illər ölkəmizə dünyanın müxtəlif ölkələrindən gələn turistlərin sayı artır: “Statistik rəqəmlər və müşahidələr artımın baş verdiyini təsdiqləyir. Turistlərin sayının artması səbəblərindən biri də Azərbaycanda tez-tez baş tutan müxtəlif səpkili beynəlxalq tədbirlərdir. Ölkədə keçirilən beynəlxalq tədbirlər, festivallar, idman yarışları Azərbaycana gələn qonaqların sayının daha da artmasına şərait yaradır. Bu mənada həmin məqsədlə ölkəmizə gələn qonaqlar da beynəlxalq miqyasda Azərbaycanın imici, nüfuzu və adının formalaşmasında mühüm rol oynayırlar. Turizmin inkişafı yolunda atılan ən güclü reklam da məhz budur. Bu səbəbdən ölkəmizə gələn turistlərin sayı artıb və həmin tendensiya davam edəcək”.
Həmsöhbətimiz onu da vurğuladı ki, əmsöhbətimizölkəmizdə yay turizmi ilə yanaşı, qış turizm bazasının yaradılması Azərbaycana səfər edən turistlərin sayının artmasına səbəb olub: “Turizm sahəsində məqsədli şəkildə həyata keçirilən layihələr qış turizminin inkişafına da yeni yollar açıb. Bəllidir ki, Şahdağ Qış-Yay Turizm Kompleksinin yaradılması Azərbaycanın qış turizminin inkişafında uğurlara səbəb olub”.
S.Talıbovun sözlərinə görə, sağlamlıq turizminin inkişafı turistləri ölkəmizi seçməyə vadar edir: “Azərbaycanı dünyada turizm üçün səciyyəvi edən xüsusiyyətlərdən biri də sağlamlıq-müalicə turizminin olmasıdır. Ölkəmizdə bu sahənin bütün istiqamətlərinin inkişafı üçün lazım olan təbii şərait mövcuddur. Sağlamlıq turizmi Azərbaycanın brendi kimi təqdim olunur. Dünyada analoqu olmayan Naftalanın müalicəvi nefti, Naxçıvanın duz mağaraları, Abşeron göllərinin müalicəvi palçıqları və suları, Lənkəranın, Gədəbəyin mineral suları və s. bunun əyani nümunəsidir. Məlumat üçün bildirim ki, təkcə ötən il Naftalana dünyanın 75-dək ölkəsindən 35 mindən çox turist gəlib. Analoji vəziyyət digər sağlamlıq turizm məkanlarında da yaşanır”.
Günel CƏLİLOVA
