Azər Allahverənov: “Artan qiymət infrastruktur yenilənməsi, keyfiyyət artımına yönələcək və bu da vətəndaşlar tərəfindən rəğbətlə qarşılanacaq”
Məlum olduğu kimi, Tarif Şurası Azərbaycanda bir sıra nəqliyyat xidmətlərinin qiymətinin tənzimlənməsinə dair qərar qəbul edib. Belə ki, Şuranın iclasında ictimai nəqliyyatda sərnişindaşıma xidmətləri üzrə yeni tariflər təsdiq edilib.
Qərara əsasən, metro nəqliyyatında sərnişindaşıma xidmətinin tarifi 1 gediş üçün 30 qəpik, Bakı şəhərində, eləcə də digər şəhər və rayonlarda sərnişindaşıma xidməti tarifinin yuxarı həddi müntəzəm şəhərdaxili avtobus marşrutları üzrə 1 gediş üçün 30 qəpik, şəhərətrafı və qəsəbələrarası avtobus marşrutları üzrə məsafədən asılı olaraq 1 gediş üçün 30-90 qəpik, müntəzəm şəhərlərarası avtobus marşrutları üzrə 1 kilometr üçün 2,4 qəpik təsdiq edilib.
Məlumatda qeyd olunur ki, qiymətlərin artırılmasında ötən müddət ərzində ictimai nəqliyyatda sərnişindaşıma xidməti üzrə xərclərin artması, avtobus parkının yenilənməsi və istismara saz vəziyyətdə saxlanması üçün nəqliyyat vasitələrinin və ehtiyat hissələrinin xarici valyuta ilə idxal edilməsi, xidmət səviyyəsinin davamlı olaraq yüksəldilməsi, nağdsız ödəniş sisteminin tətbiqinin genişləndirilməsi, metro nəqliyyatı üzrə dövlət büdcəsindən asılılığın azaldılması və s. amillər nəzərə alınıb. O da qeyd olunur ki, tarif dəyişikliyi nəqliyyat infrastrukturunun daha da təkmilləşdirilməsi istiqamətində tədbirlərin sürətləndirilməsi və onun maliyyə təminatının yaxşılaşdırılmasına müsbət təsir göstərəcək.
Maraqlıdılr, ictimai nəqliyyatda qiymətlərin artırılması perspektivdə bu sahədə keyfiyyətin artmasına, sərnişinlərə göstərilən xidmət səviyyəsinin yüksəlməsinə necə təsir göstərəcək?
Sözügedən məsələni dəyərləndirən nəqliyyat sahəsi üzrə ekspert Azər Allahverənovun fikrincə, qərar bu sahədə xidmətin keyfiyyətinin artmasına səbəb olacaq: “Nəqliyyat sahəsində qiymət artımı gözlənilən idi, uzun müddətdir bu mövzuda müzakirələr aparılırdı. Son bir neçə ildir bu məsələ gündəmdə saxlanırdı. Məsələ ondadır ki, bir neçə il əvvəl yanacağın qiymətində artım oldu, həmin ərəfədə ictimai nəqliyyatda qiymət artımı gözlənilən idi, lakin bu baş vermədi. Bununla yanaşı, Bakıətrafı qəsəbələrdə fəaliyyət göstərən marşrut avtobusları rentabelli işləmədiyinə görə sahibkarlar nəqliyyat parkını yeniləyə bilmirdilər. Bu da insanların narazılığına səbəb olurdu. Həmçinin, uzun illərdir Bakı Metropoliteni subsidiya ilə işləyir. Düzdür, dünyanın heç bir ölkəsində metro rentabelli işləmir, dövlət tərəfindən buna dəstək göstərilir. Uzun illərdir Azərbaycanda Metropolitenin fəaliyyəti dövlət tərəfindən ayrılan subsidiya hesabına həyata keçirilir. Bununla yanaşı, Metropoliten infrastrukturu genişlənir, böyük məbləğdə sərmayə yatırılır, yeni qatarlar alınır. Bunun üçün də lazım olan böyük miqdarda vəsait dövlət hesabına təmin edilir. Dövlətin bu yükü daşımağa gücü çatsa da, müəyyən xidmətlər var ki, onlar əldə olunan gəlir hesabına da təmin edilə bilər. Ümid edirəm ki, qiymət artımından əldə olunan vəsaitin müəyyən hissəsi nəqliyyat sahəsində infrastrukturun yenilənməsinə yönələcək. Nəticədə bu, xidmətin keyfiyyətinin artmasına səbəb olacaq. Yəni vətəndaş artıq pul ödəməyə hazırdır, təki göstərilən xidmətin keyfiyyəti yaxşı olsun. Yüksək keyfiyyət müqabilində müəyyən qədər məsrəf etmək mümkündür. Düşünürəm ki, belə də olacaq. Artan qiymət infrastruktur yenilənməsi, keyfiyyət artımına yönələcək və bu da vətəndaşlar tərəfindən rəğbətlə qarşılanacaq. On qəpik elə də böyük rəqəm hesab edilməyə bilər, lakin gün ərzində bu sektordan istifadə edənlərin sayını nəzərə alsaq, sonda ciddi bir rəqəm əldə edilir”.
Vidadi ORDAHALLI
