Eyyub Hüseynov: “İctimai qınaq olarsa, bu sahədə vəziyyət müsbətə doğru dəyişər”
“İctimai iaşə obyektləri, şadlıq evləri, restoranlar tərəfindən atmosferə atılan tüstü axınına görə ETSN-in obyekt sahiblərinə müasir standartlara cavab verən təmizləyici qurğuların quraşdırılması barədə bir müddət əvvəl etdiyi xəbərdarlığın müddəti başa çatdığından, yaxın günlərdə xəbərdarlığa əməl etməyən və yenə də atmosferi çirkləndirən restoran və şadlıq sarayları barəsində qəti tədbirlərin görülməsinə və sanksiyaların tətbiqinə başlanacaq”.
Bunu bir neçə gün öncə keçirilən mətbuat konfransında Ekologiya və Təbii Sərvətlər Nazirliyinin mətbuat katibi İradə İbrahimova deyib. O bildirib ki, nazirlik bir müddət əvvəl ictimai iaşə obyektləri, şadlıq evləri, restoran sahiblərinə xəbərdarlıq etmişdi: “Xəbərdarlıqda atmosferə atılan tüstü axınına görə obyekt sahiblərinə müasir standartlara cavab verən təmizləyici qurğuların quraşdırılması üçün vaxt verilmişdi. Xəbərdarlığın müddəti başa çatdığından, yaxın günlərdə xəbərdarlığa əməl etməyən və yenə də atmosferi çirkləndirən “Xəmsə”, “Oskar”, “Oazis”, “Millenium”, “Sonalar sonası”, “Xan qızı”, “Dan ulduzu” və digər restoran, şadlıq sarayları barəsində qəti tədbirlərin görülməsinə və sanksiyaların tətbiqinə başlanacaq”.
Ekspertlər də atmosferi çirkləndirən iaşə obyektlərinin sərt şəkildə cəzalandırılmasının tərəfdarıdırlar.
Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında qeyd etdi ki, havanı çirkləndirən restoran və şadlıq evlərinə qarşı cərimələr tətbiq olunması əhəmiyyətlidir: “Rəhbərlik etdiyim birlik Ekologiya və Təbii Sərvətlər Nazirliyində ictimai şuranın üzvü olaraq bu məsələni gündəliyə çıxaracaq. Atmosferi çirkləndirən restoranların bəlli olmasında və cəzalandırılmasında ictimaiyyətin rolu mütləq təmin olunmalıdır. Bu məsələ ilə bağlı əhalinin böyük narazılığı var. Yeni tikilən binaların və yaşayış evlərinin yaxınlığında olan şadlıq evləri ilə bağlı problem yaşanır. Danılmaz faktdır ki, iaşə obyektlərinin ətrafı çirkləndirməsi geniş yayılıb. İaşə obyektləri ilə bağlı bələdiyyələr məşğul olmalı idi. Bu məsələyə ictimaiyyət böyük dəstək verməli idi”.
E.Hüseynov hesab edir ki, restoranların cərimələnməsi zamanı müəyyən problemlər yaşana bilər: “Havanı çirkləndirən iaşə obyektlərinə qarşı maliyyə sanksiyası tətbiq oluna bilər. Yaxşı olar ki, atmosferi çirkləndirən restoran və ya şadlıq evlərinin adı tam şəkildə ictimaiyyətə açıqlansın. Əhali həmin məkanlarda hər hansı bir məclis təşkil etməsin. İctimai qınaq olarsa, bu sahədə vəziyyət müsbətə doğru dəyişər”.
Günel CƏLİLOVA
