Qusar Rayon Polis Şöbəsinin binasının foyesində şəhid əməkdaşlarımızın xatirəsinə güşə yaradılıb. Onlar arasında Vətənin bütövlüyünün qorunması yolunda canını belə əsirgəməyən igid polislərimizdən biri olan Sərdar Səfərov da var.
Sərdar Mədət oğlu Səfərov 1960-cı ildə Kəlbəcər rayonunda doğulub. Orta məktəbi bitirdikdən sonra sovet ordusu sıralarında xidmət edib. Ordudan tərxis olunduqdan sonra bir müddət Bakıda Maşınqayırma Zavodunda işləyib. Daha sonra daxili işlər orqanlarında xidmət etmək üçün Tula şəhərinə yollanıb. Üç il bu şəhərdə milis nəfəri kimi çalışdıqdan sonra nümunəvi xidməti nəzərə alınaraq rəhbərlik tərəfindən SSRİ Daxili İşlər Nazirliyinin Kaunas Ali Milis Məktəbinə göndərilib. Sərdar zabit kimi bir müddət Tulada xidmətini davam etdirib.
Qarabağ müharibəsi başlayanda vətənə qayıdıb Qusar Rayon Daxili İşlər Şöbəsində xidmətini davam etdirən Sərdar könüllü olaraq Qarabağa, döyüşlərə yollanıb. Torpağ uğrunda gedən döyüşlərdə mərdliklə vuruşan mərd vətən oğlu 1991-ci ilin sentyabr ayında Xankəndi yaxınlığında erməni silahlılarının azərbaycanlılara məxsus sərnişin avtobusuna hücum etmələri barədə xəbər eşidən Sərdar və bir neçə azərbaycanlı özlərini köməyə yetirir. Hücumun qarşısını alan polislərimiz hadisə yerindən uzaqlaşarkən əlavə qüvvələrlə geri dönən ermənilər tərəfindən hücuma məruz qalır. Qeyri-bərabər döyüşdə Sərdar yoldaşlarını xilas etsə də, özüqəhrəmancasına həlak olur...
Azərbaycan Resublikasının Milli Qəhrəmanı Sərdar Mədət oğlu Səfərovun xatirəsi daim əziz tutulur. Qusar rayonunda şəhid polisimizin adı verilmiş küçədə onun büstü qoyulub. Azərbaycanın Milli Qəhrəmanı Sərdar Səfərovun büstü xidmət yoldaşları tərəfindən ziyarət edilir, önünə əklil və gül dəstələri düzülür.
Nizam HƏMİDOV DİN Mətbuat Xidmətinin əməkdaşı
