Günün ikinci yarısından bakalavr təhsili üzrə ixtisas seçimi başlayacaq və bizim saytımızda aktiv olacaq. Trend-in məlumatına görə, bunu Dövlət İmtahan Mərkəzinin Direktorlar Şurasının sədri Məleykə Abbaszadə bu gün keçirilən mətbuat konfransında deyib.
O qeyd edib ki, ixtisas seçimi avqustun 13-ə qədər davam edəcək və ixtisas seçimində 91 498 nəfər iştirak edəcək.
M.Abbaszadə bildirib ki, bu il bakalavr təhsili üzrə qəbul imtahanlarında 74 438 nəfər iştirak edib.
Sədrin sözlərinə görə, orta ixtisas üzrə qabiliyyət imtahanları avqustun 9-a qədər davam edir. Şura sədri vurğulayıb ki, qeydiyyatdan keçən 8 277 nəfərdisə, 14 015 nəfər komissiyada iştirak edəcək: "Yəni bu fərq ona görə yaranıb ki, bir nəfər bir neçə komissiyada qabiliyyət imtahanında iştirak edəcək. Bundan başqa, hər bir şəxs iki imtahanda iştirak edibsə, iki nəticəsi var və ən yüksək nəticə ilə iştirak edəcək".
Çox təəssüflər olsun ki, ali məktəbə ixtisas seçimi zamanı abituriyentlər və onların valideynləri kimlərəsə müraciət edirlər. Bunu da Məleykə Abbaszadə deyib.
M.Abbaszadə bildirib ki, DİM öz işini tam şəffaf şəkildə aparır, sualların cavablarını ictimai ekspertizaya verir: “Lakin təəssüflər olsun ki, abituriyentlər və valideynlər DİM-in materiallarından istifadə etmir, öz uşaqlarının taleyini kiməsə həvalə edir və nəticədə abituriyent istəmədiyi ixtisasa, istəmədiyi yerə qəbul olunur. İxtisas seçimini ancaq özü etməlidir, kiməsə həvalə etməməlidir. Burada tələsmək lazım deyil. Abituriyent öz topladığı balı, seçdiyi ixtisas üzrə keçid balını müqayisə edib düzgün seçim etməlidir”.
