Aytəkin Kamranqızı: “Kimyəvi və insan sağlamlığına zərərli boyalarla da hepatit B və digər viruslara yoluxmaq mümkündür”
Bu gün bütün dünyada hepatit viruslarına qarşı profilaktik tədbirlər gücləndirilmiş formada aparılır. Ancaq buna baxmayaraq, qeyd olunan xəstəlikdən əziyyət çəkənlərin sayı artmaqda davam edir. Təəssüf ki, bu hal ölkəmizdə də yaşanır.
Elmi-Tədqiqat Ağciyər Xəstəlikləri İnstitutunun direktoru Həqiqət Qədirova media nümayəndələrinə açıqlamasında qeyd edib ki, son illər tatu və pirsinqdən istifadə edən insanların sayı artıb. Bu da B viruslu hepatit xəstələrinin sayının artmasına öz təsirini göstərir: “Viruslu hepatitlərin insan orqanizmində yoluxması baş verdikdən sonra ağır fəsadların olması qaçılmazdır. Hepatit A xroniki hala çox nadir hallarda keçir. Bu da adətən uşaqlar arasında qeydə alınır. B viruslu hepatit 10 faiz halda xroniki hala keçir. Hepatit C isə 50 faizdən çox halda xroniki olur. Buna insanlar hətta "mülayim qatil" deyirlər. Çünki uzun müddət ərzində özünü büruzə vermir. Bu virusdan əziyyət çəkən 5-15 faiz insanlarda xərçəng yaranır.
B viruslu hepatitlər insan orqanizmində qaraciyərə daxil olursa, ömürlük insan orqanizmində qalır. Bu gün tibb elmində hələ ki, tam müalicə üsulları yoxdur. Ona görə də xəstəliyin qarşısı mütləq vaxtında alınmalıdır. A viruslu hepatit adətən natəmiz şəraitdən keçir. İlk olaraq sanitar-gigiyenik normalara düzgün riayət etmək lazımdır. B,C, D viruslarının qarşısını almaq üçün qan verən insanların sağlamlığı yoxlanılmalı, tibbi avadanlıqların sterilizə olunmasına ciddi fikir verilməlidir. Digər tərəfdən, cinsi yolla yoluxmamaq üçün diqqətli olmaq lazımdır".
Ekspertlər də tatu və ya pirsinq vasitəsilə hepatit virusunun keçdiyini bildirirlər.
Sosioloq Aytəkin Kamranqızı bizimlə söhbətində qeyd etdi ki, hepatit B və C qan vasitəsilə yoluxur və onların müalicəsi daha çətindir. Dünya üzrə 200 milyondan çox xəstənin hepatit C ilə yoluxduğu aşkar edilib: “Digər hepatitlərdə olduğu kimi, hepatit C-də həm parental-venadaxili infuziya yolu ilə, həm də qeyri-parental - cinsi yolla yoluxma, transplasentar – anadan körpəyə yoluxma yolu ilə keçə bilər. Hepatit B-yə, həmçinin, xəstəxanalarda və stomatoloji kabinetlərdə yoluxmaq mümkündür. Hepatit B orqanizmə düşdükdən sonra 6 ay ərzində özünü heç bir simptomla büruzə vermir. Buna inkubasiya dövrü deyilir. Lakin bu müddət ərzində bu insan digərləri virusa yoluxdura bilər”.
Həmsöhbətimizin sözlərinə görə, tatu və pirsinq hepatit xəstəliyinə səbəb olur: “Bəziləri deyirlər ki, müvəqqəti döymə ilə hepatit virusuna tutulmur. Ancaq bu düzgün deyil. Müvəqqəti döymələr belə ciddi xəstəliklərə səbəb ola bilir. Kimyəvi və insan sağlamlığına zərərli boyalarla da hepatit B və digər viruslara yoluxmaq mümkündür. Bu tip viruslara tək tatu və pirsinq vasitəsilə deyil, eyni zamanda, gözəllik salonlarında yoluxmaq olar. Nəzərinizə çatıdırım ki, bu gün əksər gözəllik salonlarında pirsinq və ya döymə edilir. Təbii ki, gözəllik salonunda gigiyenik qaydalara riayət olunmur”.
A.Kamranqızı onu da bildirdi ki, kəskin hepatit B virusu 80 faiz halda sağalma ilə nəticələnir.
Günel CƏLİLOVA
