Rauf Zeyni: “Bu amildən çox məharətlə istifadə edib bizə əlavə zərbələr vura bilərlər”
Azərbaycan son illər xeyli sayda beynəlxalq tədbirlərə evsahibliyi edib. Bu tədbirlər ictimai-siyasi, humanitar sahələrlə yanaşı, mədəniyyət sahəsini də əhatə edir. Ölkəmizdə təşkil olunan musiqi festivalları içərisində artıq bir neçə ildir ardıcıl olaraq keçirilən “Jara” musiqi festivalı incəsənət nümayəndələrinin və tamaşaçıların diqqətini cəlb edir.
Tanınmış rusiyalı müğənni Zaranın festivala qatılacağı ilə bağlı yayılan xəbərlər “Jara”ya diqqəti daha çox cəlb etdi.
Bir neçə gündür müəyyən dairələrin dəstəyi ilə sosial şəbəkələrdə onunla bağlı kampaniya təşkil olunub və hazırda da bu təbliğat davam etdirilir. Sosial şəbəkələrdə Zaranın Azərbaycana gəlməsinə etiraz edənlərin əsas iddiası onun milliyyətcə erməni olması ilə bağlıdır.
Qeyd edək ki, Azərbaycan bütün dünyada müxtəlif xalqların sülh və qarşılıqlı anlaşma şəraitində yaşadığı, tolerant, bütün dini və milli azadlıqların təmin edildiyi ölkə imicinə malikdir. Ölkəmiz bütün dünyada dünyəvi dəyərlərin qorunduğu, humanizm prinsiplərinin yüksək tutulduğu bir dövlət kimi hörmətlə qəbul edilir. Bu, Azərbaycanın münaqişədə olduğu Ermənistanla müqayisədə tolerant bir ölkə olduğunu dünyaya tanıtmaqda mühüm amildir. Biz bütün dünyaya göstəririk ki, münaqişə üzündən Ermənistanda bir nəfər azərbaycanlı qalmadığı və ümumiyətlə, monoetnik ölkəyə çevrildiyi halda, ölkəmizdə 30 min erməni əsilli vətəndaş yaşayır (Dağlıq Qarabağ istisna olmaqla – red.). Azərbaycan ermənilərin separat davranışlarına baxmayaraq, öz daxilində onlara qarşı milli ayrıseçkilik yaratmır.
Bununla da isbat edilir ki, Azərbaycanın torpaqlarının işğalında iştirakçı olmayan, Azərbaycan xalqına qarşı cinayət törətməyən, dinc həyat tərzi sürən hər hansı şəxsin, erməni əsilli olsa da, ölkəmizə gəlməsi qadağan edilə bilməz. Bütün bu faktorlar Azərbaycanın tolerant, Ermənistanın isə monoetnik ölkə kimi səciyyələndirilməsi baxımından hansı əhəmiyyətə malikdir?
Milli Qeyri-Hökumət Forumunun prezidenti Rauf Zeyni qəzetimizə açıqlamasında bildirdi ki, Azərbaycanın yürütdüyü tolerant siyasəti izah etməyə elə də böyük ehtiyac yoxdur: “Bu hamının gözünün qabağındadır. Ermənistanın isə monoetnik ölkə olduğuna kiminsə şübhəsi ola bilməz. Hətta oradakı vəziyyət monoetniklik əmzasını da aşıb. Çünki artıq Ermənistan kastalara bölünüb və nisbətən aşağı zümrənin təmsilçiləri həmin ölkəni sürətlə tərk edirlər. Bu baxımdan da biz dünyaya təqdimat baxımından onlardan irəlidə olduğumuz estafetdəki inisiativi həmin ölkəyə verməməliyik. Əvvəla mən Emin Ağalarova minnətdarlıq edirəm ki, o, belə bir festival keçirir. Çünki artıq ənənə halını alan həmin festivalda Rusiyanın tanınmış sənətçiləri iştirak edirlər. Bu, ölkəmizin təbliği baxımından çox önəmlidir. Fakt budur ki, Azərbaycanda müxtəlif millətlər yaşayır, o cümlədən ermənilər də. Azərbaycanın icazəsi ilə keçirilən festivallarda iştirak edən müğənnilərlə bağlı qadağanın qoyulmasının tərəfdarı deyiləm. Çünki bu amildən çox məharətlə istifadə edib bizə əlavə zərbələr vura bilərlər. Əgər tədbirdə iştirak edənlərin içində nə vaxtsa Azərbaycanla bağlı, xüsusən də Dağlıq Qarabağ probleminin mahiyyətini dərk etmədən hansısa məsuliyyətsiz bəyanatlar səsləndirənlər olubsa, bu festival da onlar üçün gözəl şansdır ki, səhvlərini düzəltsinlər. Tərkibdə belə bir müğənni varsa, Emin Ağalarov bu gözəl imkanı onlara verib. Oxuyub, oynadıqdan sonra mikrafonu əllərinə alıb əvvəl buraxdıqları səhvlərə görə üzr istəsinlər”.
Məhəmmədəli QƏRİBLİ
