Nəsimi rayon İcra Hakimiyyətinin təşkilatçılığı ilə ölkəmizdə sahibkarlığın inkişaf etdirilməsi, əhalinin məşğulluq səviyyəsinin artırılması, yeni iş yerlərinin açılması ilə bağlı görülən işlərlə gənclərin daha yaxından tanış olması məqsədilə rayonun bir qrup fəal gənci “Bakı Tikiş Evi” ATSC-də olaraq, yeni açılmış iş yerləri və burada çalışan işçilərin iş şəraiti ilə yaxından tanış olub.
Nəsimi Rayon İcra Hakimiyyətinin İctimaiyyətlə əlaqələr şöbəsindən “Bakı Xəbər”ə verilən məlumata görə, “Bakı Tikiş Evi” ATSC-nin sədri Fidail Rəhimov çıxış edərək, böyük iqtisadi göstəricilərə malik fabrikin 1936-cı ildən fəaliyyətə başladığını, müəssisənin II Dünya Müharibəsi dövründə ölkənin qabaqcıl müəssisələrindən biri olaraq fəaliyyət göstərdiyini, Respublikamızın müstəqilliyinin ilk illərində iri sənaye müəssisəsi kimi ölkə əhalisini geyim məhsulları ilə təmin etdiyini bildirib.
Daha sonra gənclərin Heydər Əliyev Fondunun layihəsi olan Zirə Mədəniyyət Mərkəzi və Eko-Parka ekskursiyası təşkil olunub. Rayon gəncləri Zirə Mədəniyyət Mərkəzinin Qalereya – yaşıllıq ərazisi, Fotostudiya, Art-studiya, Elektron kitabxana, IDEA resurs mərkəzi, Şahmat otağı, Xarici dil kabineti (ingilis, fransız və rus dilləri), Moda studiya, Gimnastika və rəqs zalı, Zirə Xalça Muzeyi və Xalçaçılıq Tədris Mərkəzi ilə yaxından tanış olublar. Eko Parkda Heydər Əliyev Fondunun vitse–prezidenti Leyla Əliyevanın müəllifi olduğu Həyat abidəsi - “Ürək” abidəsi gənclərin böyük marağına səbəb olub.
Daha sonra Orxideya zalında gənclərin Nəsimi rayon sahibkarları ilə görüşü keçirilib. Görüşdə Nəsimi rayon İcra Hakimiyyəti başçısının birinci müavini Gülarə Verdiyeva çıxış edərək bildirib ki, Nəsimi rayon İcra Hakimiyyəti tərəfindən rayonda sağlam biznes mühitinin formalaşdırılması, investisiyaların cəlb edilməsi, kiçik və orta sahibkarlığın inkişafı və əhalinin işgüzarlıq fəaliyyətinin artırılması üçün münbit şəraitin yaradılması, yerli infrastruktur layihələrin icra olunması, yeni istehsal və emal müəssisələrinin açılması, məşğulluq səviyyəsinin artırılması və əhalinin maddi rifahının yüksəldilməsi istiqamətində işlər uğurla davam etdirilir. G.Verdiyeva rayonda həyata keçirilən layihələr və gələcəkdə nəzərdə tutulan işlər barədə də tədbir iştirakçılarına geniş məlumat verib.
Tədbirdə "İnturavto" ASC-nin sədri Aydın Heydərov və Azərbaycan Respublikası "Sənayeavtomatika" İstehsalat Birliyinin baş direktoru Natiq Cavadov çıxış edərək, ölkəmizdə iş adamlarına göstərilən dövlət dəstəyinin, sahibkarlığın inkişafına yaradılan münbit şəraitin əhəmiyyətindən danışıb, Nəsimi rayonu ərazisində sahibkarların fəaliyyəti üçün mövcud olan əlverişli şəraitin investisiya qoyuluşu üçün geniş stimul yaratdığını deyib və bütün bunlara görə Prezidentə minnətdarlıqlarını bildirib.
Tədbirin sonunda gəncləri maraqlandıran suallar çavablandırılıb və xatirə şəkilləri çəkilib.
Baki-xeber.com
