Şəmsəddin Əliyev: “Bu gün cinayətlərin açılma faizinə görə MDB ölkələri arasında Azərbaycan öncül yerlərdən birini tutur”
Məlum olduğu kimi, Bakı Şəhər Prokurorluğunda mərkəzi aparatın və ərazi rayon prokurorluqları əməkdaşlarının iştirakı ilə bu ilin birinci yarımilliyində cinayətkarlığa qarşı mübarizə, qanunçuluq və hüquq qaydasının möhkəmləndirilməsi, insan və vətəndaş hüquq və azadlıqlarının qorunması sahəsində görülmüş işlərin vəziyyəti və qarşıda duran vəzifələrin müzakirəsinə həsr olunmuş geniş əməliyyat müşavirəsi keçirilib.
Müşavirədə hesabat dövründə şəhərin prokurorluq orqanları tərəfindən cinayətkarlığa və hüquq pozuntularına qarşı mübarizə sahəsində paytaxtın digər hüquq-mühafizə orqanları ilə əlaqəli şəkildə fəaliyyət göstərərək bir çox nailiyyətlərin əldə olunduğu qeyd olunub.
O cümlədən, bildirilib ki, hesabat dövründə şəhər ərazisində 5854 cinayət hadisəsi qeydə alınıb, ötən ilin müvafiq dövrü ilə müqayisədə prokurorluq və daxili işlər orqanları üzrə qeydə alınmış cinayətlərin açılma faizi 2,2 faiz artaraq 82,1 faiz, ağır və xüsusilə ağır cinayətlərin sayı 412 hadisə və ya 38,5 faiz azalaraq 658 olub.
Ötən illə müqayisədə törədilən ağır cinayətlərin sayının azalması barədə “Polisə Dəstək” İctimai Birliyinin rəhbəri Şəmsəddin Əliyevin fikirlərini öyrəndik. O, “Bakı-Xəbər”ə açıqlamasında qeyd etdi ki, cəmiyyət hər gün dinamik inkişafda olduğu üçün yeni növ cinayətlərin törədilməsi mümkündür. Süjet baxımından da tərkibin dəyişilməsi də mümkündür. Cəmiyyətin inkişaf dinamikasında yeni cinayət növləri ortaya çıxa bilər. İnkişaf etmiş ölkələrdə belə cinayət hadisələri baş verir. Ancaq son zamanlar ölkədə aparılan iqtisadi-sosial islahatlar, cinayətkarlıqla mübarizədə dövlət siyasətinin formalaşdırılmasında hüquq-mühafizə orqanlarının, aidiyyəti qurumların fəal iştirakı və həmin dövlət siyasətini həyata keçirən qurumların çevik reaksiyası nəticəsində ağır cinayətlərin qarşısı alınır. Bu gün cinayətlərin açılma faizinə görə MDB ölkələri arasında Azərbaycan öncül yerlərdən birini tutur. Statistik rəqəmlərə əsasən, 26 min cinayət qeydə alınır və bunun 90 faizi açılır. Bu ilin 6 ayı ərzində ağır və xüsusi cinayətlərin sayı azalıb. Qəsdən adam öldürmə, quldurluq, soyğunçuluq və digər cinayətlərin sayı azalıb. Amma cinayətlərin dinamikasında tamahla müşahidə olunan bəzi cinayətlərin sayı artıb. Bu da insanların düşüncəsi və onların zəif iradəyə malik olması ilə bağlıdır. Təbii ki, bu hal sağlam düşüncəli insanların şüuruna yad olan faktdır”.
Ş.Əliyev hesab edir ki, ağır cinayətlərin qarşısının alınması dövlət siyasətinin real təzahürü və islahatların həyata keçirilməsinin bariz nümunəsidir.
Günel CƏLİLOVA
