Məhərrəm Zülfüqarlı: “Hesab edirəm ki, belə məsələdə radikallıq etməyə dəyməz”
İyulun 26-dan 29-dək Bakının Nardaran qəsəbəsindəki "Sea Breeze Resort” istirahət mərkəzində keçiriləcək "Jara-2018” adlı Beynəlxalq Musiqi Festivalına kimlərin qatılıb-qatılmayacağı ilə bağlı bir neçə gündür sosial şəbəkələrdə aktiv müzakirələr aparılır.
Əsasən də erməni-kürd əsilli olduğu bildirilən rusiyalı müğənni Zara Mqoyanın adının iştirakçılar sırasında olması ilə bağlı müəyyən etirazlara, çağırışlara rast gəlmək mümkündür. Həmin çağırışları edənlər Zaranın milli kimliyini xüsusi qabardaraq həmin tədbirin mahiyyətini dəyişdirməyə yönələn çağırışlar edirlər. İndi gəlin bu məsələyə bir qədər geniş aspektdən yanaşaq. Bəllidir ki, biz Ermənistanla müharibə şəraitində yaşayan ölkəyik. Hətta bəzi rəsmi məlumatlarda biz həmin ölkəni düşmən dövlət də adlandırırıq. Bizim ölkəmizin Ermənistanla bağlı mövqeyi açıq və aydındır. Ancaq münaqişənin həlli istiqamətində atılan bütün konstruktiv addımlara Azərbaycan ölkə olaraq hər zaman dəstək verir. Biz onu da anlayırıq ki, erməni dövləti ilə sadə erməni xalqı arasında ciddi fərq var. Təsadüfi deyil ki, məhz həmin millətin bir çox tanınmış nümayəndələri öz şəxsi istəkləri ilə Azərbaycana səfər edir, burada gördükləri inkişafdan heyranlıq ifadə edirlər. Bundan əlavə, münaqişənin mövcud olduğu bu illər boyu “Xalq diplomatiyası” deyilən tədbirlər çərçivəsində hər iki ölkənin tanınmış ziyalılarının qarşılıqlı səfərləri reallaşıb. Bizim və onların deputatları bir sıra beynəlxalq tədbirlər çərçivəsində Bakıya və İrəvana səfərlər edirlər. İstər Ermənistanda, istərsə də Azərbaycanda keçirilən idman yarışlarında tərəflərin iştirakı təmin edilir. Bütün bunlar onu deməyə əsas verir ki, bəzi tədbirlərlə bağlı kiminsə hələ tam dəqiqləşdirilməmiş milli kimlik məsələsini xüsusi qabardıb, lazımsız çağırışlar etmək ümumi işin ziyanına ola bilər. Azərbaycan rəsmi səviyyədə bəyan edir ki, erməni əsilli vətəndaşlarının da yaşadığı Dağlıq Qarabağa ölkəmizin hüdudları çərçivəsində ən yüksək muxtariyyət verməyə hazırdır. Bizim ölkə olaraq hansısa millətlə münaqişəmiz, ədavətimiz yoxdur. Biz dəqiq anlayırıq ki, zavallı erməni millətini bu rəzil günə onların öz içindən çıxmış və hakimiyyəti qəsb etmiş bir qrup cinayətkar salıb. Azərbaycan ərazimizə qanunsuz səfərlər edənlərlə bağlı olduqca sərt mövqe sərgiləyir. Bununla bağlı hətta “qara siyahı” da müəyyənləşdirib. Bir çox sənət adamlarının adı Dağlıq Qarabağa etdikləri qanunsuz səfərə görə ora salınıb. Bütün bunlar onu deməyə əsas verir ki, Azərbaycan dövlətinin icazəsi ilə ölkəmizdə iştirakı lazım bilinən hansısa idmançı və ya müğənni ilə bağlı cəmiyyətdə qızışdırıcı çağırışlar etmək yolverilməzdir. Hər halda, bu ölkənin oturuşmuş və güclü strukturları var. Lazım bilinməyən şəxsin ölkəyə girişinə onlar qadağa qoya bilir. Kiçik bir detaldan istifadə etməklə, özünü milli təəssübkeş kimi qərara verənlərin bu yöndə etdiyi lazımsız çağırışları necə dəyərləndirmək olar?
Tarix üzrə fəlsəfə doktoru Məhərrəm Zülfüqarlı qəzetimizə açıqlamasında bildirdi ki, belə məsələlərə sırf müharibə kontekstindən baxmaq olmaz: “Məsələn, orta əsrlər və ya 1941-45-ci illərdə alman faşistləri ilə gedən müharibədə belə səfərlərin təşkili mümkün deyildi. Hazırda bizim Ermənistanla olan münasibətlərimizdə aktiv müharibə fazası yoxdur. Bunu münaqişəli vəziyyət də adlandıra bilərik. Bilirsiniz ki, bütün dünya birliyi və hər iki ölkənin üzv olduğu beynəlxalq təşkilatlar münaqişənin sülh yolu ilə həllini tələb edir. Azərbaycan bu ənənəyə sadiq qalır. Elə tədbirlər var ki, orada digər münaqişə tərəfinin təmsilçisinin iştirakı təmin olunmalıdır. Buna icazə verməyən ölkəyə daha ciddi problemlər yaşada bilərlər. İdman və mədəniyyət tədbirləri ilə bağlı isə bu öhdəliklərə xüsusi əməl etmək lazımdır. Şəxsən hansısa erməni əsilli müğənninin və ya idmançının gəlib Azərbaycanda hansısa tədbirdə iştirakında qeyri-adi nəsə görmürəm. Əksinə, bu, ölkəmizin təbliği baxımından gözəl vasitədir. Qoy Ermənistanla Azərbaycanı real müqayisə etmək imkanları olsun. Hesab edirəm ki, belə məsələdə radikallıq etməyə dəyməz”.
Məhəmmədəli QƏRİBLİ
