Eyyub Hüseynov: “Qadağan olunmuş məkanda 363 şəxsin siqaret çəkməsi səbəbindən inzibati məsuliyyətə cəlb olunması digər şəxslərə də nümunə olar”
Məlum olduğu kimi, ötən ilin sonunda Prezident İlham Əliyev “Tütün məmulatlarının istifadəsinin məhdudlaşdırılması haqqında” qanunun qüvvəyə minməsi ilə əlaqədar fərman imzalayıb.
Qanuna əsasən, tütün məmulatlarından (siqaret) sulu qəlyan və elektron siqaretdən ictimai yerlərdə istifadə qadağandır.
Qeyd edək ki, Daxili İşlər Nazirliyinin Baş İctimai Təhlükəsizlik İdarəsi tərəfindən «Tütün məmulatlarından istifadənin məhdudlaşdırılması haqqında» qanununun tələblərindən irəli gələn vəzifələrin icrası ilə bağlı tədbirlər həyata keçirilib. 2018-ci ilin 6 ayı ərzində respublikanın şəhər, rayon polis orqanları tərəfindən keçirilmiş tədbirlər nəticəsində “Tütün məmulatlarından istifadənin məhdudlaşdırılması haqqında” Azərbaycan Respublikasının Qanunu ilə qadağan edilmiş yerlərdə tütün çəkdiyinə görə 363 şəxs İnzibati Xətalar Məcəlləsinin 212.1-ci və 306.4-cü maddələrinə əsasən inzibati məsuliyyətə cəlb olunub, onlara tətbiq edilmiş cərimələr 11.205 manat təşkil edib.
Məsələ ilə bağlı fikir bildirən Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında qeyd etdi ki, qadağan olunan yerlərdə siqaret hələ də çəkilir: “Bu problemin təxminən 60 faizi həll olunmayıb. Şəhərin bir sıra ərazilərində olan bəzi kafelerdə açıq şəkildə siqaret çəkilir. Bəzi məkanlarda qadağaya əməl olunmur”.
Həmsöhbətimiz onu da vurğuladı ki, siqaretin çəkilməsi üçün müəyyən olunmuş yerlər var. Hətta restoran və kafelərdə xüsusi zallar yaradılıb: “Siqaret çəkənlər xüsusi ayrılmış zalda əyləşə bilər. Orada da yaxşı havalandırma olmalıdır. Digər ölkələrdə qapalı yerlərdə siqaretin çəkilməsinə icazə verilmir. Bu, uşaqların tərbiyəsi, ailənin qorunması üçün vacibdir”.
Ekspertin sözlərinə görə, qapalı məkanlarda siqaretin çəkilməsi ilə bağlı qərar doğru qərardır: “Bu, dünyanın getdiyi yoldur. Məlum qadağının icra oluna biləcəyini istisna etmirəm. Xüsusi yerlərdən başqa qapalı məkanlarda siqaretin çəkilməsinə cəzaların və cərimələrin olması normaldır. Amma yenə bu sahədə də boşluq var. Öncə dediyim kimi, bu istiqamətdə də sosial çarxlar hazırlanıb nümayiş olunmalıdır. Ümumiyyətlə, sağlam həyat tərzinin insanlara aşılanması arzuolunandır. Qadağan olunmuş məkanda 363 şəxsin siqaret çəkməsi səbəbindən inzibati məsuliyyətə cəlb olunması düzgün qərardır. Belə olan halda, digər şəxslər cərimələnməkdən ehtiyat etdiyi üçün ictimai məkanda siqaretdən istifadə etməyəcək”.
Günel CƏLİLOVA
