İradə İbrahimova: “Nazirlik rəsmi qaydada qanun pozucusunun müəyyən edilməsi və barəsində qanunamüvafiq tədbirin görülməsi məqsədilə Bakı Şəhər Baş Polis İdarəsinə müraciət edib” Telman Zeynalov: “Ağacların dibinə mənşəyi bilinməyən maddəni tökənlər sadə vətəndaşlar deyil, bu əməli tikinti işi ilə məşğul olan kommersiya təşkilatları törədib”
Təbiəti qorumaq hər bir vətəndaşın əsas vəzifələrindən biridir. Lakin bəzi adamlar müxtəlif həyətyanı sahələrdə, meydançalarda əkilən ağaclara, kol və bəzək bitkilərinə qayğı ilə yanaşmaq istəmirlər. Bu da yaşıllıqların təhlükə ilə üzləşməsinə səbəb olur.
Son zamanlar daha çox ağacların kəsilməsi ilə bağlı xəbərlər eşidirik, bu kimi halların şahidi oluruq. Təbii ki, “ağac soyqırımı” həyata keçirənlərlə bağlı hüquq müstəvisində tədbirlər görülür. Artıq ağac, yaşıllaşdırma düşmənləri ağacları qırmaqla, onları kökündən qoparmaqla kifayətlənməyib, indi də ağacların dibinə mənşəyi bilinməyən maddələr tökürlər ki, onlar quruyub məhv olsunlar.
Məlum olduğu kimi, sözügedən hallardan biri Yasamal rayonu Şərifzadə küçəsi 130A ünvanında baş verib. Ekologiya və Təbii Sərvətlər Nazirliyinin yaydığı məlumata görə, Yasamal rayonu, Şərifzadə küçəsi 130A ünvanında yaşıllıqların dibinə kimyəvi maddə tökülməsi ilə bağlı daxil olan şikayət Bakı Şəhər Ekologiya və Təbii Sərvətlər və Ətraf Mühit üzrə Milli Monitorinq Departamentlərinin əməkdaşları tərəfindən dərhal yerində araşdırılıb.
Nazirliyin mətbuat xidmətinin rəhbəri İradə İbrahimova bu barədə “Bakı-Xəbər”ə verdiyi açıqlamada qeyd etdi ki, nazirlik nümayəndələri məlumat alan kimi operativ reaksiya verərək dərhal hadisə yerinə gediblər. O bildirdi ki, araşdırma zamanı sözügedən yaşıllıq sahəsində müxtəlif cinsli 21 ədəd ağacın qurudulması məqsədilə dibinə mənşəyi məlum olmayan maddənin tökülməsi faktı aşkar edilib. “Analiz aparılması üçün ağacların dibindən nümunələr götürülüb. Analizin nəticələrinə uyğun olaraq maddənin ağacların bioloji inkişafına təsiri müəyyən ediləcək və qabaqlayıcı tədbirlər görüləcək. Sözügedən ağaclara profilaktik xidmət göstərilməsi, dibinin maddədən təmizlənməsi, qorunub mühafizə olunması məqsədilə Bakı Şəhər İcra Hakimiyyətinin Yaşıllaşdırma Təsərrüfatı Birliyinə icrası məcburi olan "məcburi göstəriş” verilib” - deyə bildirən İ.İbrahimova qeyd etdi ki, nazirlik sözügedən hüquq pozuntusu ilə əlaqədar Bakı Şəhər Baş Polis İdarəsinə müraciət edib: “Nazirlik rəsmi qaydada qanun pozucusunun müəyyən edilməsi və barəsində qanunamüvafiq tədbirin görülməsi məqsədilə Bakı Şəhər Baş Polis İdarəsinə müraciət edib. Hazırda bu qurum faktla bağlı araşdırma aparır. Bu hadisəni kimlərin törətdiyini Bakı Şəhər Baş Polis İdarəsi müəyyən edəcək”.
Tanınmış ekoloq Telman Zeynalov isə bizimlə söhbətində bildirdi ki, müxtəlif cinsli 21 ədəd ağaca qarşı törədilən hadisə cinayət tərkiblidir. Hər bir ictimaiyyət nümayəndəsinin, vətəndaşın yaşıllıq sahələrinə qayğı ilə yanaşmalı olduğunu vurğulayan T.Zeynalovun sözlərinə görə, ağaclara qarşı həyata keçirilən neqativ akt məqsədli şəkildə törədilib: “Yaşıllaşdırmanın qorunmasına, ağacların mühafizəsinə yalnız rəsmi qurumlar cavabdeh deyillər, burada vətəndaş məsuliyyəti də var. Əslində, yaşıllaşdırmanın qorunmasına ictimaiyyət cavabdehdir. Əgər ictimaiyyət öz sağlamlığını istəyirsə və bunun üçün də dövlət yaşıllaşdırma tresti yaradıbsa, ağaclar əkibsə, ictimaiyyət onları qorumalıdır. Ancaq deyim ki, ağaclara qarşı sui-qəsdi sadə vətəndaşlar etməyib. Ağacların dibinə mənşəyi bilinməyən maddəni tökənlər sadə vətəndaşlar deyil, bu əməli tikinti işi ilə məşğul olan kommersiya təşkilatları törədib. Bu işin günahkarı kommersantlardır. Sadə vətəndaş o ağacların kökünü nə üçün yandırmalıdır ki, o ağacın kölgəsində oturur, dincəlir. Bunu edənlər kommersantlardır, onların məqsədi odur ki, ağacları qurutsunlar, sonra onu kökündən çıxarıb yerində ticarət mərkəzi, binalar tiksinlər. Onların məqsədi ağacların olduğu sahədə bina inşa etməkdir. Yoxsa, heç kim boş-boşuna ağacları qurutmaz”.
T.Zeynalov qeyd etdi ki, bəzi tikinti şirkətləri bina inşa etmək üçün yaşıllıq zolaqlarını məhv edir, ağacları kəsirlər, bu da onlarla vətəndaşlar arasında qarşıdurmalara səbəb olur. T.Zeynalov hesab edir ki, rəsmi qurumların bu cür hallara münasibəti sərt olmalıdır. Onun fikrincə, sözügedən ünvanda ağacların dibinə mənşəyi bilinməyən maddə tökən şəxslər tapılmalı və bu hadisəyə hüquqi qiymət verilməlidir ki, başqaları bunu təkrar etməsinlər.
İradə SARIYEVA
