Əkbər Qoşalı: “Hesab edirəm ki, “ASAN xidmət” mərkəzlərində təcrübə keçən əcnəbi könüllülər burada öyrəndiklərini öz ölkələrində tətbiq edəcəklər”
Azərbaycanda fəaliyyət göstərən “ASAN xidmət” nəinki Cənubi Qafqazda, hətta bütün dünyada nümunəvi xidmət göstərən bir təsisatdır. “ASAN Xidmət” mərkəzlərinin fəaliyyəti, təcrübəsi artıq bir sıra xarici ölkələrin də marağına səbəb olub. Artıq “ASAN xidmət” mərkəzlərində əcnəbi könüllülər də təcrübə keçməyə başlayıblar.
Vətəndaşlara Xidmət və Sosial İnnovasiyalar üzrə Dövlət Agentliyinin İnformasiya təminatı şöbəsindən yayılan məlumata görə, Serbiya, Niderland, Pakistan, Çin və Hindistandan gələn qonaqlar 19 iyul - 3 avqust tarixlərində “ASAN xidmət” mərkəzlərində dövlət xidmətləri göstərilməsi üzrə könüllü fəaliyyətinə qoşularaq, ekoloji istiqamətdə müxtəlif təlim, layihə və ekskursiyalarda iştirak etməyə başlayıblar.
Məlumatlara görə, 1, 3 və 5 saylı Bakı “ASAN xidmət” mərkəzlərində fəaliyyət göstərən əcnəbi könüllülər "ASAN xidmət" mərkəzləri və "ASAN radio" ilə yaxından tanış olublar, onlara “ASAN xidmət"in fəaliyyəti, prinsipləri və ASAN könüllüləri hərəkatı haqqında geniş təqdimatlar edilib.
Əcnəbilərin könüllülük fəaliyyəti ASAN Könüllülük Məktəbinin “Yaşıl ASAN” təşəbbüsü və AİSEC-in Azərbaycan nümayəndəliyinin birgə təşkilatçılığı ilə ekoloji istiqamətdə “Create your eden” layihəsi çərçivəsində keçirilir.
Qeyd edək ki, “ASAN xidmət” mərkəzləri Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində Azərbaycan Respublikası Prezidentinin 2012-ci il 13 iyul tarixli, 685 nömrəli Fərmanına əsasən yaradılıb.
“ASAN xidmət” mərkəzləri dövlət orqanları tərəfindən göstərilən xidmətlərin vahid və əlaqələndirilmiş formada həyata keçirilməsini təmin edən qurumlardır.
“ASAN xidmət” mərkəzləri dövlət qulluqçularının fəaliyyətində əhaliyə münasibətdə vətəndaş məmnunluğunun təmin edilməsi istiqamətində yeni yanaşmanın formalaşdırılmasına, ölkədə dövlət qulluqçusu-vətəndaş münasibətlərinin keyfiyyətcə yeni müstəviyə keçməsinə xidmət edir.
Mərkəzlərin fəaliyyəti operativlik, şəffaflıq, nəzakətlilik, məsuliyyət və rahatlıq prinsipləri əsasında qurulur.
“ASAN xidmət” mərkəzlərində əcnəbi könüllülərin təcrübə keçməsinə şərh verən ekspert Əkbər Qoşalının sözlərinə görə, əcnəbi könüllülərin “ASAN xidmət” mərkəzlərində təcrübə keçməsi Azərbaycan brendinin bütün dünya üçün örnək olduğunu təsdiqləyən amildir. “Əlbəttə, bu qürurverici bir hadisədir. Bilirsiniz ki, bir neçə ay əvvəl Birləşmiş Millətlər Təşkilatında “ASAN xidmət”in başqa ölkələrə də tövsiyə edilməsinin şahidi olduq. Həqiqətən də “ASAN xidmət” təsisatı bütün dünya üçün örnək olan şəffaf bir xidmət sahəsidir. Bu gün əcnəbi könüllülərin Azərbaycana gəlib burada “ASAN xidmət” mərkəzlərində iş təcrübəsini öyrənməsi təsadüfi deyil. Bu, həmçinin, bu sahəyə ardıcıl münasibətin ifadəsidir. Cənab Prezidentin dediyi kimi, “ASAN xidmət” bir Azərbaycan brendidir. Artıq bir neçə il ərzində o öz funksiyasının əhatə dairəsini genişləndirərək necə əhəmiyyətli bir model olduğunu fəaliyyəti ilə təsdiqləyib. Bu təsisat getdikcə ictimai fikrimizə, sosial-mənəvi həyatımıza, dövlət və vətəndaş münasibətinin qurulmasına, daha da yaxınlaşmasına böyük töhfə verir. “ASAN xidmət”, həmçinin, yeni kadrların yetişdirilməsi, meydana gətirilməsi sahəsində böyük işlər görür. Hazırda “ASAN xidmət”in fəaliyyət sferası çox genişdir. Hesab edirəm ki, “ASAN xidmət” mərkəzlərində təcrübə keçən əcnəbi könüllülər burada öyrəndiklərini öz ölkələrində tətbiq edəcəklər” - deyə bildirən Ə.Qoşalının sözlərinə görə, “ASAN xidmət” mərkəzləri yalnız Azərbaycan vətəndaşlarına xidmət etmir, bu xidmətdən, həmçinin, xarici vətəndaşlar da bəhrələnə bilirlər.
“Bu təsisat, həmçinin, xarici vətəndaşlara da xidmət göstərir. Biz bu xidməti “Asan Viza”nın timsalında qeyd edə bilərik. Bu da xarici ölkə vətəndaşları üçün bəzi sənədləşmələrin asan və əlçatan olmasını nümayiş etdirməkdədir. “ASAN xidmət” təsisatı özünü doğruldub və yeni xidmətləri ilə də əhalinin, ictimaiyyətin maraqlarını təmin edir. Arzu edirəm ki, Azərbaycanın yeni dünya brendləri meydana gəlsin və başqa dövlətlər o brendləri özünə nümunə hesab etsinlər. “ASAN xidmət” təcrübəsindən artıq dünya birliyi yararlanmaqdadır və bu brend dünya üçün bir gerçək nümunədir” - deyə müsahibimiz bildirdi.
İradə SARIYEVA
