Azər Allahverənov: “İqtisadiyyatın müxtəlif seqmentlərində əmək bazarı üçün şəraitin olması miqrantların Azərbaycana üz tutmasına səbəb olur”
Son illər Azərbaycana gələn xaricilərin sayında artım müşahidə olunur. Açıqlanan statistik rəqəmlərə əsasən, bu il Azərbaycana gələn əcnəbilərin sayında 10 faizdən çox artım olub.
Bu barədə Dövlət Miqrasiya Xidmətinin rəisi Vüsal Hüseynov xidmətin bu ilin 6 ayında fəaliyyətinin yekunlarına həsr olunmuş tədbirdə deyib. O bildirib ki, bu ilin 6 ayı ərzində 1 324 075 halda 827 352 əcnəbinin və vətəndaşlığı olmayan şəxsin ölkəyə daxil olması qeydə alınıb: "Bu rəqəm 2017-ci ilin müvafiq dövründə 1 119 770 halda 747 107 nəfər olub".
V.Hüseynov bildirib ki, hesabat dövründə 347 767 əcnəbi və vətəndaşlığı olmayan şəxs olduğu yer üzrə qeydiyyata alınıb: "Bu da ötən illə müqayisədə 10 faiz artım deməkdir.
Həmçinin, daimi yaşamaq üçün icazəsi verilmiş əcnəbi və vətəndaşlığı olmayan şəxslərin sayında da 25 faiz artım qeydə alınıb”.
Yaşamaq üçün Azərbaycanı seçən xaricilərin sayının artması səbəbləri barədə danışan miqrasiya sahəsi üzrə ekspert Azər Allahverənov “Bakı-Xəbər”ə açıqlamasında qeyd etdi ki, Azərbaycan miqrantlar üçün maraqlı məkandır: “Xaricilərin yaşayış üçün ölkəmizi seçmələrinin bir sıra səbəbləri var. İlk olaraq qeyd edim ki, iqtisadi və siyasi müstəvidə sabitliyin hökm sürməsi miqrantlar üçün əlverişlidir. Miqrantlar adətən sabitliyin yaşandığı ölkələrə üz tutur. Həmçinin, əmək bazarında əlverişli mühitin olması da xaricilərin ölkəmizi seçməsinə səbəb olur. İrimiqyaslı regional layihələrin, sənaye parklarının salınması, istehsalat müəssisələrinin yaradılması və digər işlərin həyata keçirilməsi əcnəbi vətəndaşların diqqətindədir. Ümumiyyətlə, iqtisadiyyatın müxtəlif seqmentlərində əmək bazarı üçün şəraitin olması miqrantların Azərbaycana üz tutmasına səbəb olur”.
A.Allahverənovun sözlərinə görə, ölkə ərazisinə gələn miqrantların böyük bir hissəsi vaxtilə Azərbaycana turist kimi gələn vətəndaşlardır. Turizmin inkişaf etməsi miqrasiya sahəsinə də təsir göstərir.
Həmsöhbətimiz onu da vurğuladı ki, Dövlət Miqrasiya Xidməti tərəfindən uğurlu qeydiyyat prosesinin təşkil olunması, ASAN vizanın tətbiq olunması, elektron xidmətlərin təşkil olıunması miqrantın rahat şəkildə ölkə ərazisinə gəlməsinə hesablanmış tədbirlərdir. Bu da, nıəticə etibarilə, yaşayış üçün ölkəmizi seçən insanların sayının artmasına təsir göstərir.
Günel CƏLİLOVA
