“Şəhərimizin abadlığı və əminliyi üçün binalar bir-birindən aralı inşa olunmalı, qrunt sularının axdığı ərazilərdə tikinti aparılmamalıdır”
Xəbər verildiyi kimi, Prezident İlham Əliyevin tapşırığına əsasən Dövlət Şəhərsalma və Arxitektura Komitəsi Bakı şəhərinin baş planının hazırlanması işinin təşkili prosesinə start verir. Komitənin yaydığı məlumatda qeyd olunur ki, bu prosesin beynəlxalq standartlara uyğun təşkil edilməsi və Bakı şəhərinin baş planının ən uğurlu qlobal təcrübəyə əsaslanaraq tərtib olunması məqsədilə Komitə “Böyük Üçlük” adlanan dünyanın ən nüfuzlu üç strateji məsləhətçi şirkətlərindən birini – “The Boston Consulting Group” şirkətini cəlb edir.
Dövlət Şəhərsalma və Arxitektura Komitəsi “The Boston Consulting Group” şirkəti ilə birgə Bakı şəhərinin baş planının hazırlanması işinin iki mərhələdə təşkil edilməsini planlaşdırır.
Birinci mərhələdə paytaxtla bağlı bugünədək hazırlanmış bütün səhərsalma və ərazi planlaşdırılması sənədlərinin, o cümlədən “Böyük Bakının Regional İnkişaf Planı” və “Bakı şəhərinin Ərazidən İstifadə və Zonalaşdırma Planı” layihələrinin təhlil edilməsi nəzərdə tutulur.
İkinci mərhələdə Komitə “The Boston Consulting Group” şirkəti ilə birgə birinci mərhələdə müəyyənləşdirilmiş tələblər əsasında nüfuzlu şəhərsalma, memarlıq, mühəndislik şirkətlərini və aidiyyəti ekspertləri əməkdaşlığa cəlb etməklə paytaxtın baş planının işlənməsi prosesini davam etdirərək yekunlaşdırılmasını planlaşdırır. Mövcud qanunvericiliyin tələblərinə uyğun olaraq aidiyyəti dövlət orqanları ilə razılaşdırıldıqdan və ictimai müzakirələr aparıldıqdan sonra Bakı şəhərinin baş planının təsdiq üçün Nazirlər Kabinetinə təqdim olunması nəzərdə tutulur. Azərbaycan Respublikasının Şəhərsalma və Tikinti Məcəlləsinə uyğun olaraq baş plan təsdiq olunduqdan sonra 20 il ərzində qüvvədə olacaq.
Məlumat üçün bildirək ki, 1963-cü ildə yaradılan “The Boston Consulting Group” şirkəti 50 ölkədə fəaliyyət göstərən 90-dan çox nümayəndəliyini özündə birləşdirən qlobal şəbəkəsi vasitəsilə dünyanın bütün regionlarında dövlət, özəl və qeyri-hökumət sektoruna xidmət göstərir.
Maraqlıdır, Bakının yeni baş planı necə olacaq və Bakı əhlini hansı problemlərdən azad edəcək?
Memar Zemfira Budaqova “Bakı-Xəbər”ə açıqlamasında qeyd etdi ki, Bakının yeni baş planında şəhərsalmanın məlum qaydalarından istifadə olunarsa, paytaxtın görünüşü də yaxşı olar və əhalinin rahatlığı da təmin olunar: “Şəhərsalmanın qaydalarına riayət olunmazsa, o zaman Bakının küçələri dar və keçilməz olacaq.
Yaxşı olar ki, sürüşmə ərazilərindəki tikililər şəhərin mərkəzindən köçürülsün. Bəzi ərazilərdə yerləşən evlərin altında qrunt suları artmaqdadır. Bu da insanların həyatına təhlükə yaradır. Baş Planda bu və digər məsələlər nəzərə alınmalıdır. Onu da nəzərə almaq lazımdır ki, Bakı zəlzələ ocağında yerləşir. Bu səbəbdən də binalar bir-birinə yaxın olmamalıdır.
Bakının yeni baş planında Nargin adasında uşaqlar üçün Disneylənd istirahət mərkəzinin salınmacağsı ehtimal olunur. O adaya getmək üçün körpülər salınacaq”.
Memar onu da bildirdi ki, yeni hazırlanacaq baş planda xarici mütəxəssislərlə yanaşı, yerli nümayəndələrin də rəyləri nəzərə alınmalıdır: “Nəzərə almaq lazımdır ki, Bakı bizim şəhərdir. Şəhərimizin abadlığı və əminliyi üçün binalar bir-birindən aralı inşa olunmalı, qrunt sularının axdığı ərazilərdə tikinti aparılmamalıdır”.
Günel CƏLİLOVA
