Şəmsəddin Əliyev: “Xəbərdarlıq və maarifləndirmə xarakterli tədbirlər də sözügedən məsələdə öz bəhrəsini verir”
Bu günlərdə Daxili İşlər Nazirliyində (DİN) 2018-ci ilin birinci yarısında cinayətkarlıqla mübarizə, ictimai qaydanın qorunması və ictimai təhlükəsizliyin təmin edilməsi üzrə fəaliyyətin yekunlarına və qarşıda duran vəzifələrə həsr olunmuş geniş kollegiya iclası keçirilib.
İclasda geniş məruzə ilə çıxış edən daxili işlər nazirinin birinci müavini, polis general-leytenantı Vilayət Eyvazov hesabat dövründə əməliyyat-axtarış və istintaq fəaliyyətinin subyekti olan bütün dövlət qurumları üzrə 12 min 844 cinayətin qeydə alındığını, bu cinayətlərin 93,8 faizinin daxili işlər və prokurorluq orqanları tərəfindən istintaqı və təhqiqatı aparılan hüquqazidd əməllər olduğunu, onların 89,4 faizinin böyük ictimai təhlükə törətməyən və az ağır, yalnız 10,6 faizinin ağır və xüsusilə ağır növlər təşkil etdiyini bildirib.
Qeyd olunub ki, profilaktik işin gücləndirilməsinin, kriminogen durumun fasiləsiz izlənilməsinin nəticəsi olaraq, cinayətkarlığın dinamikasında mövcud olan müsbət təmayüllər ötən altı ayda daha da yaxşılaşıb. Belə ki, cinayətlərin sayı 3,4 faiz, o cümlədən ağır və xüsusilə ağır növlər 28,6, qəsdən sağlamlığa ağır zərər vurmalar 2,9, mülkiyyət əleyhinə olan cinayətlər 14, onlardan oğurluqlar 7,1, quldurluqlar 12,7, yol-nəqliyyat hadisələri 5, qəzalarda həlak olanların sayı 1,3, xəsarət alanların sayı isə 8,3 faiz azalıb. O cümlədən, 2017-ci ilin 6 ayı ilə müqayisədə ağır və xüsusilə ağır cinayətlərin açılması 2,1, şəxsiyyət əleyhinə olanların açılması 0,6, adam öldürməyə cəhdlərin açılması 1,8, mənzillərdən edilən oğurluqların açılması 2,6, avtonəqliyyatın qaçırılması cinayətlərinin açılması 12,8 faiz artıb.
Ümumilikdə, ağır cinayətlərin sayında azalmanın səbəbi nə ilə bağlıdır?
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyev ağır növ cinayətlərin sayında qeydə alınan azalmanı bir sıra amillərlə əlaqələndirdi: “Məsələ ondadır ki, ölkədə əhalinin sayı artdıqca, obyektlərin də sayı artır. DİN-in ərazi üzrə polis əməkdaşlarının ərazidə fəaliyyət göstərən təşkilatları, obyektləri öz müşahidəsi altına alma bacarıqları yüksəkdir. Yəni neqativ düşüncəli insanların davranışları, bir növ, polisin müşahidəsi altında olur. Azərbaycan müstəqillik əldə etdikdən sonra ölkə polisi bu yöndə əməliyyat-axtarış tədbirlərini, vətəndaşlarla təmasda olmaq imkanlarını bir az da genişləndirə bilib. İkincisi, bu gün Azərbaycan polisi ilə xalq arasında çox sıx birlik var. Bu da, sözün həqiqi mənasında, baş verən və baş verə biləcək cəmiyyətə zidd davranışlar barədə polisə dərhal məlumat ötürülməsinə imkan yaradır. Əvvəlki dövrlərdən fərqli olaraq, buna görə tərəddüdə qapılmırlar. Artıq əhali başa düşür ki, polislə aktiv təmasda olmaq lazımdır. Cəmiyyətdə təhlükəsizliyin təmin olunması üçün, mütləq mənada, hər iki qütb bir-birilə sıx fəaliyyət göstərməsələr, təhlükə törədən halların qarşısını almaq qeyri-mümkün olar. Bunun üçüncü səbəbi onunla bağlıdır ki, Azərbaycan polisinin peşəkar nüvəsi var. Həmin nüvənin dairəsi tədricən genişlənir və qəbul olunan əməkdaşlara dərhal təlimat vasitəsilə ötürülür. Yəni bu gün polisin yeni cavan heyəti də artıq bundan bəhrələnir. Bundan faydalanmaq əmsalı daha çoxdur. Həm də son vaxtlar QHT-lər səviyyəsində bu istiqamətdə profilaktik xarakterli maarifləndirmə tədbirləri keçirilir. Bunlar da cinayətkarlığın azalmasına öz təsirini göstərir. Bir sözlə, xəbərdarlıq və maarifləndirmə xarakterli tədbirlər də sözügedən məsələdə öz bəhrəsini verir”.
Vidadi ORDAHALLI
