Nəsimi rayon İcra Hakimiyyəti rayon sakinləri arasında sosial qayğıya ehtiyacı olan, şəhid və Qarabağ veteranı ailələri, həmçinin valideyn himayəsindən məhrum olmuş uşaqların yay tətili günlərinin səmərəli və maraqlı keçirilməsi üçün silsilə tədbirlər həyata keçirir.
Nəsimi RİH-dən “Bakı Xəbər”ə bildirildiyinə görə, məktəbli gənclərin Vətən sərhədlərinə və sərhədçi peşəsinə hörmət ruhunda tərbiyə olunması məqsədilə Nəsimi rayon İcra Hakimiyyəti Dövlət Sərhəd Xidməti ilə birlikdə sərhəd zastavasında məktəblər üçün hərbi-vətənpərvərlik düşərgəsinin təşkili layihəsinə start verib. Belə ki, Nəsimi rayonundakı orta məktəblərin 7-11-ci sinif şagirdləri üçün Şəki Sərhəd Dəstəsinin “Laza” sərhəd zastavasının bazasında “Sərhədçi” yay istirahət düşərgəsi təşkil olunub. Səfər öncəsi Nəsimi RİH-də “Sərhədçi” yay istirahət düşərgəsində istirahət edəcək uşaqlar, onların valideynləri və məktəb rəhbərləri ilə birgə görüş keçirilib. Görüşdə çıxış edən Nəsimi RİH başçısı Asif Əsgərov iştirakçıları salamlayaraq, ölkə başçısı İlham Əliyevin və Birinci Vitse-prezident Mehriban Əliyevanın gənc nəslin vətənə məhəbbət, Azərbaycan dövlətçiliyinə sədaqət ruhunda tərbiyə olunması istiqamətində gördükləri işlərdən, həyata keçirdikləri layihələrdən danışıb, rayonda yeniyetmə və gənclərin asudə vaxtlarının səmərəli təşkili istiqamətində görülən işlər, həyata keçirilən sosial layihələr barədə ətraflı məlumat verib. Qeyd olunub ki, Dövlət Sərhəd Xidməti ilə birgə layihə – «Sərhədçi» yay istirahət düşərgəsi yaradılıb. Yay istirahət düşərgəsində məktəblilərin mənalı istirahət etmələri üçün xüsusi tədbirlər planı hazırlanıb. Plana əsasən, məktəblilər arasında mini futbol, şahmat, dama və stolüstü tennis yarışları, müxtəlif əyləncəli, musiqili tədbirlər keçiriləcək, vətənpərvərlik mövzularında çəkilmiş Azərbaycan filmləri və Dövlət Sərhəd Xidmətinin fəaliyyətini əks etdirən videoçarxlar nümayiş etdiriləcək. Meşəlik ərazidə silahlı sərhəd pozucularının saxlanması və sərhəd zastavasına müşayiət edilməsi mövzusunda məşğələ, pnevmatik silahdan atıcılıq yarışı, narkotik maddə və partlayıcı vasitənin xidməti itlər tərəfindən axtarılıb tapılması, sıra hazırlığı məşğələsi və digər tədbirlər şagirdlərin istirahətini daha maraqlı və səmərəli edəcək.
Iyulun 11-də məktəblilərin yola salınma mərasimində çıxış edən valideynlər istirahətə gedən uşaq və yeniyetmələrin mənalı və yaddaqalan yay istirahəti üçün yaradılan şəraitə görə minnətdarlıqlarını bildiriblər. İyulun 12-də isə “Laza” sərhəd zastavasında Dövlət Sərhəd Xidmətinin, Nəsimi rayon İcra Hakimiyyəti nümayəndələrinin, müəllim və şagirdlərin iştirakı ilə “Sərhədçi” hərbi-vətənpərvərlik düşərgəsinin təntənəli açılış mərasimi keçirilib.
Baki-xeber.com
