Adil Qeybulla: “Xəstəxanalarda generatorların işlək olmamasına tibb müəssisələri məsuliyyət daşıyır”
İyulun 2 və 3-də Mingəçevir şəhərində yerləşən "Azərbaycan" İES-də baş vermiş qəza bütün Azərbaycanı qaranlığa qərq etdi. Elrektrik enerjisinin olmaması bir çox sahələrə mənfi təsir göstərdi. O cümlədən, enerjidən asılı olan sahələrdən biri də xəstəxanalardır. Qəza baş verən zaman xəstəxanalar təcili olaraq generatorları işə salmalıdır ki, enerji ilə işləyən aparatların fəaliyyətində problem yaşanmasın. Çünki sağlıq problemi olan insanların taleyi həmin aparatlardan asılıdır.
Prezident İlham Əliyev ölkənin enerji sistemində vəziyyətlə əlaqədar müşavirə keçirdi. Müşavirədə komissiya üzvləri məruzə ilə çıxış etdilər. O cümlədən, səhiyyə naziri Oqtay Şirəliyev Mingəçevir İES-dəki qəza zamanı xəstəxanalardakı durumla bağlı Prezidentə məlumat verdi. Nazir çıxışında qeyd etdi ki, baş verən qəzadan sonra daim bütün regionlarla əlaqə saxlanıb: “Siz bilirsiniz ki, demək olar, bizim bütün rayonlarda yeni xəstəxanalar tikilib və bütün müasir tibbi avadanlıqla təchiz olunub. Hər yerdə generator sistemləri quraşdırılıb. Hər yerdə generatorlar işləyirdi, tibbi xidmət göstərilirdi. Bakı şəhərində də nazirliyin əməkdaşları təhkim olunmuşdu. Bakı şəhərində, ilk növbədə, cərrahiyyə, əməliyyat blokları, reanimasiya tam tərkibdə işləyirdi. Bu iki gün ərzində məsələ ilə bağlı bir ölüm hadisəsi də olmadı. Təcili yardım tam gücü ilə işləyirdi. 2130 çağırış olub. Bunlardan 220 adam xəstəxanalara daxil olub, onlara tam həcmdə yardım göstərilib. Metronun hər stansiyasının qarşısında təcili yardım maşını təhkim olunmuşdu. Onların arasında cəmi 19 nəfər müraciət edib, o da gərginlikdən, əsəbdən. Onlara ilkin tibbi yardım göstərilib. Cəmi 6 nəfər xəstəxanalara yerləşdirilib”.
Lakin dövlət başçısı yekun nitqində nazirin sözlərinin həqiqətə uyğun olmadığını dedi: "Strateji obyektlərdə generatorların quraşdırılması məsələsinə baxmaq lazımdır. İlk növbədə xəstəxanalarda və metroda. İndi səhiyyə naziri məruzə edir ki, bütün xəstəxanalarda generatorlar işləyib. Məndə olan məlumata görə, bu, həqiqətə uyğun deyil. Bəzi xəstəxanalarda generatorlar işləməyib. Ya olmayıb, ya qoşulmayıb, ya da ki, işlək vəziyyətdə olmayıb".
Qəza gecəsi bəzi xəstəxanalarda generatorların işlək olmaması və ya ümumiyyətlə olmaması barədə sosial şəbəkələrdə məlumatlar yayılırdı. Qeyd olunurdu ki, tibb işçiləri xəstələrə əl fənəri ilə tibbi yardım göstərirdilər.
Hər hansı bir qəza zamanı xəstəxanaların generatorla nə səbəbdən təmin olunmaması və ya generatorların işlək vəziyyətdə olmadığını araşdırmaq məqsədilə ekspertlərə müraciət etdik.
Professor, tibbi ekspert Adil Qeybulla “Bakı-Xəbər”ə açıqlamasında qeyd etdi ki, stasionar tibbi xəstəxanalarda, reanimasiya şöbələri olan klinikalarda mütləq əlavə işıq mənbəyi olmalıdır: “Xəstəxanalar generatorla təmin olunmalıdır. Bizdə əsasən benzinlə işləyən generatorlar istifadə olunur. Ancaq dünyada küləklə, günəş enerjisi ilə işləyən generatorlar mövcuddur. Ümumiyyətlə, xəstəxanalarda əlavə enerji mənbəyinin olması çox mühümdür.
Poliklinikalarda generator olmaya bilər. Ancaq stasionar tibb müəssisələrində, uşaq evlərində, reanimasiya otağı olan klinikalarda generator mütləq olmalıdır. Əks halda, xəstələrin taleyi sual altında olar. Qeyd edim ki, dövlət xəstəxanalarında maddi-texniki bazanın möhkəmləndirilməsi istiqamətində xeyli iş görülüb. Həmin xəstəxanalar təmir olunub, avadanlıqlar alınıb. Bu sektorda məlum problemlərin yaşanması ciddi bir qüsurun olmasından xəbər verir. Ümid edirəm ki, enerji qəzası nəzərə alınıb və bütün xəstəxanalar avtomatik olaraq enerji mənbəyi ilə təmin olunmalıdır”.
Həmsöhbətimizin sözlərinə görə, özəl xəstəxanaların əksəriyyəti generatorla təmin olunub. Ancaq dövlət xəstəxanalarında isə vəziyyət fərqlidir: “Xəstəxanalarımızın əlavə enerji mənbəyi ilə təmin olunmaması onu göstərir ki, biz ekstremal şəraitə hazır deyilik. Onu da nəzərə almaq lazımdır ki, biz müharibə ölkəsində yaşayırıq. Hər cür şəraiti nəzərə alıb hazırlıqlı olmaz lazımdır”.
A.Qeybullanın sözlərinə görə, xəstəxanalarda generatorların işlək olmamasına tibb müəssisələri məsuliyyət daşıyırlar. Çünki xəstəxanaların istifadəsində generatorların olması mühüm şərtdir.
Günel CƏLİLOVA
