Yunus Oğuz: “Azərbaycanın Türk dünyasının dahi şəxsiyyətlərinin adlarına xüsusi mükafatlar təsis etməsi müsbət olardı” Hafiz Cabbarov: “Bu mükafat təsis edilərsə, türkdilli ölkələrin elm sahəsində əlaqələrinə böyük töhfə verə bilər”
Azərbaycan tarixən də, çağdaş dövrümüzdə də Türk dünyasının beyin, düşüncə mərkəzlərindən biri kimi tanınıb. Sirr deyil ki, zaman-zaman Türk dünyasının problemlərinə, qayğılarına ölkəmiz tərəfindən daha həssas münasibət sərgilənib. Bu gün Azərbaycan Türk dünyasını birləşdirməyə, türkdilli xalqlar arasındakı əlaqələri daha etibarlı və faydalı şəkildə formalaşdırmağa maraq göstərir. Bu da təbiidir.
Millət vəkili, Azərbaycan Milli Elmlər Akademiyasının vitse-prezidenti, akademik İsa Həbibbəyli Azərbaycan Türk Dünyası Akademiyaları Birliyinin elm sahəsində adlı mükafatlar təsis etməsini təklif edir. Bu təklifi İ.Həbibbəyli "Türk dünyasında müstəqil dövlətçilik ənənəsi və inkişafın müasir problemləri" mövzusunda keçirilən konfransda irəli sürüb. O, Azərbaycanda artıq bir necə ildir Azərbaycan Milli Elmlər Akademiyasının təşəbbüsü ilə alimlərə adlı mükafatların verildiyini söyləyib: “Türk dünyası üçün fərqli adlı mükafatlar verilə bilər. Məsələn, Yunis İmrə, Yusif Məmmədəliyev və s. adlı mükafatlar təsis edilə bilər. Azərbaycan aliminin adına olan mükafat başqa bir türk ölkəsinin aliminə verilə bilər. Bu, ölkələr arasındakl əlaqələrin daha da inkişaf etməsinə səbəb olar”.
Ekspertlər hesab edirlər ki, akademik İ.Həbibbəylinin təklifi çox aktualdır və həqiqətən də bu gün o mükafatların təsis edilməsinə ehtiyac var. Ekspertlərin sözlərinə görə, bu mükafat həm medal, həm diplomlar, həm də xüsusi simvollar formasında olmalıdır.
Türkdilli respublikaların çağdaş elm xadimlərini bu mükafatlarla təltif etmək ideyasının çox müsbət olduğunu deyən “Olaylar” qəzeti və eyni adlı saytın rəhbəri, yazıçı-dramaturq, araşdırmaçı Yunus Oğuzun fikrincə, bu mükafat çoxdan təsis edilməli idi. “Mən bu təklifi dəstəkləyirəm. Hesab edirəm ki, Azərbaycanın Türk dünyasının dahi şəxsiyyətlərinin adlarına xüsusi mükafatlar təsis etməsi müsbət olardı. Yunis İmrə də, Yusif Məmədəliyev də, bizim digər mütəfəkkirlərimiz də Türk dünyasının övladlarıdır. Onların adına təsis edilən hər bir mükafatı, medalı Türk dünyasının böyük elm xadimləri böyük qürur hissi ilə daşıyacaqlar. Bu həm də elm sahəsində yeni formatda əlaqələrin qurulmasına gətirib çıxaracaq. Eyni zamanda da Türk dünyasının böyük alimləri bir-birini tanıyacaq. Bu bizim üçün çox vacibdir. Düşünürəm ki, bu mükafat tezliklə təsis ediləcək”.
Tarixçi-alim Hafiz Cabbarov da bizimlə söhbətində İ.Həbibbəylinin təklifini müsbət qarşıladığını bildirdi: “Mən düşünürəm ki, bu olduqca zəruri təklifdir. Bu mükafat təsis edilərsə, türkdilli ölkələrin mədəni və xüsusilə onun əsas sahələrindən olan elm sahəsində əlaqələrinə böyük töhfə verə bilər. Nəticədə bu, ölkələrimizin siyasi və iqtisadi əlaqələrinin möhkəm zəmində inkişafına xidmət edərdi. Onu da bildirim ki, bu həm də türk birliyinə böyük töhfə olardı. Bu mükafatın təsis edilməsi reallaşarsa, bu, İsmayıl Qaspıralının “Dildə, fikirdə və işdə birlik” ideyasının gerçəkləşməsi deməkdir”.
İradə SARIYEVA
