Yazılan hər kitab heç də birmənalı qarşılana bilməz. Bu aksiomadır. Bəzən elə kitablara, onların içində elə mübahisəli, eyni zamanda da diqqətçəkən, marağa səbəb olan faktlara, yazılara, bəzən iddialara rast gəlirik ki, buna reaksiyasız ötüşə bilmirik.
Yazıçı-tədqiqatçı Paşa Yaqub hər zaman diskussiyalara, mübahisələrə, bəzən isə heyrətə səbəb olan yazılar müəllifi kimi tanınır. P.Yaqubun indiyə qədər bir neçə kitabı nəşr olunub. Bu günlərdə isə onun yeni kitabı işıq üzü görüb. “Təbabətin sirləri” adlanan kitabında P.Yaqub xeyli elmi və ictimai müzakirəyə səbəb ola biləcək məsələlərə toxunub.
“Zərdabi LTD” MMC-də nəşr edilən kitabın annatasiyasında qeyd edilir ki, müəllif nəşrdə müxtəlif xəstəliklərin elmə məlum olmayan yaranma səbəblərini araşdırır və özünəməxsus müalicə metodunu izah edir. Kitab həkimlər, psixoloqlar və müxtəlif xəstəliklərdən əziyyət çəkən insanlar üçün nəzərdə tutulur.
Kitabda diqqətçəkən və gerçək fikir dartışmasına səbəb olan bir məqam var ki, onun üzərindən keçə bilmədik. Bu, Mendeleyevin elmdə yüksək qəbul edilən Dövri Sistemi ilə bağlıdır. Müəllif qeyd edir ki, Mendeleyev sağ olarkən tərtib etdiyi Elementlərin Dövri Sistemi Cədvəlinin orijinalında “Efir” adlı element mövcud olub. “1906-cı ildə nəşr olunan “Kimyanın əsasları” kitabına (8-ci nəşr) Mendeleyevin əsl cədvəli salınmışdı. Kimyəvi işarəsi “X” olan bu elementi Mendeleyev öz cədvəlində “Nyutoniy” adlandırmışdı. Cədvəlin yuxarı sol küncündə yerləşən bu maddə “Dünya efiri” idi. Cədvəldə “Efir” “Hidrogen”dən əvvəl yazılmışdı, sıfır qrupuna, sıfır sırasına daxil edilmiş yeganə element idi. Atom kütləsi 0, 4 olan bu element yer üzündə hər yerdə mövcuddur. Bu maddə əsl enerji daşıyıcısıdır” - deyə yazan P.Yaqub qeyd edir ki, Mendeleyevin vəfatından sonra “Efir” Mendeleyevin Elementlərin Dövri Sistemi Cədvəlindən çıxarılıb.
“Mendeleyevin vəfatından sonra (1907) bəşəriyyətin tərəqqisini istəməyən qüvvələr cədvəl üzərində dəyişiklik edib, “Efir” elementini oradan xaric etdilər, 0 qrupunu ləğv etdilər” - deyə qeyd edən P.Yaqubun bu fikirlərinin elmi ictimaiyyətdə necə qarşılanacağını bilmirik.
Qeyd edək ki, Dövri Sistem Cədvəlini 1 mart 1869-cu ildə rus alimi D.İ.Mendeleyev tərtib edib. Həmin cədvələ cəmi 63 element daxil edilib.
İradə SARIYEVA
