Nəsimi rayonunda iyulun 2-də Azərbaycan Polisinin 100-cü ildönümü münasibətilə tədbir keçirilib.
Nəsimi RİH-dən “Bakı Xəbər”ə verilən məlumata görə, tədbiri giriş sözü ilə açan rayon Polis İdarəsinin rəisi, polis polkovniki Musa Musayev tədbir iştirakçılarını Azərbaycan polisinin yaranmasının 100 illiyi və 2 iyul – Azərbaycan Polisi günü münasibətilə təbrik edərək, rayonda xidmət edən polis əməkdaşlarına gələcək fəaliyyətlərində uğurlar arzulayıb.
Sonra rayon Polis İdarəsi rəisinin şəxsi heyətlə iş üzrə köməkçisi, polis polkovnik-leytenantı Vüsal Rüstəmov çıxış edərək bildirib ki, Daxili İşlər Nazirliyi və onun təşkilati strukturu olan polis orqanları 1918-1920-ci illəri əhatə edən fəaliyyəti dövründə böyük vətənpərvərliklə ilk müstəqil dövlətimizin milli maraqlarının müdafiəsində mühüm rol oynayıb, cümhuriyyətin süqutundan sonra Azərbaycanın Sovet İttifaqının tərkibində olduğu 70 il ərzində inkişaf edib, ictimai asayişin qorunmasında yüksək nəticələr və zəngin təcrübə qazanıb. Xüsusilə ulu öndər Heydər Əliyevin rəhbərliyi ilə respublikamızın iqtisadi, sosial və digər sahələrdə böyük uğurlar qazandığı 1970-1980-ci illər Daxili İşlər Nazirliyinin tarixinə ən mühüm mərhələ kimi düşüb. Şəxsi heyətin məhz milli ruhda formalaşmasının nəticəsi idi ki, 1988-ci ildə Ermənistanın Azərbaycana qarşı hərbi təcavüzünü ilk olaraq rəşadətlə dəf edən nizami qüvvə milis, sonrakı illərdə Daxili Qoşun hissələri oldu. Bu döyüşlərdə 1695 polis əməkdaşı və hərbi qulluqçu şəhidlik zirvəsinə ucalıb, 1710 nəfər isə yaralanıb. Göstərdiyi şücaət və igidliyə görə polis sıralarından 67 nəfər “Azərbaycanın Milli Qəhrəmanı” adına, 1143 nəfər orden və medallara layiq görülüb.
Nəsimi rayon İcra Hakimiyyətinin başçısı Asif Əsgərov da çıxışında tədbir iştirakçılarını Azərbaycan Polisinin yaranmasının 100-cü ildönümü və Azərbaycan Polisi günü münasibətilə təbrik edərək, Azərbaycan Polisinin keçdiyi şanlı tarixi yoldan geniş söhbət açıb, Azərbaycan Prezidentinin Sərəncamı ilə “Vətən uğrunda” medalı ilə təltif edilmiş rayon Polis İdarəsinin rəisi Musa Musayevə gələcək fəaliyyətində uğurlar arzulayıb.
Asif Əsgərov çıxışına davam edərək bildirib ki, Azərbaycan Polisi güclü maddi-texniki bazası, ictimai asayişin, qanunçuluğun və hüquq qaydasının qorunması üzrə dəqiq təşkil edilmiş sistemi və peşəkar kadr korpusu olan vahid mərkəzləşdirilmiş hüquq-mühafizə orqanıdır. Prezident İlham Əliyevin diqqət və qayğısı sayəsində davam edən bu inkişaf və modernləşmə vətəndaşlarımızın qanunla qorunan hüquq və mənafelərini etibarlı müdafiə etməyə, cinayətkarlığa, onun transmilli mütəşəkkil növlərinə qarşı mübarizədə adekvat cavab tədbirləri görməyə tam imkan verir.
Tədbirin sonunda bir qrup polis əməkdaşına rayon İcra Hakimiyyəti başçısının Fəxri Fərmanları və xatirə hədiyyələri təqdim olunub.
Baki-xeber.com
