Fatimə Hacıbəyli: “Aliment ala bilməyənlərə büdcədən vəsait veriləcək, ata isə əvəzində onun övladı üçün verilən alimenti və onun faizini bankların birinə ödəyəcək”
Boşanmadan sonra yaranan ən böyük problemlərdən biri də alimentlərin verilməsi ilə bağlı olur. Çünki qanuna əsasən, boşandıqdan sonra uşaq valideynlərdən birinin yanında qalarsa, digər valideyn aliment ödəməlidir. Çox zaman uşaqlar anaları ilə qalır və tənha qadınlar üçün uşaqlara baxmaq o qədər də asan başa gəlmir. Bu məsələ elə bir həddə gəlib çatıb ki, bir çox valideyn məsuliyyəti öz üzərindən atır, müxtəlif üsullarla aliment ödəməkdən boyun qaçırır.
Qeyd edək ki, alimentin ödənilməsi ilə bağlı yeni mexanizm yaradıla bilər. Yəni aliment ilkin olaraq dövlət büdcəsindən ödəniləcək. Daha sonra isə icraedici şəxslər alimentin məbləğini faizi ilə birgə dövlət büdcəsinə qaytarmalıdırlar. Bunun üçün qanunvericilikdə dəyişikliklər edilməlidir. Ailə, Qadın və Uşaq Problemləri üzrə Dövlət Komitəsi Aliment Fondunun yaradılması üçün Nazirlər Kabinetinə rəsmi şəkildə təklif göndərib.
Komitənin informasiya və analitik araşdırmalar şöbəsinin müdiri Elgün Səfərov deyir ki, yeni mexanizmə görə, məhkəmə qərarı ilə məsuliyyətə cəlb edilən şəxs alimenti ödəmədiyi təqdirdə məşğulluğa cəlb ediləcək.
Alimentin ödənilməsi üçün yeni mexanizmin yaradılmasının vacibliyi barədə danışan “Vəfa” Sosial İctimai Birliyinin rəhbəri Fatimə Hacıbəyli “Bakı-Xəbər”ə açıqlamasında qeyd etdi ki, Aliment Fondu yaradılarsa, aliment ala bilməyənlər dövlətin dəstəyini görəcək. Dövlət qurumu vətəndaşların hüquqlarını müdafiə edəcək: “Aliment ala bilməyənlərə dövlət büdcəsindən vəsait veriləcək. Bu vəsait sayəsində həmin şəxs öz ehtiyacını təmin edəcək. Ata isə əvəzində onun övladı üçün verilən alimenti və onun faizini bankların birinə ödəyəcək. Belə olan halda, tənha ana atanın “işləmirəm” bəhanəsini gətirərək, aliment ödəməməsi problemi ilə qarşılaşmayacaq. Bu olduqca müsbət və alqışlanmalı mexanizmdir. Tətbiq olunarsa, ana aliment sıxıntısından azad olar.
Ancaq onu da nəzərə almaq lazımdır ki, bu qərar büdcə üçün də müəyyən problemlərə səbəb ola bilər. Bəllidir ki, bu gün biz boşanmaların sayının sürətlə artmasına şahid oluruq. Bu qədər boşanma fonunda dövlətin həmin alimentləri qarşılamağa imkanının çatıb-çatmayacağı sual altındadır. Boşanan kişilərin əksəriyyəti ölkəni tərk edib Rusiyaya, Türkiyəyə gedir. Dövlət həmin şəxslərin əvəzinə aliment kimi verdiyi vəsaiti kimdən geri alacaq?”.
Günel CƏLİLOVA
