Ahıllara, müharibə veteranları, şəhid ailələri və əlil vətəndaşlara dövlət qayğısının gücləndirilməsi siyasətinə uyğun olaraq, Nəsimi Rayon İcra Hakimiyyəti də bir sıra tədbirlər təşkil edir. Belə tədbirlərdən biri də iyunun 28-də keçirilib.
Nəsimi RİH-dən “Bakı Xəbər”ə verilən məlumata görə, həmin gün bir qrup müharibə veteranı, şəhid ailələrinin nümayəndələri, ahıllar və əlillərin xüsusi avtobusla Pirşağı qəsəbəsindəki İstirahət Mərkəzinə gedişi təşkil olunub. Nəsimi rayon İcra Hakimiyyəti başçısının birinci müavini Gülarə Verdiyeva qonaqları salamlayaraq, ölkəmizdə dövlət səviyyəsində ahıl insanlara, veteranlara, şəhid ailələrinə, əlillərə, aztəminatlı ailələrə göstərilən diqqət və qayğıdan danışıb. Gülarə Verdiyeva bildirib ki, bu gün dövlət ahıl, əlil və xüsusi qayğıya ehtiyacı olan vətəndaşların çoxsaylı sosial proqramlara, o cümlədən, mənzil, reabilitasiya, pulsuz istirahət, texniki-bərpa və nəqliyyat vasitələri ilə təminat proqramlarına cəlb olunmasını həyata keçirir. Bu da xüsusi qayğıya ehtiyacı olan vətəndaşlara dövlət qayğısının gücləndirilməsi siyasətinə uyğun olaraq şəxslərin rifah halını yaxşılaşdırmaq və onlara dövlətin dəstək və davamlı qayğısının bariz nümunəsidir. Nahar süfrəsi arxasında davam edən görüşdə rayon ağsaqqalı, Böyük Vətən Müharibəsi, Əmək və Silahlı Qüvvələr Veteranları Şurasının Nəsimi rayon şöbəsinin sədri İsmayıl Fərəcov, Böyük Vətən Müharibəsi veteranı Ağababa İsgəndərov, əmək veteranları Məleykə Ağazadə, Novruz Quliyev, və digərləri onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını ifadə ediblər.
