Biləcəridə yaşayan Yeganə Səlimova daha nələr yazdı?
Redaksiyamıza Bakı şəhəri, Binəqədi rayonu, Biləcəri qəsəbəsi 5057/68, ev 4, mənzil 18 ünvanında yaşayan Səlimova Yeganə Abduləvvəl qızı tərəfindən məktub daxil olub.
Y.Səlimova qəzetimiz vasitəsilə qardaşı Mustafa Səlimovun səhhətində yaranan problemlərin operativ şəkildə aradan qaldırılması üçün dəstək göstərən Topçubaşov adına Xəstəxananın Angeoloji şöbəsinin baş həkimi İsmayıl Mirzəliyevə, sözügedən şöbənin cərrahı Sevinc Binyətovaya, endokrinoloq Rəxşanə Süleymanovaya və Nərgiz xanıma öz təşəkkürünü bildirir.
Y.Səlimova yazır ki, qardaşı Mustafa Səlimov 10 ilə yaxın müddətdir şəkər xəstəliyindən əziyyət çəkir və son vaxtlar xəstənin ayaq barmaqlarında, dabanlarında qanqren yaranıb. Qardaşının maddi cəhətdən imkansız olduğunu qeyd edən Y.Səlimovanın yazdığına görə, qardaşı Şəki şəhərində yaşayır və o, göndərişlə Topçubaşov adına Xəstəxanaya üz tutub. Qardaşının bu xəstəxanada olduğu müddətdə şöbənin baş həkim İ.Mirzəliyevin və cərrah S.Binyətovanın qayğısı ilə əhatə olunduğunu vurğulayan məktub müəllifi bildirir ki, qardaşını Sevinc xanım böyük qayğı ilə əməliyyat edib. “Sevinc xanım qardaşıma təkcə həkim kimi deyil, həm də bir ana, bacı kimi böyük qayğı-diqqət göstərdi. Qardaşımı əməliyyat etdikdən sonra da o daim onun səhhətini nəzarətdə saxladı və qardaşıma əlindən gələn köməyi göstərdi. Mən ailəmiz adından həm S.Binyətovaya, həm də belə bir savadlı, qayğıkeş həkimə görə Azərbaycan Respublikası Səhiyyə Nazirliyinə öz təşəkkürümü bildirirəm. Topçubaşov adına Xəstəxananın həkimləri xəstələrin qayğısına qalır, hər bir xəstəyə öz doğmaları kimi yanaşırlar. Xəstəxananın həkimi Kənan bəydən də çox razıyıq. Şöbənin baş həkimi İsmayıl Mirzəliyev, cərrah-həkim S.Binyətova, endokrinoloq R.Süleymanova qardaşıma həm həkim kimi, həm də bir insan kimi böyük dəstək göstərdilər, onun sağalacağına ümid bəslədiklərini bildirdilər. Belə nəzakətli, qayğıkeş həkim kollektivinin olması bizə böyük ümid verir. Qardaşımın ayağının dizdən kəsilmək qorxusu vardı, lakin həkimlərin səyi nəticəsində onun yalnız barmaqlarında və dabanında əməliyyat aparıldı. Başqa həkimlər bizə demişdilər ki, qardaşımın ayağı tamamilə kəsilməlidir. Lakin Sevinc xanım onun ayağını kəsmədi. Bu gün qardaşım Topçubaşov adına Xəstəxanada yatır və müalicəsini davam etdirir. Sevinc xanım hər gün onun yarasının sağalmasına nəzarət edir, yaralarını təmizləyib sarıyır. Sevinc xanım qardaşıma hər cür qayğı göstərir, onun tezliklə sağalıb ayağa duracağını deyir. Həkimin qardaşıma göstərdiyi mənəvi dəstək onun yaşamağa ümidini artırır”.
Y.Səlimova sözügedən xəstəxananın qapıçısından tutmuş, baş həkiminə, bütün əməkdaşlarına qədər hər kəsin qayğıkeş olduğunu vurğulayır. “Həmin şöbənin baş həkimi İ.Mirzəliyev və cərrah S.Binyətova öz həkimlik borclarını vicdanla yerinə yetirirlər. Onlar əsl ləyaqətli Azərbaycan vətəndaşlarıdır. Bütün ailəmiz bu qayğıkeş insanlara, gözəl həkimlərə öz dərin təşəkkürünü bildirir. Nə yaxşı ki, respublikamızda belə gözəl həkimlər var və hər bir xəstə tərəddüd etmədən öz sağlamlığını Topçubaşov adına Xəstəxananın əməkdaşlarına etibar edə bilər” - deyə Y.Səlimova yazır.
İradə SARIYEVA
