Aynur Musayeva: “Bağçalara quraşdırılan müşahidə kameraları vasitəsilə təhlükəsizlik təmin olunacaq”
Bakının uşaq bağçalarında valideynlər üçün fərdi videomüşahidə yaradıla bilər. Bu barədə media nümayəndələrinə "Mimobile"ın idarə heyətinin üzvü (Xiaomi məhsulunun Azərbaycanda rəsmi distribütoru) Cümşüd Əliyev bildirib.
O qeyd edib ki, hazırda bu servis sınaq mərhələsindədir və servisin sınağının uğurlu olacağından asılı olaraq, paytaxtın uşaq bağçalarına təklif olunacaq: "Söhbət uşaq bağçasında 360 dərəcəli kameraların quraşdırılmasından gedir ki, bu da hər bir valideynə smartfon vasitəsilə istənilən vaxt uşağının nə ilə məşğul olduğunu görmək imkanı yaradır. Uşaqla sistem vasitəsilə ünsiyyət qurmaq mümkün olacaq.
Valideynlər kameralara çıxışı xüsusi IOS və “Android” distributivlər vasitəsilə əldə edə biləcəklər. Kameraların bağçalarda quraşdırılması ödənişlə həyata keçiriləcək. Valideynlər isə onlardan ödənişsiz olaraq istifadə edə biləcəklər. Bundan başqa, ödəniş məlumatların saxlanması tələb olunduğu halda istənilə bilər".
Uşaq bağçalarında valideynlər üçün fərdi videomüşahidə yaradılmasını ekspertlər müsbət dəyərləndirirlər. Onların fikrincə, müşahidə kamerası vasistəsilə valideynlər övladının gün ərzində nə ilə məşğul olduğunu izləyə biləcəklər.
“Jaləm” Uşaq İnkişaf Mərkəzinin direktoru, psixoloq Aynur Musayeva “Bakı-Xəbər”ə açıqlamasında qeyd etdi ki, kamera quraşdırılan təhsil müəssisəsində müəllim və tərbiyəçilər özlərini daha məsuliyyətli hiss edəcəklər: "Bu, bütün dünyada qəbul olunmuş uğurlu sistemdir. Uşaqların təhlükəsizlik məsələsi də bu yolla həll olunur.
Son zamanlar bağçalarda uşaqlara qarşı zorakılıq faktlarının yaşanmasına dair bir neçə kadrlar yayımlanıb. Baş verən xoşagəlməz hadisələr valideynləri narahat edir. Onların övladlarının təhlükəsizliyi, eyni zamanda gününü necə keçirməsini öyrənmək baxımından müşahidə kamerasının bağçalara quraşdırılması vacibdir. Kamera bütün ərazilərdə təhlükəsizlik və ya nəzarət məqsədilə quraşdırılır
Eyni zamanda, valideyn tərbiyəçinin onun övladı ilə necə davrandığını müşahidə edə bilər. Həmçinin, bağçada uşaqlara verilən qidaya nəzarət olunacaq. Bağçaya yerləşdirilən videokamera vasitəsilə valideynlər övladının qidalandığı təamın necə hazırlandığını görə bilərlər. Təbii ki, belə olan halda, həm tərbiyəçilər, həm də xörək bişirən aşpazlar öz işlərində daha məsuliyyətli olacaqlar".
Həmsöhbətimiz onu da bildirdi ki, uşaq bağçalarına kameraların quraşdırılması müsbət haldır. Bu kameralar vasitəsilə bağçanın təhlükəsizliyi təmin olunacaq: "Bağçaya kimin gəldiyi və çıxdığı bəlli olacaq. Valideynlərin də ürəyi rahat olar ki, onların övladlarını yad bir adam narahat edə bilməz".
Günel CƏLİLOVA
