Məlahət Mürşüdlü: “Əmək bazarında hansı peşəyə ehtiyac olduğu araşdırılmalı və özəl ali təhsil müəssisəsində həmin ixtisaslar üzrə kadrlar hazırlanmalıdır”
“Azərbaycanda özəl ali təhsil müəssisələri şəbəkəsini artırmaq lazımdır. Məhz bununla yuxarı təhsil pillələrində əlçatanlığın artırılması mümkün olar”. Bunu baş nazirin müavini Əli Əhmədov deyib. Onun sözlərinə görə, Azərbaycanda təhsil iqtisadiyyatın inkişafına, dövlətin iqtisadi gücünün artmasına kömək etməlidir: "Bunlara necə nail olunmalıdır? Təhsil universal sahədir. Təhsil sahəsinin inkişafını yalnız təhsil qurumlarından gözləmək lazım deyil. Cəmiyyətin təhsilə olan münasibəti dəyişməlidir. Dövlətin təhsilə olan diqqət və qayğısının artmasına ehtiyac var. Dövlətin qarşısına qoyduğu əsas məsələ də təhsilin inkişaf etdirilməsidir".
Ə.Əhmədov bildirib ki, Azərbaycanda orta təhsil əlçatanlılıq baxımından təmin edilib: "Yuxarı təhsil səviyyələrinin də əlçatanlılığının artırılmasına ehtiyac var. Azərbaycan əhalisinin 1,3 faizi tələbədir. Azərbaycanda universitetlərə sərbəstliyin verilməsi sahəsində cəsarətli addımlar atılmalıdır. Son illər Azərbaycanda təhsil islahatları dərinləşməkdə davam edir və bu istiqamətdə görülən işlər öz bəhrəsini verir. Azərbaycanda dərin islahatlar həyata keçirilir - iqtisadiyyatdan tutmuş, digər sahələrə kimi. Biz həyatımızı islahatlardan kənarda təsəvvür etmirik. Təhsil sferası da islahatlar məfhumundan kənarda qala bilməz. İqtisadiyyatla, təhsillə bağlı hədəflərimiz tamamilə aydındır. Təhsilin inkişafı Azərbaycan cəmiyyətinin mədəni səviyyəsinin, iqtisadiyyatının daha yuxarı pilləyə qalxmasına, dövlətin qüdrətinin artmasına gətirib çıxarmalıdır".
Özəl ali məktəblərin yaradılması barədə fikir bildirən Azad Müəllimlər Birliyinin rəhbəri Məlahət Mürşüdlü “Bakı-Xəbər”ə açıqlamasında qeyd etdi ki, təhsil bazar iqtisadiyyatına uyğun inkişaf etməlidir: “Özəl sektorun inkişafı sağlam rəqabət formasında olacaqsa, bu yalnız təhsilin tərəqqisinə səbəb ola bilər. Digər sahələrdə olduğu kimi, təhsildə də özəl sektor olmalıdır. Ancaq bu gün Azərbaycanda özəl ali məktəbə ehtiyacın olub-olmaması araşdırılmalıdır. Özəl ali məktəblər bizə pedaqoji işçilər verəcəklərsə, buna ehtiyac yoxdur. Çünki dövlət universitetləri bizə yetərincə müəllim verirlər. Başqa sahələr üzrə ixtisaslaşan kadrlar hazırlayacaqlarsa, bu sevindirici olar. Nəzərə almaq lazımdır ki, gələcəyin ixtisasları deyilən peşələr var. O ixtisaslar üzrə mütəxəssislərin hazırlanmasına ehtiyac var. Texniki sahələr üzrə kadrlarımız xaricdə təhsil almaqdansa, ölkədə fəaliyyət göstərən özəl ali məktəblərdə təhsil almalıdırlar. Əmək bazarında hansı peşəyə ehtiyac olduğu araşdırılmalıdır. Özəl ali təhsil müəssisəsində həmin ixtisaslar üzrə kadrlar hazırlanmalıdır”.
Günel CƏLİLOVA
