Ənvər Çingizoğlu: “Azərbaycan nümayəndələri sözügedən festivalda iştirak etsəydilər, onlar erməni saxtakarlığını ifşa edərdilər”
Ermənilər Azərbaycana qarşı saxtakar əməllərini şərait olan hər bir yerdə davam etdirirlər. Məlumatlara görə, iyun ayının 27-də Vaşinqtonda “Folklayf” adlı festival keçiriləcək. Ermənistan mətbuatının yazdığına görə, bu il 50 illik yubileyi keçiriləcək festivalda Ermənistan da iştirak edəcək. Özü də bu festivala Azərbaycan mədəniyyətinə, mətbəxinə aid olan nümunələrlə.
Ermənilər yazırlar ki, festival iştirakçıları, seyrçiləri 2 həftə “erməni ruhu”na qonaq olacaq və onlara “erməni mətbəxi”ndən dolma, lavaş, “erməni mədəniyyətinin nümunəsi olan” xalçalar, tikmə sənəti növləri, dulusçuluq nümunələri təqdim ediləcək. Onların yazdığına görə, ermənilər ilk dəfədir “Folklayf” festivalında iştirak edirlər. Qeyd edilənə görə, ermənilər festival çərçivəsində qonaqları əsl “erməni mədəniyyəti” ilə tanış edəcəklər.
Ümumiyyətlə, ermənilərin bütün beynəlxalq festivallara dəvət edilmək üçün dəridən-qabıqdan çıxması hər kəsə məlumdur. Onlar bu festivallara saxta erməni mədəniyyətinin nümunələrini aparır və onları öz adlarından təqdim edirlər.
Sözügedən festivalda Azərbaycanın təmsil edilməsinə gəlincə, Mədəniyyət Nazirliyindən “Bakı-Xəbər”ə verilən məlumata görə, ölkəmiz bu festivalda iştirak etmir.
Qeyd edək ki, Azərbaycan dünya ölkələrində keçirilən beynəlxalq festivallarda hər zaman geniş heyətlə təmsil olunur. Ölkəmizin “Folklayf” festivalına hansı səbəbdən dəvət edilməməsi hələ də qaranlıq qalır. Bu festivalda Ermənistanın təmsil olunması və Azərbaycana aid mətbəx, xalq sənəti növlərini öz adlarına təqdim etmək iddiası ilə çıxış etməsi isə yolverilməzdir.
Tanınmış etnoqraf-alim Ənvər Çingizoğlu bizimlə söhbətində bildirdi ki, Cənubi Qafqazda zəngin mədəniyyəti, çeşidli sənətkarlıq nümunələri, tətbiqi sənət növləri olan ölkə Azərbaycandır. O, ehtimal edir ki, bu festivalda Azərbaycanın iştirak etməməsi erməni lobbisinin, diasporunun əməlləridir. “Folklayf” festivalı elə də nüfuzlu festival deyil. Bu festival konkret olaraq Vaşinqtonda fəaliyyət göstərən Smitsonov İnstitutu tərəfindən keçirilir. Yəni elə də geniş səciyyə daşımır. Ola bilsin ki, bu institutla erməni lobbisi ciddi əlaqələr qurub və bu səbəbdən də ermənilər orada iştirak edəcəklər. Ermənilərin orada Azərbaycan mətbəxinin nümunələrini öz adları ilə təqdim etməsi yolverilməzdir. Dolma milli Azərbaycan xörəyidir və keçən il bizim mətbəxin şah nümunələrindən biri olaraq UNESCO tərəfindən də təsdiqlənib. Bu mənada, ermənilərin bu addımı saxtakarlıqdan başqa bir şey deyil. Azərbaycan xalçası da, dulusçuluq, tikmə sənəti növləri də Azərbaycana məxsusdur. Erməni nə zaman mədəniyyət yaradıb ki? Onlar həmişə bizim və başqa xalqların mədəniyyət nümunələrini öz adlarına çıxıblar. Hesab edirəm ki, bu festivala Azərbaycan da dəvət edilməli idi. Azərbaycan nümayəndələri sözügedən festivalda iştirak etsəydilər, onlar erməni saxtakarlığını ifşa edərdilər. Görünür, bu baxımdan, erməni lobbisinin təzyiqi ilə Azərbaycan o festivala dəvət edilməyib. Bu ancaq onunla bağlı ola bilər. Çünki bizim orada iştirakımız qətiyyən ermənilərə və onların amerikalı havadarlarına sərf etmir” - deyə bildirən Ə.Çingizoğlunun sözlərinə görə, Azərbaycan mədəniyyəti çox unikaldır və ermənilər o mədəniyyət nümunələrini təkrarlaya bilməzlər.
Etnoqraf-alim hesab edir ki, ermənilər Azərbaycan xalçalarının çeşnilərini oğurlasalar da, onların toxuduğu xalçalar bizim analarımızın, nənələrimizin yaratdığı gözəlliyi əks etdirə bilməz.
Ə.Çingizoğlu bildirdi ki, bu festivalda “erməni mədəniyyəti” adı altında təqdim edilən bütün etnoqrafik materialların arasında mütləq olaraq onların işğal etdikləri torpaqlarımızdan yağmaladıqları sərvətlərimiz də var: “Məni əsas narahat edən bir məsələ var. Bu da ondan ibarətdir ki, ermənilər bu festivalda Qarabağ mədəniyyətinə, etnoqrafiyasına, tikmə, toxuma sənətinə aid olan nümunələr təqdim edə bilərlər. O nümunələri isə onlar işğal zamanı əldə ediblər. Əslində, işğal zamanı əldə edilən mədəni sərvətin sərgiyə çıxarılması, festivalda erməni adı ilə təqdim edilməsi böyük cinayətdir. Əgər onlar Qarabağdan, Kəlbəcərdən, Laçından apardıqları xalçaları, etnoqrafik nümunələri festival çərçivəsində sərgiləyəcəklərsə, mütləq qeyd etməlidirlər ki, bu nümunələr Azərbaycan xalqına, Azərbaycan Respublikasına aiddir, biz onu onların torpaqlarını işğal edərkən əldə etmişik. Bu daha uyğun olardı. Ümumiyyətlə, dünyada belə bir təcrübə var. Böyük müharibələr dövründə işğalçıların əldə etdikləri mədəni sərvətlər sərgilənərkən mütləq onun haradan əldə edildiyi göstərilirdi. Ermənilər, təbii ki, bunu etməyəcəklər. Etsələr, bütün saxtakar əməlləri üzə çıxacaq”.
Ə.Çingizoğlunun sözlərinə görə, bu festival keçirilərkən Vaşinqtondakı Azərbaycan diasporunun nümayəndələri, azərbaycanlılar da orada seyrçi kimi iştirak etsə, çox yaxşı olar. O, hesab edir ki, Azərbaycan tərəfi hər hansı formadasa ermənilərin Azərbaycan mədəniyyətini saxtalaşdırması ilə bağlı münasibət bildirməlidir. “Çox təəssüf ki, ermənilər iki həftə ərzində mədəniyyətimizə, mətbəximizə qarşı saxtakar əməllərini davam etdirəcəklər. Bu məndə təəssüf doğurur”- deyə Ə.Çingizoğlu bildirdi.
İradə SARIYEVA
