Şakir Ağayev: “… buna nəzarətin hansı şəkildə olacağı bəlli deyil”
Xəbər verildiyi kimi, Azərbaycanın telekanallarında məhdudiyyət tətbiq ediləcək. Belə ki, Azərbaycanda telekanallarda "16+" yaş kateqoriyası üçün nəzərdə tutulan qorxu məzmunlu informasiyaların yerli vaxtla saat 7-dən 21-dək, uşaqlar arasında dövriyyəsi qadağan edilən informasiyaların, eləcə də erotik məzmunlu informasiyaların yerli vaxtla saat 6-dan 23-dək yayımına məhdudiyyət qoyulacaq.
Qeyd edək ki, bu məsələ Milli Məclisdə I oxunuşda qəbul edilən "Uşaqların zərərli informasiyadan qorunması haqqında" qanun layihəsində öz əksini tapıb. Layihəyə görə, uşaqlar arasında dövriyyəsi qadağan edilən informasiyalara zorakılığı və qəddarlığı, cəmiyyət əleyhinə və hüquqazidd hərəkətləri, o cümlədən cinayətləri, uşaqların həyat və təhlükəsizliyinə potensial təhlükə yaradan əməlləri təbliğ edən, ailə institutunu nüfuzdan salan, əxlaqdan kənar leksik (söyüş) məzmunlu, pornoqrafik xarakterli informasiyalar aiddir. Teleradio yayımı vasitəsilə "Universal", "6-", "6+" və "12+" yaş kateqoriyalarına aid informasiya məhsullarının yayımlanmasına isə vaxt məhdudiyyəti qoyulmayacaq. Layihədə müxtəlif yaş qrupuna aid olan uşaqların normaya uyğun psixi inkişafının xüsusiyyətləri nəzərə alınmaqla informasiya məhsulunun yaş kateqoriyasına uyğun təsnifatı da aparılıb. Bu təsnifata uyğun olaraq, "Universal" yaş kateqoriyasına aid edilən informasiyaların istənilən yaş qrupları üzrə dövriyyəsinə məhdudiyyət qoyulmayacaq. "6 yaşadək" yaş kateqoriyasına aid olan infromasiyaların 6 yaşı tamam olmamış uşaqlar, "6 yaşdan yuxarı" yaş kateqoriyasına aid olan infromasiyaların 6 yaşı tamam olmuş uşaqlar, "12 yaşdan yuxarı" yaş kateqoriyasına aid olan infromasiyaların 12 yaşı tamam olmuş uşaqlar, "16 yaşdan yuxarı" yaş kateqoriyasına aid olan infromasiyaların 16 yaşı tamam olmuş uşaqlar arasında dövriyyəsinə yol veriləcək. "18 yaşdan yuxarı" yaş kateqoriyasına aid olan informasiyaların uşaqlar arasında dövriyyəsinə yol verilməyəcək.
Telekanallarda yaş məhdudiyyətinin tətbiq olunması barədə fikir bildirən “Novoye Vremya” qəzetinin baş redaktoru Şakir Ağayev “Bakı-Xəbər”ə açıqlamasında qeyd etdi ki, Azərbaycan kanallarında məhdudiyyət qoyulması təqdirəlayiqdir: “Beynəlxalq standartlara əsasən, telekanallarda yaş məhdudiyyəti tətbiq olunmalıdır. Elə film və ya verilişlər var ki, onlara müəyyən yaşa qədər olan yeniyetmələrin baxması düzgün deyil. Qorxulu filmlər, istər-istəməz, uşaq psixologiyasına mənfi təsir göstərir. Eynilə, 18 yaşı tamam olmayan şəxslərin erotik filmə baxması da düzgün deyil. Bu tip veriliş və ya filmlər uşaq və yeniyetmələrin tərbiyəsinə, əxlaqına, həyat tərzinə təsir göstərir. Bu səbəbdən də yaş məhdudiyyətinin tətbiq olunmasının tərəfdarıyam. Ancaq buna nəzarətin hansı şəkildə olacağı sual doğurur. Uşaqlar üçün uyğun olmayan veriliş və ya filmlərin televiziya kanallarında müəyyən saatdan sonra yayımlanmasına evlərdə necə nəzarət olunacaq? Ailələrdə də məhdudiyyət qorunub saxlanmalıdır. Saat 21:00-dən sonra uşaqların onlar üçün uyğun olmayan filmlərə baxmayacağına necə əmin olmaq olar?
Onu da deyim ki, uzun illərdir uşaqların internet klublara getməsinin qarşısının alınması istiqamətində işlər görülsə də, orta məktəblərin yaxınlığında internet klublar fəaliyyət göstərir. Bu səbəbdən də hesab edirəm ki, telekanallarda yaş məhdudiyyəti tətbiq olunsa belə, buna necə nəzarət olunacağı bəlli deyil”.
Günel CƏLİLOVA
