Təranə Əsədova: “Gənc nəslin təsviri incəsənətə maraq göstərməsi və onların işlərinə mötəbər bir qurum tərəfindən dəstək verilməsi təqdirəlayiqdir”
Rauf Əbdülhüseynoğlu: “Hesab edirəm ki, bu, yeniyetmə və gənc rəssamların həvəslənməsinə, onların təsviri incəsənətin digər növlərinə də meyl göstərməsinə imkanlar açır”
İstedadlı uşaqları, yeniyetmə və gəncləri axtarıb üzə çıxarmaq, onların bacarıqlarını inkişaf etdirmək yönündə addımlar atmaq, layihələr həyata keçirmək müsbət haldır. Məlum olduğu kimi, Heydər Əliyev Fondu zaman-zaman istedadlı insanlara dəstək verib, onların potensialının üzə çıxarılmasında mühüm rol oynayıb.
Hər insanda rəssamlıq bacarığı, istedadı olmur. Bu qabiliyyətə malik olan uşaqlara, yeniyetmə və gənclərə Heydər Əliyev Fondu mütəmadi olaraq yardım edir. Bu qurum yalnız paytaxtda deyil, bölgələrdə də rəssamlara dəstək göstərir. Belə ki, Heydər Əliyev Fondunun “Regional İnkişaf” İctimai Birliyinin (RİİB) təşkilatçılığı və Azərbaycan Dövlət Rəssamlıq Akademiyasının dəstəyi ilə Göyçay, Lerik və Qusar rayonlarında yeniyetmə və gənclər üçün təsviri sənət növləri üzrə təlimlər təşkil edilib.
“Trend.az”ın məlumatına görə, RİİB-ə üç rayon üzrə daxil olan müraciətlər müsabiqə əsasında seçilib və ümumilikdə, 150 iştirakçı iyunun 1-dən 9-dək nəzəri və praktik təlimlərə cəlb edilib. Azərbaycan Dövlət Rəssamlıq Akademiyasının müəllim-tələbə heyəti tərəfindən aparılan təlimlərdə yeniyetmə və gənclərə rəngkarlıq, xalçaçılıq sənətlərinin incəlikləri öyrədilib. Təlimlərin sonunda iştirakçılara sertifikatlar təqdim olunub.
Qeyd edək ki, layihə regionlarda istedadlı gəncləri üzə çıxarmaq, onların təsviri sənət növləri üzrə bacarıqlarını inkişaf etdirmək məqsədi daşıyır. Onu da vurğulayaq ki, bundan əvvəl Ağdam, Zaqatala və Sabirabad rayonlarında həyata keçirilən layihənin respublikanın digər bölgələrində də davam etdirilməsi nəzərdə tutulur.
Bölgələrdəki yeniyetmə və gənc rəssamların təlimlərə cəlb edilməsinin böyük əhəmiyyəti olduğunu qeyd edən rəssam Təranə Əsədova bizimlə söhbətində bildirdi ki, bu təlimlər istedadlı gənclərə böyük stimul verir. Onun sözlərinə görə, bu gün yeniyetmə və gənc rəssamlara dövlət səviyyəsində maraq, diqqət və qayğı var. Bölgələrdə rəssamlıqla məşğul olan gənclərin təlimlərdə iştirak etməsi, onların təsviri incəsənətin müxtəlif sahələri üzrə əsərlərinin üzə çıxarılması müsbət haldır. “Bu gün paytaxtımızla yanaşı, bölgələrimiz də inkişaf edir. Bölgələrimizdə rəsm qalereyaları, incəsənət mərkəzləri açılıb. Gənc nəslin təsviri incəsənətə maraq göstərməsi və onların işlərinə mötəbər bir qurum tərəfindən dəstək verilməsi təqdirəlayiqdir. Region gənclərinin təsviri incəsənət təlimlərinə cəlb edilməsi onların bu sahəyə marağını artırmaqla yanaşı, həm də onlara yaradıcılıq enerjisi, stimulu verir. Bizim tanınmış rəssamlar arasında müxtəlif bölgələrdə doğulanlar da az deyil. Sözümün canı odur ki, əsl istedad Bakıda da, bölgədə də ola bilər, yetər ki, onların potensialını üzə çıxarmağa dəstək verən olsun. Mən inaıram ki, təlimlərdə iştirak edib sertifikat alan yeniyetmə və gənclər arasında gələcəyin böyük təsviri incəsənət ustaları da var. Çünki təsviri incəsənət elə bir sahədir ki, onunla ancaq bu sahədə istedadı olan adamlar məşğul ola bilərlər. Mən Heydər Əliyev Fondunun “Regional İnkişaf” İctimai Birliyinin (RİİB) təşkilatçılığı və Azərbaycan Dövlət Rəssamlıq Akademiyasının dəstəyi ilə intensiv şəkildə keçirilən təlimləri yüksək dəyərləndirirəm. Hesab edirəm ki, bu təlimlərin müsbət nəticələri özünü yaxın gələcəkdə ifadə edəcək” - deyə bildirən T.Əsədovanın sözlərinə görə, belə təlimlər zamanı bölgələrdəki gənclərin kənarda qalmaması müsbət haldır.
O hesab edir ki, təlimlərdə iştirak edib sertifikat alan gənclərin Bakıda və digər iri şəhərlərdə kollektiv sərgilərini də təşkil etmək lazımdır.
Azərbaycan Rəssamlar İttifaqının üzvü, tanınmış keçəçi rəssam Rauf Əbdülhüseynoğlu da Heydər Əliyev Fondunun “Regional İnkişaf” İctimai Birliyinin (RİİB) təşkilatçılığı və Azərbaycan Dövlət Rəssamlıq Akademiyasının dəstəyi ilə bölgələrdə yeniyetmə və gənclər üçün təsviri sənət növləri üzrə təlimlər təşkil edilməsini müsbət qarşılayır. R.Əbdülhüseynoğlu qeyd edir ki, bu təlimlər gənclərin yaradıcılığa daha böyük maraq göstərməsinə şərait yaradır: “Bölgələrdə yaşayan yeniyetmə və gənc rəssamlar üçün təşkil edilən təsviri-incəsənət təlimlərini yüksək qiymətləndirirəm. Bu olduqca vacib bir məsələdir. Hesab edirəm ki, bu, yeniyetmə və gənc rəssamların həvəslənməsinə, onların təsviri incəsənətin digər növlərinə də meyl göstərməsinə imkanlar açır. Bölgə gəncləri arasında da güclü istedadı olanlar var və onların gələcəkdə peşəkar fırça ustası kimi yetişməsinə bu kimi təlimlər müsbət təsir edir. Bölgə gəncləri artıq bilirlər ki, onların istedad və bacarıqlarına diqqət və qayğı ilə yanaşılır. Bu müsbət haldır”.
İradə SARIYEVA
