Eyyub Hüseynov: “Buna görə KİV və ictimai təşkilatlarla sıx işləmək lazımdır”
Yol kənarlarında, antisanitariya şəraitində ət kəsimi illərdir problem olaraq qalır. Bu problemin qarşısını almaq üçün müasir standartlara cavab verən ət kəsim məntəqələrinin yaradılması haqqında sərəncam imzalanıb.
Prezident İlham Əliyev ölkədə heyvan kəsiminin müasir tələblərə uyğunlaşdırılması, müasir (stasionar, modul və mobil tipli) kəsim məntəqələrinin təşkil olunması, qanunsuz heyvan kəsimi fəaliyyətinin qarşısının alınması, istehlakçıların hüquqlarının müdafiəsi, qida təhlükəsizliyinin təmin edilməsi sahəsində tədbirlərin sistemli və kompleks şəkildə həyata keçirilməsi məqsədilə sərəncam imzalayıb. Sərəncama əsasən, Qida Təhlükəsizliyi Agentliyinə yerli icra hakimiyyəti orqanları ilə birlikdə sahibkarlıq subyektlərini cəlb etməklə baytarlıq-sanitariya və sanitariya-gigiyena tələblərinə uyğun müasir (stasionar, modul və mobil tipli) heyvan kəsimi məntəqələrinin yaradılması (sakinlərin sıxlığı və onlar üçün əlverişli sahələr nəzərə alınmaqla) ilə bağlı tədbirlər görmək, yaradılacaq heyvan kəsimi məntəqələrinin müvafiq laboratoriyalarla təchiz olunmasına dair təkliflərini iki ay müddətində Azərbaycan Respublikasının Prezidentinə təqdim etmək tapşırılıb.
Müasir standartlara cavab verən ət kəsim məntəqələrinin yaradılması haqqında sərəncamın mahiyyəti barədə danışan Azad İstehlakçılar Birliyinin sədri Eyyub Hüseynov qeyd etdi ki, açıq ət kəsiminin qarşısını almaq mümkündür və lazımdır: "Çünki əhali gözləri ilə gördüyü məhsulu almaq istəyir. Bu səbəbdən ilk olaraq əhalinin inamını qazanmaq lazımdır. Məsələn, Yeni Zelandiyada həyətdə ət kəsilirsə, vətəndaş 5 min dollar cərimə edilir. Azərbaycanda ət kəsimi ilə bağlı vəziyyət mürəkkəbdir. Kəsilib satılan ətin kimə, hansı hüquqi və ya fiziki şəxsə aid olduğunu bilmirik. Halbuki, Nazirlər Kabinetinin 94 saylı qərarına görə, bütün malların, məhsulların üzərində istehsalçı firmanın adı olmalıdır".
Həmsöhbətimizin sözlərinə görə, əhalinin maarifçilik səviyyəsi aşağı olduğundan, gözü ilə gördüyü heyvanın ətini almağı üstün tutur: "Əhalinin baytarlara, dövlət qurumlarına inamı yüksək olmalıdır. Qida Təhlükəsizliyi Agentliyi əhalinin inamını qazanmalıdır. Buna görə KİV və ictimai təşkilatlarla sıx işləmək lazımdır. Küçə ət kəsimi biabırçılıqdır, bu halın aradan qaldırılması üçün Qida Təhlükəsizliyi Agentliyi ciddi iş aparmalıdır".
Dadaş HÜSEYNOV
