Bahadur Bilalov: “Çimərlik turizminin inkişafı istiqamətində görülən işlərin nəticəsidir ki, ölkəyə gələn turistlərin sayı ildən-ilə artır”
Azərbaycanda turizmin müxtəlif növləri inkişaf etdirilməkdədir. İnsanları daha çox maraqlandıran turizm istiqamətlərindən biri də çimərlik turizmidir. Çünki bu turizm növü həm istirahət vəd edir, həm də sağlamlıq. Heç təsadüfi deyil ki, 2016-cı ildə Prezident İlham Əliyevin turizmin inkişafına dair əlavə tədbirlər haqqında sərəncamında bu sahənin inkişafına xüsusi diqqət yetirilib. Hətta ötən il ölkə başçısı “Azərbaycan Respublikasında çimərlik turizminin inkişafına dair 2017-2020-ci illər üçün Tədbirlər Planı”nı təsdiq etdi.
Çimərlik turizminin inkişafı istiqamətində görülən işlər sayəsində Azərbaycan çimərlikləri xarici turistlərin marağına səbəb olur.
“TurStat” agentliyi 2018-ci ilin I rübü ərzində Rusiyaya səfərlər üzrə turizm statistikasını təhlil edib. "TurStat" analitik agentliyi bu il yay üçün Rusiya vətəndaşları arasında MDB-nin ən populyar kurortlarının reytinqini hazırlayıb. Qeyd edək ki, ilk beşliyə Qazaxıstanın Burabay (Boroboe), Qırğızıstanın İssık-Kul gölü, Belarusun Naroç gölü, Bakıdakı Bilgəh çimərliyi və Ermənistanda Sevan gölü daxildir. Agentliyin məlumatında o da bildirilir ki, bu kurortlardan ən ucuzu İssık-Kul (50 dollar), ən bahalısı isə Bilgəhdir (100 dollar).
Bilgəh çimərliyinin reytinq cədvəlində ilk beşlikdə yer alması barədə fikir bildirən turizm sahəsi üzrə ekspert Bahadur Bilalov “Bakı-Xəbər”ə açıqlamasında qeyd etdi ki, Azərbaycana gələn rusiyalı turistlərin Bilgəh çimərliyinə üstünlük verməsi və orada qalması sevindiricidir.
B.Bilalovun sözlərinə görə, Prezident İlham Əliyev çimərlik turizminin inkişafı ilə bağlı sərəncam imzalayıb: “Sərəncamla bağlı aidiyyəti qurumlar müəyyən işlər görüblər. Pilot layihə kimi çimərliyin yaradılması gündəmə gəlmişdi. Çimərlik turizminin inkişafı istiqamətində görülən işlərin nəticəsidir ki, ölkəyə gələn turistlərin sayı ildən-ilə artır. Təsadüfi deyil ki, bu yaxınlarda Naftalanda xəstəxananın açılışında iştirak edərkən dövlət başçısı bildirib ki, 2017-ci ildə 2016-cı ilə nisbətən ölkəyə gələn turistlərin sayında 22 faiz, bu ilin ilk dövrünün ötən ilin müvafiq dövrü ilə müqayisədə isə hələ ki, 10 faiz artım var. Bu o deməkdir ki, ölkəyə gələn turistlərin sayı ildən-ilə artır. Bu artım həm çimərlik, həm də turizmin digər növlərində özünü göstərir”.
Ekspert onu da vurğuladı ki, Azərbaycan turizmi artıq inkişaf dövrünü yaşayır. İnkişafın nəticəsi göz qabağındadır: “Həmçinin, xarici ölkələrin tərtib etdikləri reytinq cədvəllərində də bu hal özünü göstərir”.
Günel CƏLİLOVA
