Şaiq Muradov: “Azərbaycanın bu sahədə kifayət qədər təcrübəsi var”
Bu gün respublikamız dünyanın diqqət mərkəzindədir. İndiyə qədər bir sıra dünya miqyaslı tədbirlərə evsahibliyi edən Azərbaycan ona göstərilən etimadı dəfələrlə doğruldub. Gələn il ölkəmizdə daha bir beynəlxalq səviyyəli tədbirin keçiriləcəyi açıqlanır. Bu günlərdə Bakıda keçirilən Avropada Mühafizəkarlar və İslahatçılar Alyansının sammitində “Təhsil transformasiyası” mövzusunda təşkil edilən paneldə təhsil nazirinin müavini Firudin Qurbanov bildirib ki, 2019-cu ildə Bakıda şagirdlər arasında informatika üzrə dünya olimpiadası keçiriləcək. Nazir müavini qeyd edib ki, bu olimpiadanın keçirilməsi üçün artıq Bakıda hazırlıqlara başlanıb.
İKT üzrə mütəxəssis Şaiq Muradov “Bakı-Xəbər”ə bildirdi ki, şagirdlər arasında informatika üzrə dünya olimpiadasının Bakıya salınması təsadüfi deyil. Ekspert qeyd etdi ki, indiyə qədər ölkəmiz bütün beynəlxalq tədbirlərin keçirilməsini yüksək səviyyədə təşkil edib. Azərbaycanın beynəlxalq qurumlar üçün etibarlı tərəfdaş olduğunu vurğulayan Ş.Muradov hesab edir ki, bu olimpiada da Azərbaycana uğur gətirəcək: “Azərbaycan belə tədbirlərin, olimpiadaların keçirilməsinə təşkilatçılıq baxımından tam hazırdır. Çünki indiyə qədər respublikamızın evsahibliyi ilə daha genişmiqyaslı tədbirlər keçirilib. Əsas məsələ şagirdlərimizin orada daha aktiv iştirak etməsidir. Bilirik ki, indiyə qədər Azərbaycan şagirdləri bir sıra dünya olimpiadalarında iştirak ediblər və uğur qazanıblar. Şagirdlər arasında informatika üzrə dünya olimpiadasının Bakıda keçirilməsinin əhəmiyyətli cəhətlərindən biri odur ki, iştirakçılıq baxımından bura bizim daha çox şagirdimiz qatıla bilər. Müxtəlif sahələrlə bağlı olimpiadalarda daha çox liseylərdə təhsil alan şagirdlər iştirak edir. Çox arzu edərdim ki, orta ümumtəhsil məktəblərinin şagirdləri də bu olimpiada da iştirak etsin və fərqlənsinlər. Bütün məktəblər bu olimpiadaya cəlb edilməlidirlər. Hətta bölgələrdə fəaliyyət göstərən orta ümumtəhsil məktəblərinin də şagirdləri bu olimpiadada özlərini sınamalıdırlar. Gələcək informatikanın, texnologiyanındır. Hansı ölkənin ki, mütəxəssisləri müasir texnologiyanı, İKT yeniliklərini yüksək səviyyədə bilirlər, həmin ölkənin iqtisadiyyatı daha güclü inkişaf edir. Şagirdlər arasında informatika üzrə dünya olimpiadasının Bakıda keçirilməsinin müsbət tərəfləri həddindən artıq çoxdur”.
Ş.Muradov qeyd etdi ki, Azərbaycan beynəlxalq miqyaslı tədbirlər keçirməkdə həddən artıq təcrübə əldə edib. Onun sözlərinə görə, bu təcrübə də ölkəmizə dünya çapında müsbət imic qazandırır. “Ümumiyyətlə, beynəlxalq qurumlar həmişə çalışırlar ki, dünya əhəmiyyətli tədbirləri tədbir keçirməkdə böyük təcrübə qazanan ölkələrə həvalə etsinlər. Bu baxımdan, Azərbaycanın bu sahədə kifayət qədər təcrübəsi var. Vaxt vardı biz deyirdik ki, kaş filan beynəlxalq tədbir Azərbaycanda da keçirilsin. Ancaq son illər bizim arzularımız reallaşır. Biz bundan əvvəl keçirilən yarışlarda, tədbirlərdə xeyli nəticə əldə etmişik. Şagirdlər arasında informatika üzrə dünya olimpiadasından da uğurlu nəticələr gözləyirik. Hesab edirəm ki, bu tədbirin keçirilməsinin həm şagirdlərə, həm də bu sahənin özünə böyük faydası dəyəcək. Hələ olimpiada gələn il keçiriləcək və ondan ancaq müsbət məsələlər gözləyirik” - deyə Ş.Muradov bildirdi.
İradə SARIYEVA
