Bakıda müntəzəm marşrut xəttində adı "qara siyahı"ya salınan sürücülər başqa marşrutda sürücü kimi fəaliyyət göstərə bilməyəcək. Trend-in məlumatına görə, bunu jurnalistlərə açıqlamasında Bakı Nəqliyyat Agentliyinin mətbuat xidmətinin rəhbəri Mais Ağayev deyib.
Onun sözlərinə görə, həmin şəxslərin işdən kənarlaşdırılması və işə götürülməməsi barədə daşıyıcılara məlumat göndərilir: "Bu məsələyə Bakı Nəqliyyat Agentliyi müdaxilə etmir və bu da mənfi bir haldır. Çünki, sürücüləri daşıyıcılar işə götürür. Bu yaxınlarda işdən azad edilən və "qara siyahı"ya salınan iki sürücü ilə bağlı biz bütün daşıyıcılara məlumat göndərmişik. Eyni zamanda həmin sürücülərlə bağlı hüquqi qiymət verilməsi üçün lazımi qurumlara da müraciət edilib. Amma biz düşünürük ki, bu cür şəxslərin də adları konkret bir bazaya daxil edilsin. Bu isə peşəkar sürücü bazası formalaşdırılandan sonra mümkün olacaq".
M.Ağayev bildirib ki, işdən qovulan sürücülərin təlimlərə cəlb edilərək yenidən işə qəbul olunmasına icazə verilməsi müəyyən qaydalar çərçivəsində baş tuta bilər: "Məsələn, əgər həmin sürücü təlimdən keçmək üçün müraciət edərsə, onun törətdiyi hadisənin ağırlıq dərəcəsi müəyyənləşdiriləcək. Bakı Nəqliyyat Agentliyi bu cür məsələlərə liberal mövqedən yanaşır. Biz maksimum çalışmışıq ki, hər hansı hadisə törədən sürücünü cəzalandırmaq əvəzinə ilk əvvəl maarifləndiririk. Bakı Nəqliyyat Agentliyi bu məsələyə maksimum humanist yanaşır. Lakin, bu o demək deyil ki, agentlik hansısa daşıyıcıya güzəştə gedəcək".
“Üzərində məhkumluğu olan şəxslərin sürücülüyə qəbul edilməməsi barədə fikirlər düzgün deyil”. Bu barədə də Bakı Nəqliyyat Agentliyinin mətbuat xiddmətinin rəhbəri Mais Ağayev bildirib.
Qurum rəsmisi deyib ki, bu cür şəxslər cəmiyyətə inteqrasiya olunmalıdır: "Dövlətin də bu barədə xüsusi siyasəti var. Məhkumluğu olan şəxsin sürücü kimi fəaliyyət göstərməsinə məhdudiyyət yoxdur. Sadəcə bu məsələyə xüsusi yanaşmalar olmalıdır ki, həmin şəxslərin törətdiyi cinayətə baxılmalı, araşdırılmalıdır. Əgər sürücü təkrar cinayət törədibsə, içkili vəziyyətdə avtomobil idarə edərkən qəza törədibsə və bu hadisə çoxsaylı insanların xəsarət almasına səbəb olubsa, həmin sürücünün 3-cü dəfə avtobus idarə etməsi mümkün deyil".
M.Ağayevin sözlərinə görə, həmin şəxs sürücü kimi deyil, istehsalat bazasında başqa bir işlə məşğul ola bilər.
