Daxili işlər orqanlarının əməkdaşları narkotik vasitələrin qanunsuz dövriyyəsinə qarşı tədbirlər görməklə yanaşı, həm də gənclərlə vaxtaşırı maarifləndirici görüşlər keçirir.
Belə tədbirlərdən biri bu yaxınlarda Nərimanov RPİ-nin rəhbərliyi, Bakı şəhər BPİ və Nərimanov RPİ-nin Veteranlar Şurasının sədrləri ilə birgə paytaxtın 200 nömrəli Məktəb-Lisey Kompleksində gerçəkləşib. “Ağ ölüm əsrin bəlasıdır!” mövzusunda keçirilən həmin tədbirdə çıxış edən Bakı şəhər BPİ-nin Veteranlar Şurasının sədri Emin Məmmədov şagirdlərin nəzərinə çatdırmışdır ki, narkomaniya cəmiyyətin mənəvi və əxlaqı dəyərlərinə ciddi zərbə vuran, sosial-iqtisadi inkişafa mənfi təsir göstərən, insanların həyat və sağlamlığına böyük təhlükə yaradan, həmçinin cinayətkarlığın artmasına səbəb olan əsas amillərdən biridir. Qeyd edib ki, narkotik vasitələrdən istifadə edən hər bir şəxs sonradan onun bəlasından qurtula bilmir, əksinə, öz gələcəyini bilərək məhv edir. Narkotacirlər isə məhz iradəsi zəif olan gənclər vasitəsi ilə öz şəbəkələrini genişləndirərək, xüsusən məktəbliləri bu işə cəlb etməyə, qazanc götürməyə çalışırlar.
Nərimanov RPİ-nin Veteranlar Şurasının sədri Paşa Kərimov isə çıxışında zərərli vərdişlərə qurşanan gənclərin səhhətində və davranışında yaranan problemlər barədə məlumat verərək bildirib ki, bu tip narkotik maddələri qəbul edən şəxslər istər maddi, istərsə də mənəvi cəhətdən məhv olur. Onlarda əsəbilik, ruhi gərginlik, yuxusuzluq halları müşahidə edilir. Bundan başqa, narkotik maddələri davamlı olaraq qəbul edənlər mədə və bağırsaq, digər sağalmaz xəstəliklərə yoluxur. Xəstə təxəyyüllü narkoman yalnız cəmiyyətə yararsız deyil, hətta ailəsi və yaxın qohumları da belələrindən bezərək imtina edir.
Natiq bildirib ki, yeniyetmə və gənclərin zərərli vərdişlərə meyl göstərməsinin qarşısını almaq üçün valideyn və müəllimlər onların asudə vaxtlarının səmərəli təşkil olunmasına diqqət yetirməli, uşaqların elmə, idmana və faydalı təlimlərə yönləndirilməsi, vətənpərvər ruhda böyümələri istiqamətində davamlı işlər aparmalıdır.
Sonda məktəbliləri maraqlandıran suallar cavablandırılıb.
Xəyalə MƏMMƏDOVA DİN Mətbuat Xidmətinin əməkdaşı
