İsmayıl Əhməd: “İftara qədər açılan ehsan süfrəsində din xadiminin iştirak etməsi yolverilməzdir, bu həm qanunla qadağandır, həm də dini baxımdan düzgün deyil”
El arasında belə bir deyim var: "toy və yas hər evin "qonağı"dır". Bəli bu "qonağ"ın evlərə nə zaman gəlib, nə zaman gedəcəyini bilən yoxdur. Xüsusilə də söhbət insanları qəflətən haqlayan ölümdən gedirsə...
Artıq müqəddəs Ramazan ayını yaşayırıq. Bu ayda inanclı insanlar oruc tuturlar. Bu ayda toy, xeyir məclisləri olmur. Ancaq qeyd etdiyimiz kimi, insan ölümü qəflətən qapını döyür. Orucluq ayında keçirilən yas mərasimlərində ehsan süfrəsinin verilib-verilməməsi müzakirə olunur. Yas mərasimində iştirak edənlərin arasında oruc tutanlarda olur, tutmayanlar da.
Qafqaz Müsəlmanları İdarəsinin (QMİ) sədri, Şeyxülislam Hacı Allahşükür Paşazadə çıxışlarında bildirib ki, Ramazan ayı müddətində iftardan öncə ehsan verilməməlidir: “Bu tələb möminlər və mollalar tərəfindən qəti şəkildə qoyulmalıdır. Əgər bu tələbə riayət olunmazsa, molla həmin mərasimdə Quran açmamalıdır. Bu, şəriətin tələbidir və hər kəs bu tələbə riayət etməlidir”.
Buna baxmayaraq, bəzi mərasimlərdə ehsan süfrəsinin verilməsinin lazım olduğu bildirilir. Molla ehsan süfrəsinin açılmasına icazə verərsə, o necə cəzalandırıla bilər? Ümumiyyətlə, Ramazan ayında iftardan öncə ehsan süfrəsi verilməlidirmi?
İlahiyyatçı İsmayıl Əhməd “Bakı-Xəbər”ə açıqlamasında qeyd etdi ki, Ramazan ayında hər növ ehsan süfrəsinin verilməsi təqdirəlayiqdir. Adi bir stəkan çay və xurma da ehsan sayılır. Ancaq bu, iftardan sonra verilməlidir: “Bəzən yas məclislərində deyirlər ki, uzaq məsafədən gələn olduğu üçün ona ehsan verilə bilər. Ancaq bu düzgün deyil. Mərasimdə iştirak edənlər iftara qədər ehsanın verilməsini ev yiyəsindən tələb etməməlidirlər. Çünki bununla bağlı Qafqaz Müsəlmanları İdarəsinin qərarı var. İftara qədər verilən ehsan süfrəsində ruhanilər iştirak etməməlidirlər. Əks halda, onlar Qafqaz Müsəlmanları İdarəsinin qərarına əsasən müəyyən məbləğdə cərimələnəcəklər. Bu müsbət haldır. Hər kəs bilməlidir ki, Ramazan ayında iftara qədər ehsanın verilməsi haramdır”.
Həmsöhbətimiz onu da bildirdi ki, yas mərasimlərində əsasən oruc tutmayan şəxslər ehsanın verilməsini tələb edirlər: “Ola bilər ki, məclis sahibi rəhmətə gedən şəxs üçün ehsan süfrəsi təşkil edir. Ancaq iftara qədər açılan ehsan süfrəsində din xadiminin iştirak etməsi yolverilməzdir. Bu həm qanunla qadağandır, həm də dini baxımdan düzgün deyil”.
Güenel CƏLİLOVA
