Kamran Əsədov: “Bunun nəticəsidir ki, bu gün 9-11 sinif buraxılış imtahanlarının nəticələri çox acınacaqlıdır”
Diaqnostik qiymətləndirmədə çox aşağı nəticə göstərən müəllimlər ən minimum dərs yükü ilə təmin olunurlar. Onlara 6 saatdan çox dərs verilmir. Qeyd edək ki, Təhsil Nazirliyinin bununla bağlı yerli təhsil idarəetmə orqanlarına, müəssisə rəhbərlərinə müxtəlif təlimatları var.
Təhsil Nazirliyinin İnsan resursları şöbəsinin müdir əvəzi Eşqi Bağırov media nümayəndələrinə açıqlamasında qeyd edib ki, sonuncu diaqnostik qiymətləndirmədə müxtəlif fənlərdən aşağı nəticə göstərən müəllimlər var: "Bu amil dərs yükü bölüşdürülərkən çox ciddi şəkildə nəzərə alınacaq. Diaqnostik qiymətləndirmə mütəmadi olaraq keçirilir. Aşağı nəticə göstərən müəllimlər üçün növbəti qiymətləndirmə zamanı şərait yaradılacaq və hər bir müəllim öz nəticəsini yüksəltmək imkanına malik olacaq".
Diaqnostik qiymətləndirmədə aşağı nəticə göstərən müəllimlərin dərs yükünün azaldılmasına münasibət bildirən təhsil eksperti Kamran Əsədov “Bakı-Xəbər”ə açıqlamasında qeyd etdi ki, 4472 orta məktəbdə çalışan 151 min müəllimin 45 faizi diaqnostik qiymətləndirmədən minimum nəticə göstərib. Onların nəticəsi qənaətbəxş deyil: “Buna baxmayaraq, kifayət qədər yüksək bal toplayan müəllimlər var. O müəllimlər tədris ili müddətində şagirdlərə bilik öyrətməklə yanaşı, öz üzərlərində çalışırlar. Onların haqqıdır ki, yüksək nəticə göstərdikləri üçün artıq dərs saatı alsınlar. Bu, rəqabət mühitini formalaşdırır. 2-5 bal toplayan müəllimə çox dərs saatı niyə verilməlidir? Nəzərə almaq lazımdır ki, minimum tələbə cavab verməyən şəxs keyfiyyətli təhsil verə bilməyəcək. Bunun nəticəsidir ki, bu gün 9-11 sinif buraxılış imtahanlarının nəticələri çox acınacaqlıdır. 35 min şagird doğma ana dilindən 2 qiyməti alıb. Ali məktəblərə qəbul imtahanında iştirak edənlərin 50 faizi keçid balını toplaya bilmir. Bu, orta ümumtəhsil məktəblərində çalışan müəllimlərin böyük əksəriyyətinin minimum biliyə malik olmaması ilə bağlıdır”.
Həmsöhbətimizin sözlərinə görə, müəllimlik sənəti təhsilin və dövlətin ən strateji xəttidir: “Peşəkar müəllim heyətinin olması keyfiyyətli iqtisadiyyatın, siyasətin, mədəniyyətin, sosial həyatın olması deməkdir. Qonşu Rusiyada diaqnostik qiymətləndirmədən keçə bilməyən müəllimlərə nəinki az dərs yükü verilir, ümumiyyətlə, onların pedaqoqluq fəaliyyətinə xitam verilir. Az biliyi olan müəllimin dərs deməsinə icazə verilmir”.
K.Əsədov onu da bildirdi ki, Azərbaycan cəmiyyətinə savadlı müəllim lazımdır: “Məlumat üçün deyim ki, Azərbaycan təhsili dünya reytinqində ən aşağı səviyyədə qərarlaşıb. 54 universitetimizdən heç biri dünyanın ilk minliyində belə qərarlaşmayıb. Bunun səbəbi isə bilik verənlərin özlərinin təhsilinin aşağı səviyyədə olmasıdır. Biliyi zəif olan pedaqoqlara güzəşt olunmasının əleyhinəyəm”.
Günel CƏLİLOVA
