Şəmsəddin Ağayev: “Bütün bu nəticələr Azərbaycan dövləti və onun polisinin beynəlxalq qanunlara bəslədiyi hörmət sayəsində əmələ gəlib”
Daxili işlər naziri, general-polkovnik Ramil Usubov Azərbaycanda səfərdə olan İşgəncələrin qarşısının alınması üzrə Avropa Komitəsinin (CPT) prezidenti Mikola Qnatovskinin rəhbərlik etdiyi nümayəndə heyətini qəbul edib.
Nazirliyin mətbuat xidmətindən verilən məlumata görə, komitə təmsilçilərinin keçirdiyi monitorinqin nəticələrinə dair hesabatın rəhbərlik etdiyi qurum tərəfindən diqqətlə öyrənildiyini deyən nazir insan hüquqlarının təmin olunması işinin səmərəliliyinin artırılmasına yönələn tövsiyələrin icrasına başlandığını xatırladıb və sənəddə əksini tapan digər məqamlara toxunub.
Səmimi qəbula və ətraflı məlumata görə minnətdarlığını bildirən İşgəncələrin qarşısının alınması üzrə Avropa Komitəsinin prezidenti cənab Mikola Qnatovski rəhbərlik etdiyi qurumun müxtəlif vaxtlarda keçirdiyi monitorinqlər zamanı aşkarlanmış çatışmazlıqların bir qisminin aradan qaldırıldığını, insan və vətəndaş hüquq və azadlıqlarının pozulması hallarına DİN rəhbərliyinin hər zaman prinsipial mövqedən yanaşdığını qeyd edib. Eyni zamanda, şəhər, rayon polis orqanlarına gətirilən şəxslərin saxlanması ilə bağlı müəyyən tövsiyələrini verib, əməkdaşlığın müsbət nəticəsi kimi mövcud nöqsanların qısa müddətdə aradan qaldırılacağına əminliyini ifadə edib.
Göründüyü kimi, tərəflər arasında səmimi əməkdaşlığın olmasına dair qarşılıqllı fikirlər səsləndirilib. Sözügedən beynəlxalq təşkilatın rəhbəri DİN-in bu sahədə atdığı addımları və həyata keçirdiyi islahatları təqdir edib. Onların belə müsbət qənaətə gəlməsində hansı amillərin rolu olub?
“Polisə Dəstək” İctimai Birliyinin sədri Şəmsəddin Ağayev qəzetimizə açıqlamasında bildirdi ki, həmin görüşlə bağlı yayılan məlumatla tanışdır: “İlk növbədə onu qeyd edim ki, Azərbaycan dövlətinin Konstitusiyasında insan hüquq və azadlıqlarına böyük önəm verilir. Demək ki, deyilən rəftarları birbaşa Azərbaycanın ana qanunu qadağan edir. Polis orqanları da fəaliyyətində Konstitusiyanın tələblərini başlıca örnək kimi qəbul edir. Digər tərəfdən isə son illər ərzində polis orqanlarında demokratik islahatlar təxirə salınmadan həyata keçirilib. Hazırda polislərə keçirilən təlimatlar Avropanın inkişaf etmiş ölkələri səviyyəsindədir. İnsan hüquq və azadlıqları ilə bağlı polis əməkdaşlarına həm nəzəri, həm də praktik biliklər öyrədilir. Azərbaycan polisi ölkəmizin tərəfdaş çıxdığı bütün beynəlxalq qanun və konsepsiyalara yüksək şəkildə riayət edir. Polis orqanlarına qəbul olunan hər yeni əməkdaşla bağlı fərdi təlimlər keçirilir. Sonra bunlar qrup halında edilir. Çox təcrübəli ekspertlər onlara mühazirələr oxuyurlar. Təbii ki, görülən bu cür müsbət işlərin müqabilində belə də nəticə olmalıdır. Hətta mən deyərdim ki, beynəlxalq təşkilat az da olsa öz hesabatında ifrata varıb. Bütün bu nəticələr Azərbaycan dövləti və onun polisinin beynəlxalq qanunlara bəslədiyi hörmət sayəsində əmələ gəlib”.
Məhəmmədəli QƏRİBLİ
