6 iyun 1948-ci ildə İmişli rayonunda el ağsaqqalı Seyid Niyaz Ağanın ailəsində anadan olub.
1954-cü ildə İmişli şəhər I saylı orta məktəbinə daxil olub və 1965-ci ildə həmin məktəbi Qızıl medalla bitirib.
1965-ci ildə N.Nərimanov adına Azərbaycan Tibb İnstitutunun müalicə-profilaktika fakültəsinə daxil olub və 1971-ci ildə adı çəkilən ali təhsil ocağını müvəffəqiyyətlə bitirərək həkim ixtisasına yiyələnib.
İnstitutun göndərişi ilə 1971-74-cü illərdə Kəlbəcər rayonunun İstisu sanatoriyasında həkim işləyib.
1974-cü ildən Bakı şəhəri 29 saylı Birləşmiş Şəhər Xəstəxanasında əvvəlcə terapiya şöbəsinin müdiri, sonradan isə həmin xəstəxananın baş həkimi vəzifəsində işləyib.
1982-ci ildə Bakı şəhəri Xəzər rayonu Səhiyyə şöbəsinin müdiri vəzifəsinə irəli çəkilib və 1994-cü ilə qədər həmin vəzifədə çalışıb.
1994-cü ildən 2014-cü ilin sentyabr ayına qədər Bakı şəhəri Xəzər rayonu Binə qəsəbəsində 29 saylı Birləşmiş Şəhər Xəstəxanasının baş həkimi vəzifəsində işləyib.
1978-1990-cı illərdə 5 dəfə Bakı şəhər, rayon, qəsəbə xalq deputatları Sovetinin deputatı olub.
YAP Xəzər rayon Təşkilatı Siyasi Bürosunun üzvüdür.
2006-cı ilin dekabr ayında Həcc ziyarətinə gedib və 2007-ci ilin yanvar ayında ziyarətini başa vuraraq Hacı olub.
Evlidir 2 övladı, 5 nəvəsi vardır.
Ali dərəcəli Səhiyyə təşkilatçısıdır.
SSRİ Səhiyyə əlaçısıdır.
Bu gün Hacı Hafiz Seyid Niyaz oğlunun 70 yaşı tamam olur. Əzizimiz Hacı Hafiz Seyid Niyaz oğlu, Sizi ürəkdən, səmimi qəlbdən təbrik edir, fəaliyyətinizdə uğurlar, sağlamlıq və imanla dolu uzun ömür arzulayırıq!
Hacı Hafiz həkimin niyyətləri
Bütün varlığım, həyatım, mənliyim, şərəfim və arzularım xalqımındır, Türk millətinə ətadır.
Xalqımın inkişaf etməsinə, yoxsul və ya varlı olmasına rəğmən, bütün ailələrimizdəki övladlarımızın əxlaq, elm, iman və təqva sahibi olmaqla tərəqqidə olmasını istəyirəm.
Dünyanın bütün xalqlarına sayğım var və heç bir xalqı bizdən nə üstün, nə aşağı sayıram. Amma damarımdakı qanın hər damlasının məhz xalqım üçün axmasını istəyirəm.
“Xalqım” deyəndə xalqın mənə məxsus olduğunu yox, mənim xalqın zərrəsi və xidmətçisi olduğumu nəzərdə tuturam. Necə ki, anam deyəndə anamızı, Allahım deyəndə Allahımızı düşünürük.
Uca Allah mənə güc və ömür versin ki, gücümü və ömrümü sevdiyim insanlara verim. O insanlara ki, tanımıram, amma varlıqlarını bilirəm.
Onlar mənim həmvətənlərimdir, xalqımdır, dindaşlarımdır, Türk soylarımdır, mənəm.
