İlqar Orucov: “Dövlət xətti ilə xaricdə təhsil alan gənclər müvafiq sahədə çalışarkən həm biliklərini, həm insanlara xidmət etməyi, həm də təcrübələrini aşılayacaqlar”
“Dövlət qulluğu haqqında” Azərbaycan Respublikası Qanununun 28.1-ci maddəsinə əsasən, Azərbaycan gənclərinin xarici ölkələrdə təhsili üzrə Azərbaycan Respublikasının Prezidenti tərəfindən təsdiq olunmuş Dövlət Proqramı çərçivəsində xaricdə təhsil almış şəxslər müsabiqə və ya müsahibədənkənar dövlət qulluğuna qəbul edilə bilərlər.
Dövlət İmtahan Mərkəzinin yaydığı məlumatda qeyd olunur ki, "2007-2015-ci illərdə Azərbaycan gənclərinin xaricdə təhsili üzrə Dövlət Proqramı" çərçivəsində xaricdə təhsil alanlar vakant inzibati dövlət qulluğu vəzifələrinin tutulması üçün müvafiq dövlət orqanlarına müraciət edə bilərlər.
Dövlət Proqramı əsasında xaricdə təhsil alan gənclərin müsabiqə və müsahibədənkənar dövlət qulluğuna qəbul olunmasına fikir bildirən Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə açıqlamasında qeyd etdi ki, ölkə başçısı İlham Əliyev tərəfindən azərbaycanlı gənclərin xaricdə təhsil alması ilə bağlı Dövlət Proqramı qəbul edib: “Məlumat üçün bildirim ki, həmin Dövlət Proqramının hazırlanmasında iştirak edən işçi qrupun üzvü olmuşam. İxtisas seçimində əsasən Azərbaycan üçün strateji əhəmiyyət kəsb edən fakültələr seçilirdi. Bu proqram sayəsində Azərbaycan gənclərinin bir qismi dövlət hesabına xaricdə təhsil almaq imkanı əldə etdi. Həmin gənclərin bəzisi bu gün vətənə geri dönüb. Sevindirici haldır ki, peşəkar kadrlar və dünyanın nüfuzlü ali təhsil müəssisələrində təhsil alan gənclər əmək bazarında özlərinə yer ediblər. Həmçinin, dövlət onlara əlavə imkan yaradır ki, dövlət qulluğuna qəbul olunarkən imtahan verməsinlər. Hesab edirəm ki, bu olduqca doğru bir addımdır. Almaniyada təhsil alan gəncin ikinci dəfə işə qəbul üçün imtahan verməsi düzgün deyil. Bu istiqamətdə qərar qəbul olunacaq, bu yalnız alqışlanmalıdır”.
İ.Orucovun sözlərinə görə, dövlət xətti ilə xaricdə təhsil alan gənclər müvafiq sahədə çalışarkən həm biliklərini, həm insanlara xidmət etməyi, həm də təcrübələrini aşılayacaqlar: “Bu cür gənclərin dövlət qulluğunda çalışmasına şərait yaradılması sevindiricidir”.
Həmsöhbətimiz hesab edir ki, savadlı kadrları imtahan etmək əvəzinə, onlara dəstək olaraq vakant işə qəbul etmək lazımdır.
Günel CƏLİLOVA
