Könül Vaqifqızı: “Narkomaniya xəstəliyinə düçar olmuş yeniyetmə və gənclərin vaxtında müəyyən edilərək barələrində tibbi-profilaktik tədbirlərin görülməsi vacibdir”
Azərbaycanda gənclər arasında narkotik vasitələrə aludəçiliyə qarşı mübarizə aparmaq üçün müxtəlif növ tədbirlər həyata keçirilir. Ölkədə gənclərin narkotik vasitələrə meylliyinin azaldılması üçün daha təsiredici tədbirlər görülməsinin vacib olduğu bildirilir.
Narkotiklərə Qarşı Milli Təbliğat Ofisinin rəhbəri Məzahir Əfəndiyev media nümayəndələrinə açıqlamasında qeyd edib ki, bu sahədə tədbirlər gücləndirilməlidir: "Bunun üçün əsasən maarifləndirmə, təbliğat işləri gücləndirilməlidir. Təbii ki, bu məqsədlə dövlət tərəfindən tədbirlər görülür. 2007-2013-cü illər və 2013-2018-ci illəri əhatə edən dövlət proqramları həyata keçirilir. Amma daha effektiv tədbirlərin həyata keçirilməsi vacibdir. Biz istəyirik ki, narkotiklərə meyllənən gənclər islah-əmək müəssisələrinə deyil, səhiyyə müəssisələrinə göndərilsin, həmin müəssisələrdə onların məcburi müalicəsi həyata keçirilsin. Həmçinin, maarifləndirmə tədbirlərinin gücləndirilməsi üçün maliyyə istiqamətləri müəyyən edilsin".
M.Əfəndiyevin fikrincə, bu, narkotik vasitələrə aludəçilik hallarına qarşı effektiv tədbirlərin həyata keçirilməsinə, gənclərin narkotikdən uzaqlaşmasına imkan verəcək: "Biz çalışmalıyıq ki, gənclər idmana, elmə, kitaba meyllənsin və narkotikdən uzaq olsunlar".
Narkotikə meyllənən gənclərin məcburi müalicəyə cəlb olunmasına münasibət bildirən psixoloq Könül Vaqifqızı bizimlə söhbətində bildirdi ki, narkotik maddələrə meyl edənlərin sağalması üçün ailənin üzərinə böyük məsuliyyət və vəzifə düşür: “Ailələr ictimai qınaqdan qorxduğuna görə həqiqəti qəbul etmir və övladlarını qeydiyyata salmaq istəmirlər. Ancaq valideyn bilməlidir ki, övladını narkoloji mərkəzə aparmamaqla onun gələcəyinə zərər vurur. İlkin vaxtlarda onu sağaltmaq olar. Bu problemi hiss edən valideyn ilk növbədə narkoloji mərkəzə müraciət etməlidir. Bəzi həkimlər belə şəxsləri sağalda biləcəyini deyir, amma mütəxəssislərə müraciət etmək lazımdır. Narkoloji mərkəzdə anonim şəkildə də qeydiyyata düşmək mümkündür. Burada müalicə təkcə dərmanlarla deyil, psixoloji söhbətlərlə də aparılır. Vaxtında müalicə olunmayan şəxslərdə qaraciyər tamamilə sıradan çıxır, orqanizm öz fəaliyyətini dayandırır”.
Həmsöhbətimiz hesab edir ki, narkotikə meyllənən gənclərin məcburi müalicəyə cəlb olunması düzgün olar: “İlkin dövrdə bunun qarşısını almaq olar. Məcburi şəkildə həmin şəxslər müalicəyə cəlb olunarlarsa, tez bir zamanda narkotik asılılığından azad olarlar.
Onun fikrincə, narkomaniya xəstəliyinə düçar olmuş yeniyetmə və gənclərin vaxtında müəyyən edilərək barələrində tibbi-profilaktik tədbirlərin görülməsi vacibdir.
Günel CƏLİLOVA
